​ខេត្ត​បន្ទាយមានជ័យ ៖ រថយន្តទួរីសមួយគ្រឿង មានដឹកសត្វ​ពពែជា​ច្រើន ខណៈកំពុងធ្វើដំណើរតាមផ្លូវ ស្រាប់តែ​ឆ្លងចរន្ត បង្កជាអគ្គិភ័យ​ឆាបឆេះ ​កាលពី​រសៀលថ្ងៃទី១៩ ខែធ្នូ ឆ្នាំ២០២៤ តាមផ្លូវព្រាវ ស្ថិតភូមិជោគជ័យ ឃុំអូរបីជាន់ ស្រុកអូរជ្រៅ ។

ប្រជាពលរដ្ឋ​ដែលឃើញហេតុការណ៍​​បាន​​ឱ្យដឹងថា ​នៅមុនពេលកើតហេតុ គេឃើាំញ​រថយន្ត​ទួរីស​មួយគ្រឿង​មានដឹកសត្វពពែ ធ្វើដំណើរ​ចេញពីឃុំអូរបីជាន់ ក្នុងទិសដៅទៅឡើងផ្លូវជាតិលេខ៥ នៅពេលដែលកំពុងបើកបរ ស្រាប់​តែ​មានផ្សែងហុយ​ចេញពីផ្នែកខាងក្រោមកាប៊ីនរថយន្តបង្កជាអណ្តាតភ្លើងឆាបឆេះ ​ខណៈនោះ​អ្នកបើកបរនិងអ្នករួមដំណើរម្នាក់ទៀតបាននាំគ្នាបើកទ្វាររថយន្ត​ទាញសត្វ​ពពែចេញបានមួយចំនួនធំ និងមួយចំនួនតូចជួយមិនទាន់ ហើយសត្វ​ពពែខ្លះទៀតរត់ចេញមករួច ។

ប្រជាពលរដ្ឋរស់នៅក្បែរកន្លែងកើតហេតុបានបញ្ជាក់ថា ពួកគាត់មានការ​អាណិត​សត្វ​ពពែពេលដឹកតាមរថយន្ត​ទួរីសចេញពីព្រំដែន ត្រូវបានគេច្រកការ៉ុងទុកតែក្បាលចេញមកខាងក្រៅ ដូចជាប់ក្នុងការ៉ុងហើយដាក់ក្នុងរថយន្តទួរីសដាក់ពីរជាន់ លើនិង​ក្រោម ដែលមានសត្វ​ពពែមិនតិចជាង៥០ទៅ៦០ក្បាលនោះទេ ។ លុះ​ពេលមាន​ភ្លើងឆាបឆេះរថយន្ត ជួយបានមួយចំនួនធំ នៅសល់មួយចំនួនដែលជួយមិនទាន់ ​នៅពេលភ្លើង​ឆេះធ្លាយការ៉ុង សត្វពពែខ្លះ​អាចរត់​ចេញរួច ចំណែកខ្លៈទៀតចេញមិនរួច ត្រូវភ្លើង​ឆេះក្នុងរថយន្តយ៉ាងអាណោច​អាធ័ម ។​

អ្នកបើកបររថយន្តបានបញ្ជាក់ថា មូលហេតុដែលអគ្គីភ័យឆាបឆេះរថយន្ត អាចបណ្តាលមកពីឆ្លងចរន្ត ទើបបណ្តាលឱ្យមានភ្លើង​ឆាបឆេះឡើងពីផ្នែកខាងមុខ ដែលមានអណ្តាតភ្លើងនិងផ្សែងខ្មួលខ្មាញហើយ​ជួយពពែយកចេញបានមួយចំនួនធំនៅសល់មួយចំនួនតូចយកចេញ​មិនបាន ហើយមានសត្វ​ពពែខ្លះរត់​ចេញរួចដោយខ្លួនឯង ​។ ចំណែក​រថយន្តត្រូវអគ្គីភ័យឆាបឆេះអស់ស្ទើរទាំងស្រុង ៕