បរទេស៖ ហាងខារ៉ាអូខេមួយកន្លែងនៅកណ្តាលទីក្រុងហាណូយ ត្រូវបានគេលួចចាក់សាំងដុតទាំងកណ្តាលរាត្រីបណ្តាលឲ្យមនុស្សប្រុស-ស្រី១១នាក់ឆេះស្លាប់ ២នាក់ដង្ហើមចង្រិត និង៥នាក់ទៀតរងរបួស ។ យោងតាមសារព័ត៌មានវៀតណាម VN Express ចេញផ្សាយ…
បរទេស៖ ហាងខារ៉ាអូខេមួយកន្លែងនៅកណ្តាលទីក្រុងហាណូយ ត្រូវបានគេលួចចាក់សាំងដុតទាំងកណ្តាលរាត្រីបណ្តាលឲ្យមនុស្សប្រុស-ស្រី១១នាក់ឆេះស្លាប់ ២នាក់ដង្ហើមចង្រិត និង៥នាក់ទៀតរងរបួស ។
យោងតាមសារព័ត៌មានវៀតណាម VN Express ចេញផ្សាយ នៅថ្ងៃទី១៩ ខែធ្នូ ឆ្នាំ២០២៤នេះឱ្យដឹងថា កាលពីវេលាម៉ោងប្រហែល១១យប់ថ្ងៃទី១៨ ខែធ្នូ ម្សិលមិញ អគ្គិភ័យបានឆាបឆេះផ្ទះមួយខ្នងមានកំពស់៣ជាន់ ដែលជាហាងខារ៉ាអូខេ ស្ថិតនៅផ្ទះលេខ២៥៨ ផ្លូវ Pham Van Dong សង្កាត់ Co Nhue 2 ខណ្ឌ Bac Tu Liem ទីក្រុងហាណូយ។
ហាងខារ៉ាអូខេនេះ មានទំហំប្រហែល៤០ម៉ែត្រការ៉េ បែរមុខទៅស្ពានអាកាសថ្មើរជើង Pham Van Dong ។ កំឡុងពេលឆេះនៅខាងមុខហាង មានម៉ូតូឡានប្រហែល៦-៧គ្រឿងចតនៅទីនោះ ។ ផ្នែកខាងស្តាំផ្ទះគឺជាដីទំនេរមួយដែលមានរថយន្តចំនួន៣គ្រឿងទៀតចត ចំណែកឯខាងឆ្វេងផ្ទះគឺជារោងជាងក្រឡឹងមួយកន្លែង ។
តាមសាក្សីនៅក្នុងហេតុការណ៍បានអះអាងថា ផ្សែងភ្លើងហុយទ្រលោមបានឆាបឆេះចេញពីជាន់ផ្ទាល់ដី រួចរាលដាលដល់ជាន់ទី១ និងដល់រោងជាងក្រឡឹងដែលនៅក្បែរនោះ ។ នៅពេលភ្លើងឆេះហាងខារ៉ាអូខេនេះមានមនុស្សប្រហែល១៨នាក់នៅខាងក្នុងនោះ ហើយគ្រប់គ្នាបានព្យាយាមរត់គេចខ្លួនដែរ ប៉ុន្តែជណ្តើរដែលចុះទៅកាន់ជាន់ផ្ទាល់ដីត្រូវបានរារាំងដោយភ្លើង ហើយផ្សែងខ្មៅកាន់តែច្រើនបានហុយឡើងទៅជាន់ខាងលើ អ្នកខ្លះបានសម្រេចចិត្តរត់ទៅវេរ៉ង់ដារជាន់ទី៣ដើម្បីទូរស័ព្ទរកជំនួយសង្គ្រោះ ។
ពលរដ្ឋម្នាក់ដែលរស់នៅក្នុងផ្ទះនៅជាប់ហាងខារ៉ាអូខេនោះគឺ អ្នកមីង ង្វៀន ធីហប បាននិយាយថា គាត់កំពុងត្រៀមខ្លួនចូលគេង នៅពេលដែលគាត់បានឮសំឡេងផ្ទុះបន្តបន្ទាប់ រំពេចនោះស្រាប់តែឮសម្លេងស្រែកឆោឡាថា «ភ្លើងឆេះៗ» ។
គាត់ក៏រត់ចេញពីផ្ទះមកឈរលើផ្លូវ ហើយបានឃើញភ្លើងឆេះយ៉ាងសន្ធោសន្ធៅកំពុងលេបត្របាក់នៅក្នុងហាងខារ៉ាអូខេ និងបានឆាបឆេះរថយន្តជាច្រើនគ្រឿងដែលចតនៅលើចិញ្ចើមផ្លូវ ។ អ្នកមីង ធីហប បាននិយាយថា៖ «ខណៈដែលភ្លើងកំពុងឆេះ មនុស្សជាច្រើនបានត្រឹមសម្លឹងមើលដោយភិតភ័យ តែមិនអាចធ្វើអ្វីបានទេ ហើយទោះបីជាអ្នកខ្លះព្យាយាមដួសទឹកជះពន្លត់ក៏មិនបានផលដែរ ព្រោះភ្លើងរាលដាលរហ័សពេក»។
ក្រោយការឆាបឆេះប្រមាណ១០នាទី ប៉ូលិសបង្ការ និងពន្លត់អគ្គិភ័យបានចល័តរថយន្តពន្លត់អគ្គិភ័យជាង១០គ្រឿង និងក្រុមសង្គ្រោះជាច្រើននាក់បានមកដល់កន្លែងកើតហេតុ ។ អ្នកពន្លត់អគ្គិភ័យបានតាមឡានកាំជណ្តើរទៅកាន់យ៉រជាន់ទី៣ ដើម្បីនាំមនុស្សយ៉ាងហោចណាស់៤នាក់ចុះមកដី ហើយបញ្ជូនពួកគេទៅបន្ទប់សង្គ្រោះបន្ទាន់ ។
ក្រុមមួយទៀតបានបន្តបាញ់ទុយោទឹកចូលទៅក្នុងផ្ទះ ដោយបាញ់ទឹកពន្លត់ភ្លើងដែលគ្របលើចិញ្ចើមផ្លូវ Pham Van Dong ។ រថយន្តសង្គ្រោះចំនួន១០គ្រឿងកំពុងរង់ចាំនៅផ្លូវ Pham Van Dong ដើម្បីដឹកជនរងគ្រោះទៅមន្ទីរពេទ្យ។
លុះដល់ម៉ោង១២និង១០នាទីព្រឹកឈានចូលថ្ងៃទី១៩ ធ្នូ ភ្លើងបានរលត់ទៅ តែមានផ្សែងហុយចេញមកវិញ ។ ប៉ូលិសពាក់ម៉ាស់ឧស្ម័នបានចូលទៅជិតផ្ទះពីទិសដៅពីរ គឺខាងមុខនិងជណ្តើរ ។ បន្ទាប់ពីប្រហែល ៤៥នាទី សាកសពយ៉ាងហោចណាស់១០នាក់ត្រូវបានរុំដោយភួយយកចេញពីផ្ទះដែលឆេះ ហើយបានតាមរថយន្តពេទ្យទៅតម្កល់នៅមន្ទីរពេទ្យចំនួន២ដែលមានចម្ងាយប្រហែល២គីឡូម៉ែត្រពីទីតាំងកើតហេតុ។
លុះដល់ម៉ោង១និង៤០នាទីទៀបភ្លឺ ការស្វែងរកជនរងគ្រោះត្រូវបានបញ្ចប់ រថយន្តសង្គ្រោះ និងរថយន្តពន្លត់អគ្គិភ័យបានដកថយ ហើយផ្ទះត្រូវបានបិទទ្វារដើម្បីស៊ើបអង្កេតមូលហេតុនៃអគ្គិភ័យ។ នៅកន្លែងកើតហេតុ ម៉ូតូប្រហែល៥គ្រឿង ដែលចតនៅចិញ្ចើមផ្លូវត្រូវឆេះខ្ទេចខ្ទីរ ចំណែករថយន្តមួយគ្រឿងត្រូវឆេះចំហៀងខាងស្តាំ និងខាងក្រោយ ។ នៅខាងក្នុងផ្ទះ គ្រឿងសង្ហារឹមទាំងអស់ត្រូវបានឆេះ សម្ភាររបស់រោងជាងមេកានិកក៏ត្រូវបានឆេះបំផ្លាញដែរ។
គេឃើញវត្តមានលោកជំទាវ Bui Thi Minh Hoai លេខាគណៈកម្មាធិការមជ្ឈិមបក្សប្រចាំទីក្រុងហាណូយ រួមទាំងមេប៉ូលិសក្រុងហាណូយ លោក Nguyen Hai Trung បានចុះទៅដឹកនាំប្រតិបត្តិការសង្គ្រោះ និងស៊ើបអង្កេត ដោយផ្ទាល់នៅទីតាំងកើតហេតុ។
នៅម៉ោង៣ទៀបភ្លឺថ្ងៃដដែល ប៉ូលិសក្រុងហាណូយបានប្រកាសថា អាជ្ញាធរបានជួយសង្គ្រោះ និងនាំមនុស្ស៧នាក់ចេញមកក្រៅ (៥នាក់ស្ថិតក្នុងស្ថានភាពស្ថិតស្ថេរ ចំណែកឯ២នាក់ស្ថិតក្នុងស្ថានភាពដង្ហើមចង្រិតដែលកំពុងសង្គ្រោះបន្ទាន់នៅបន្ទប់ICU ហើយសាកសពដែលរកឃើញសរុប មានចំនួន១១នាក់។
ចំពោះមូលហេតុនៃអគ្គិភ័យឆាប់ឆេះហាងខារ៉ាអូខេខាងលើនេះ ត្រូវបានប៉ូលិសស្រាវជ្រាវឃើញថា បង្កឡើងដោយបុរសម្នាក់ជាអ្នកចាក់សាំងដុត ហើយទីបំផុត ជនបង្កត្រូវបានប៉ូលិសចាប់ខ្លួនបានភ្លាមៗ។ ជនសង្ស័យរូបនោះបានសារភាពប្រាប់ប៉ូលិសថា គាត់បានទៅផឹកស្រាបៀរនៅខារ៉ាអូខេនេះ ហើយក៏កើតមានទំនាស់ជាមួយបុគ្គលិករហាង ទើបគាត់ទិញសាំងមកចាក់នៅជាន់ទីមួយ ហើយដុតតែម្តង។
តាមរយៈវីដេអូដែលថតជាប់ដោយកាមេរ៉ាសុវត្ថិភាពនៅកន្លែងកើតហេតុបានបង្ហាញថា នៅវេលាម៉ោង ១១ និង០១នាទីយប់ បុរសម្នាក់នោះបានយួរធុងទឹកមួយទំនងជាសាំងចុះពីលើស្ពានថ្មើរជើង ដើរសំដៅទៅកាន់ហាងខារ៉ាអូខេ ហើយប៉ុន្មានវិនាទីក្រោយមក ភ្លើងបានឆាបឆេះយ៉ាងសន្ធោសន្ធៅតែម្តង៕
ចែករំលែកព័តមាននេះ