បណ្តាវេជ្ជបណ្ឌិតអង់គ្លេសបានព្រមានថា ការទទួលទានស្រាត្រឹមតែកន្លះកែវក្នុងមួយថ្ងៃ ធ្វើឲ្យស្ត្រីប្រឈមនឹងអត្រាគ្រោះថ្នាក់ដោយជំងឺមហារីកដោះបានដល់ទៅ១០ភាគរយ។ លោកសាស្ត្រាចារ្យSir lan Gilmoreបានព្រមានថា ការលេបចូលអាល់កុល១ឯកតាក្នុងមួយថ្ងៃ(ផឹកស្រាកន្លះកែវ)បង្កើនអត្រាប្រឈមនឹងការកើតជំងឺមហារីកដោះដល់ទៅ១០ភាគរយ។ ការព្រមានបែបនេះរបស់លោកសាស្ត្រាចារ្យដោយយោងទៅលើលទ្ធផលនៃការសិក្សាដ៏ធំមួយធ្វើឡើងដោយសាកលវិទ្យាល័យOxford Universityលើស្ត្រីជាង១លាននាក់។
លទ្ធផលនៃការសិក្សានោះបានបង្ហាញថា ផឹកសារធាតុអាល់កុល១០ក្រាមក្នុងមួយថ្ងៃបង្កើនអត្រាប្រឈមនឹងជំងឺមហារីកដោះដល់ទៅ១០ភាគរយ។
ទោះជាយ៉ាងណា លោកGilmoreបានទទួលស្គាល់ថា អត្រាប្រឈមនឹងជំងឺខាងដើមមានតិចតួចក្នុងករណីបរិមាណអាល់កុលដែលគេផឹកមានចំនួនតិច។
ដូច្នេះវាច្បាស់ថា ការផឹកស្រាច្រើនហួសហេតុបង្កើនអត្រាគ្រោះថ្នាក់ដោយជំងឺមហារីកដោះក្នុងកម្រិតមួយយ៉ាងខ្ពស់។តែមានមនុស្សជាច្រើនបានអះអាងថា ដរាបណាពួកគេផឹកស្រាក្នុងកម្រិតមួយមិនឲ្យលើសពីការកំណត់ នោះពួកគេនឹងគ្មានបញ្ហាអ្វីឡើយ។
គួរកត់សម្គាល់ថា រយៈពេល៣០ឆ្នាំចុងក្រោយនេះ អត្រាជំងឺមហារីកដោះហាក់ដូចជាបានស្ទុះឡើង ហើយបើតាមតួលេខប៉ាន់ស្មាននៅក្នុងចំនោមស្ត្រី៨នាក់គឺមានម្នាក់ដែលប្រឈមនឹងជំងឺមហារីកដោះក្នុងជីវិតខ្លួនក្នុងថ្ងៃខាងមុខ ។ ផ្នែកមួយចំនួនដែលពាក់ព័ន្ធទៅនឹងការកើនឡើងអត្រាប្រឈមនឹងជំងឺខាងលើមានដូចជាភាពធាត់ដុះពោះ លើសទម្ងន់ ការជក់បារី និងផឹកស្រា ៕
ចែករំលែកព័តមាននេះ