ខេត្តស្វាយរៀង ៖ សមត្ថកិច្ចនគរបាលស្រុកស្វាយជ្រំ ចាប់ឃាត់ខ្លួនក្រុមក្មេងទំនើង០៦នាក់ ជិះម៉ូតូកាន់ដាវ និងកាំបិតអូសបណ្តោយថ្នល់ បង្កការភ័យខ្លាចដល់អ្នកធ្វើដំណើរតាមដងផ្លូវ ។ បើតាមលោកសោមសុភ័ណ្ឌ អធិការនគរបាលស្រុកស្វាយជ្រំ…
ខេត្តស្វាយរៀង ៖ សមត្ថកិច្ចនគរបាលស្រុកស្វាយជ្រំ ចាប់ឃាត់ខ្លួនក្រុមក្មេងទំនើង០៦នាក់ ជិះម៉ូតូកាន់ដាវ និងកាំបិតអូសបណ្តោយថ្នល់ បង្កការភ័យខ្លាចដល់អ្នកធ្វើដំណើរតាមដងផ្លូវ ។
បើតាមលោកសោមសុភ័ណ្ឌ អធិការនគរបាលស្រុកស្វាយជ្រំ បានអោយដឹងនារសៀលថ្ងៃទី២៦ ខែធ្នូ ឆ្នាំ២០២៤នេះថា ជនសង្ស័យជាក្មេងទំនើងដែលនគរបាលស្រុកស្វាយជ្រំ ចាប់ឃាត់ខ្លួនរួមមាន ៖
១. ឈ្មោះ ដ.រ.យ ភេទប្រុស អាយុ១៥ឆ្នាំ នៅភូមិកណ្តាលឃុំធ្លកស្រុកស្វាយជ្រំ។
២. ឈ្មោះ ម.ស.រ.វ ភេទប្រុស អាយុ១៥ឆ្នាំ មុខរបរកសិករនៅភូមិចែងម៉ែង ឃុំអង្គតាសូ ស្រុកស្វាយជ្រំ។
៣. ឈ្មោះ ព.ម.រ ភេទប្រុស អាយុ១៥ឆ្នាំ ភូមិបឹងឃុំអង្គតាសូស្រុកស្វាយជ្រំ។
៤. ឈ្មោះ ស.ភ.រ ភេទប្រុស អាយុ១៥ឆ្នាំ ភូមិធ្លក ឃុំធ្លកស្រុកស្វាយជ្រំ។
៥. ឈ្មោះ ន.ស.ហ ភេទប្រុស អាយុ១៥ឆ្នាំ នៅភូមិកណ្តាលឃុំធ្លក ស្រុកស្វាយជ្រំ។
និងទី៦. ឈ្មោះ ម.ជ.វ ភេទប្រុស អាយុ១៥ឆ្នាំ នៅភូមិបឹងគ្រៀល ឃុំអង្គតាសូ ស្រុកស្វាយជ្រំ ។
លោកអធិការបន្តថា កាលពីថ្ងៃទី២៥ ខែធ្នូឆ្នាំ២០២៤ វេលាម៉ោង១និង៣០នាទី រសៀល មន្ត្រីប៉ុស្តិ៍នគរបាលរដ្ឋបាលពោធិរាជ បានទទួលព័ត៌មានពីប្រជាពលរដ្ឋថា មានក្មេងទំនើង០១ ក្រុមមានគ្នាប្រហែល០៥នាក់ទៅ០៦នាក់ ជិះម៉ូតូចំនួន០៣គ្រឿង បានជិះម៉ូតូកាន់ដាវ និងកាំបិតអូសបណ្តោយថ្នល់ពីទិសខាងត្បូងទៅទិសខាងជើង បានចម្ងាយ៥០០ម៉ែត្រ រួចហើយក៏នាំគ្នាជិះម៉ូតូគេចខ្លួនបាត់អស់ ។
ពេលទទួលបានព័ត៌មានកម្លាំងជំនាញស្រុកសហការជាមួយកម្លាំងប៉ុស្តិ៍នគរបាលពោធិរាជ ប៉ុស្តិ៍នគរបាលរដ្ឋបាលធ្លក ប៉ុស្តិ៍នគរបាលរដ្ឋបាលអង្គតាសូ ប៉ុស្តិ៍នគរបាលរដ្ឋបាលដូនស ស្ទាក់តាមគោលដៅប្រទាក់ក្រឡានីមួយៗ បន្ទាប់មកសមត្ថកិច្ច បានធ្វើការស្រាវជ្រាវ កំណត់មុខសញ្ញាបានចំនួន០៦នាក់ នៅចំណុចកញ្ចុះលក់ដូរដងព្រែក ស្ថិតនៅភូមិដូនស ឃុំដូនស ស្រុកស្វាយជ្រំ ខេត្តស្វាយរៀង ក៏នាំខ្លួនយកមកអធិការដ្ឋាននគរបាលស្រុកស្វាយជ្រំ ដើម្បីសាកសួរ ។
នៅចំពោះមុខ ក្រុមក្មេងទំនើងទាំង០៦នាក់ បានឆ្លើយសារភាពថា នៅថ្ងៃទី២៥ ខែធ្នូ ឆ្នាំ២០២៤ វេលាម៉ោង០១រសៀល បក្សពួកខ្លួនបានបបួលគ្នាជិះម៉ូតូចំនួន០៣គ្រឿង បានដាក់ដាវ និងកាំបិតកាកុក ក្នុងកែបម៉ូតូ ជិះចេញពីឃុំធ្លក ស្រុកស្វាយជ្រំ ជិះម៉ូតូទៅដើរលេង នៅក្នុងក្រុងស្វាយរៀងរហូតដល់ម៉ោង១និង៥០នាទីរសៀល ទើបបបួលគ្នាជិះម៉ូតូចេញពីក្រុងស្វាយរៀងវិញ រហូតមកដល់ចំណុចលើថ្នល់ ស្ថិតនៅភូមិទទា សង្កាត់ចេក ក្រុងស្វាយរៀង ក៏កាន់ដាវ និងកាំបិតអូសតាមបណ្តោយថ្នល់ បានចម្ងាយប្រហែល១,៥០០ម៉ែត្រ ក៏ឈប់អូស ក៏ជិះម៉ូតូទៅដល់ភូមិអញ្ចាញ ឃុំពោធិរាជ ស្រុកស្វាយជ្រំ ក្រុមបក្ខពួកខ្លួន ក៏កាន់ដាវ និងកាំបិតអូសលើថ្នល់ម្តងទៀត បានចម្ងាយប្រហែល៥០០ម៉ែត្រ ទើបឈប់បាននាំគ្នាជិះម៉ូតូចូលផ្ទះ ។
បន្ទាប់មកក៏យកដាវ និងកាំបិតដាក់ក្នុងកែបម៉ូតូ បបួលគ្នាជិះម៉ូតូដើរលេងទៅកញ្ចុះលក់ដូរដង ព្រែកស្ថិតនៅភូមិដូនស ឃុំដូនស ស្រុកស្វាយជ្រំ ពេលក្រុមបក្ខពួកខ្លួនកំពុងអង្គុយលេង ស្រាប់តែសមត្ថកិច្ចមកដល់បានឃាត់ពួកខ្លួនទាំង០៦នាក់ និងដកហូតវត្ថុតាងកាំបិត និងដាវនៅក្នុងកែបម៉ូតូរបស់ពួកខ្លួន ។
ក្រោយពីបានស្តាប់ចម្លើយសារភាពរបស់មុខសញ្ញាក្មេងទំនើងរួចហើយ លោកអធិការនគរបាលស្រុកស្វាយជ្រំ បានរាយការណ៍ជូនលោកឧត្តមសេនីយ៍ទោ ស្នងការ និងបានសុំយោបល់លោក ខាំ សុផារី ព្រះរាជអាជ្ញាអមសាលាដំបូងខេត្តស្វាយរៀង ឃាត់ខ្លួនមុខសញ្ញាក្មេងទំនើង ទាំង០៦នាក់ នៅអធិការដ្ឋាននគរបាលស្រុកស្វាយជ្រំ ។ រហូតដល់ថ្ងៃទី២៦ខែធ្នូឆ្នាំ ២០២៤ កម្លាំងជំនាញអធិការដ្ឋាននគរបាលស្រុកស្វាយជ្រំ បានបញ្ជូនក្រុមក្មេងទំនើង ទៅផែនការងារនគរបាលព្រហ្មទណ្ឌ ដើម្បីចាត់ការតាមច្បាប់ ៕
ចែករំលែកព័តមាននេះ