ពូជត្រីល្បី ប្រចាំខេត្តស្ទឹងត្រែង ដល់រដូវចេញកាន់តែធំ តម្លៃកាន់តែខ្ពស់
ខេត្តស្ទឹងត្រែង ៖ ពូជត្រីល្បី ប្រចាំខេត្តស្ទឹងត្រែង ដែលគេស្គាល់ថា ជាត្រីប៉ាស៊ីអ៊ី និងត្រីប៉ាវ៉ា ។ ពូជត្រីនេះ មិនមានលក់នៅលើទីផ្សារ…
ខេត្តស្ទឹងត្រែង ៖ ពូជត្រីល្បី ប្រចាំខេត្តស្ទឹងត្រែង ដែលគេស្គាល់ថា ជាត្រីប៉ាស៊ីអ៊ី និងត្រីប៉ាវ៉ា ។ ពូជត្រីនេះ មិនមានលក់នៅលើទីផ្សារ ដូចជាត្រីដទៃនោះឡើយ ។ លុះត្រាតែ ដល់រដូវរបស់វា ទើបអ្នកនេសាទ អាចប្រមាញ់ចាប់បាន មកលក់លើទីផ្សារ ហើយតម្លៃទៅតាមទម្ងន់តូចធំ ផងដែរ ។
ត្រីប្រភេទនេះ គេស្គាល់តាមរយៈពណ៌សម្បុរ រូបរាង និងឈ្មោះរបស់វា គឺស្រី ប៉ាស៊ីអ៊ី ប៉ាវ៉ាមុខមួយ និងប៉ាវ៉ាមុខពីរ ។ ក្នុងចំណោមត្រីទាំងបីនេះ ត្រីប៉ាស៊ីអ៊ី មានសម្បុរពណ៌ប៉ៃតងក្រម៉ៅ ចាប់ពីក្បាលរហូតដល់កន្ទុយ មានដុំពកលើច្រមុះ បបូរមាត់លើ គ្របលើបបូរមាត់ក្រោម និងបបូរមាត់ក្រោមរាងមូល ស្រការបស់ វាខ្សែឆ្នូតចំហៀងខ្លួន ព្រុយខ្នងមានទ្រនង់ទន់ ចំនួន១០ព្រុយ ពោះ
ព្រុយគូថ និងព្រុយកន្ទុយ ពណ៌ប្រផេះលាយត្នោត ជួនកាលពណ៌ក្រហម គឺជាត្រី ដែលជាប់ឈ្មោះល្បីបំផុត ប្រចាំខេត្តស្ទឹងត្រែង ។ហើយក៏មានតម្លៃថ្លៃជាងគេនោះដែរ ។ ត្រីប៉ាវ៉ាមុខមួយ មានពណ៌សម្បុរប្រហាក់ប្រហែលទៅនឹងត្រីប៉ាស៊ីអ៊ី អ្នកក្នុងតំបន់គេហៅត្រីក្អែកពូក តែពុំសូវមានតម្លៃខ្ពស់នោះទេ រីឯសាច់រស់ជាតិ ក៏ខុសគ្នាផងដែរ ។ ចំណែកត្រីប៉ាវ៉ាមុខពីរ គេសម្គាល់ខ្លួន និងព្រុយរបស់វា មានពណ៌ប៉ៃតង លាយពណ៌លឿងទុំ ត្រង់ក្បាលរបស់វា មានគន្លាក ពណ៌លឿងទុំ និងច្រមុះដុះដុំពក និងទ្រនង់ទន់ បែក អ្នកខេត្តស្ទឹងត្រែង ចាត់ទុកថា ត្រីប៉ាវ៉ាមុខពីរ ជាត្រីលំដាប់ទីពីរ និងមានតម្លៃថ្លៃ បន្ទាប់ពីត្រីប៉ាស៊ីអ៊ី ។
ជាក់ស្ដែង ពាក់កណ្ដាលខែធ្នូនេះ ប្រជានេសាទ ចាប់បានត្រីប៉ាវ៉ាមុខពីរ មួយក្បាល ដែលមានទម្ងន់ជាង ៦គីឡូក្រាម ហើយខ្នាតទម្ងន់នេះ អ្នកនេសាទ លក់ក្នុងតម្លៃ ១គីឡូ ជិត២០ម៉ឺនរៀល តម្លៃសរុបជាង១លានរៀន ។ ឯឈ្មួញ ទិញទៅលក់បន្ត តម្លៃលើសពីនេះ ។
ត្រីប្រភេទនេះ វាស៊ីស្លែតោងតាមថ្ម ជាអាហារ រស់នៅក្នុងទន្លេធំៗ មានទឹកហូរថ្លា ។ ពួកវា ចាប់ផ្តើមក.កើតពងកូន នៅចំកណ្តាលទន្លេសេកុង ក្នុងខែកក្កដា និងខែសីហា ។ ពួកវា អាចបន្លាស់ទី ចេញពីទន្លេសេកុង សេសាន និងស្រែពក ចូលទៅក្នុងទន្លេមេគង្គ ។
តាមការតាមដានរបស់អ្នកជំនាញថា ពួកវា អាចបន្លាស់ទីពីដងទន្លេមេគង្គលើ ចុះទៅដល់ព្រំប្រទល់ខេត្តក្រចេះ និងអាចហែល ទៅដល់ប៉ែកខាងត្បូងប្រទេសឡាវ និងភាគឦសាន នៃប្រទេសថៃ ផងដែរ ។
បើតាមអង្គការ Wonders of the Mekong បានចេញផ្សាយត្រីប៉ាវ៉ាមុខពីរ មានឈ្មោះបែបវិទ្យាសាស្ត្រថា Incisilabeobehri វាជិតផុតពូជ លើភពផែនដីទៅហើយ ។ វាអាចមានទំហំធំបំផុត ដល់ទៅ ៦០សង់ទីម៉ែត្រ ។ ត្រីប៉ាវ៉ាមុខពីរ បានចាត់ចូលក្នុងបញ្ជីក្រហមរបស់ IUCN កាលពីឆ្នាំ២០១១ ថាជាប្រភេទត្រីរងគ្រោះ ៕
ចែករំលែកព័តមាននេះ