ខេត្តកំពង់ចាម៖ ឯកឧត្តម អ៊ុន ចាន់ដា អភិបាលខេត្ត រួមដំណើរដោយសហការី បានអញ្ជើញចុះពិនិត្យចម្ការគលាតសន្ធឹងលើផ្ទៃដីប្រមាណ៧ហិកតា ស្ថិតនៅក្នុងភូមិកំពង់ត្រុំ ឃុំកោះមិត្ត ស្រុកកំពង់សៀម…
ខេត្តកំពង់ចាម៖ ឯកឧត្តម អ៊ុន ចាន់ដា អភិបាលខេត្ត រួមដំណើរដោយសហការី បានអញ្ជើញចុះពិនិត្យចម្ការគលាតសន្ធឹងលើផ្ទៃដីប្រមាណ៧ហិកតា ស្ថិតនៅក្នុងភូមិកំពង់ត្រុំ ឃុំកោះមិត្ត ស្រុកកំពង់សៀម ជាតំបន់ទេសចរណ៍ និងជាកន្លែងសម្រាប់ចិញ្ចឹមឃ្មុំបែបធម្មជាតិទៀតផង។ ចំពោះទឹកឃ្មុំដែលគេផលិតបានអាចលក់ក្នុងមួយលីត្រតម្លៃប្រមាណ៧ម៉ឺនរៀល ជាមួយនោះ អាចកែច្នៃជាប្រភេទតែទឹកឃ្មុំ សម្រាប់ជំនួយដល់សុខភាពរបស់មនុស្សទៀតផង។
អ្នកស្រីទិត កណិកា អាយុ៤៤ឆ្នាំ មានទីលំនៅរាជធានីភ្នំពេញ ដែលបានចិញ្ចឹមឃ្មុំនៅចម្ការគ បានប្រាប់ឲ្យដឹង នៅព្រឹកថ្ងៃទី២៣ ធ្នូ ឆ្នាំ២០២៤ថា ដល់ពេលរដូវចេញផ្កាគចូលមកដល់ រូបគាត់ព្រមទាំងបងប្អូន និងប្ដីដែលមានគ្នាប្រមាណ៧នាក់ បានដឹកប្រអប់ចិញ្ចឹមឃ្មុំមានជាង១០០យកមកដាក់នៅចម្ការគក្នុងស្រុកកំពង់សៀម ។ ដោយក្នុងមួយសប្តាហ៍ចុះប្រមូលផលម្ដងបានទឹកឃ្មុំចំនួន៧កាន ទៅ៨កានក្នុងមួយកាន៣០លីត្រ ។
អ្នកស្រីបន្តឲ្យដឹងទៀតថា ពិតជាគួរឱ្យសោកស្ដាយ ក្រុមការងារយកទឹកឃ្មុំសព្វថ្ងៃនៅសល់តែចំនួន៤នាក់ ។ ហើយប្រអប់ដាក់ទឹកឃ្មុំធ្លាក់មកនៅសល់តែជាង៣០ប្រអប់ប៉ុណ្ណោះ ។ កត្តានេះដោយសារទឹកឃ្មុំ ដែលផលិតបានលក់លក់ទីផ្សារក្នុងមួយលីត្រតម្លៃ៧ម៉ឺនរៀល ផុតពីរដូវផ្កាគគាត់ត្រូវដឹកប្រអប់ចិញ្ចឹមឃ្មុំប្ដូរទៅដាក់ទីតាំងថ្មី នៅឃុំជប់ស្រុកត្បូងឃ្មុំ ខេត្តត្បូងឃ្មុំ បន្ទាប់មកនៅចុងក្រោយដាក់នៅកោះអន្លង់ចិន។
ទឹកឃ្មុំរបស់គាត់ដែលផលិតបាន ត្រូវប្រជាពលរដ្ឋកម្មង់ទិញពីគ្រប់ទិសទី និងបានដាក់ឈ្មោះយីហោផងដែរ ។ ជាមួយនោះ គាត់សំណូមពរដល់ពលរដ្ឋ សូមមេត្តាជួយគាំទ្រផលិតផលរបស់ខ្មែរយើងឱ្យបានទូលំទូលាយ។
ចំណែកលោកវ៉ែន នាង មេឃុំកោះមិត្តវិញមានប្រសាសន៍ឱ្យដឹងដែរថា ឯកឧត្តម អ៊ុន ចាន់ដា អភិបាលខេត្តកំពង់ចាម បានដឹកនាំក្រុមការងារខេត្ត អាជ្ញាធរមូលដ្ឋាន និងមន្ត្រីពាក់ព័ន្ធ អញ្ជើញចុះពិនិត្យ ការចិញ្ចឹមឃ្មុំនៅចំការគ ក្នុងឃុំកោះមិត្ត ស្រុកកំពង់សៀម កាលពីព្រឹកថ្ងៃទី២២ធ្នូ ឆ្នាំ២០២៤ ដែលមានចំនួនរហូតដល់ជាង៤០០ប្រអប់ មានជាច្រើនម្ចាស់ ។
ក្នុងនោះ តាមគោលការណ៍របស់ខេត្តគឺឲ្យបង្កើត«សហគមន៍ឃ្មុំចំការគ» មិនតែប៉ុណ្ណោះគេអាចកែច្នៃសំណកឃ្មុំធ្វើជាតែលក់មួយកំប៉ុងបាន៦ម៉ឺនរៀល សម្រាប់ជំនួយដល់សុខភាពរបស់មនុស្សទៀតផង។ លោកមេឃុំកោះមិត្តបញ្ជាក់ថា ទីតាំងសម្រាប់ដាក់យកទឹកទឹកឃ្មុំ មានតែមួយកន្លែងនៅចម្ការគនេះ ដែលមានផ្ទៃដីប្រមាណជិត៧ហិកតា ហើយក្រុមអ្នកដាក់នេះគឺមានទីលំនៅជីហែរ ស្រុកកោះសូទិន។
តាមគោលការណ៍ណែនាំរបស់ឯកឧត្តមអភិបាលខេត្ត គឺឲ្យរករទេះសេះ ដើម្បីដឹកភ្ញៀវចេញពីក្រុងកំពង់ចាម មកលេងនៅចំការគ ។ បន្ទាប់ពីបានពិនិត្យកន្លែងចិញ្ចឹមឃ្មុំរួចរាល់ ថ្នាក់ដឹកនាំខេត្ត បានអញ្ជើញពិនិត្យមើលការដាំដុះដំណាំពោតស្ថិតនៅក្បែរនោះ ព្រមទាំងណែនាំឱ្យបង្កើតតំបន់វាលខ្សាច់ចំការគ ក្លាយជាកន្លែងទេសចរណ៍មួយបន្ទាប់ពីឆ្នេរខ្សាច់កោះប៉ែន ៕
ចែករំលែកព័តមាននេះ