រាជធានីភ្នំពេញ ៖ កម្លាំងនគរបាលខណ្ឌច្បារអំពៅ បានឃាត់ខ្លួនជនសង្ស័យជនជាតិវៀតណាម២នាក់ បន្ទាប់ពីធ្វើសកម្មភាពលួចផ្លាកលេខរថយន្តនៅក្នុងបុរីប៉េងហួតបឹងស្នោ ។ ប្រតិបត្តិការឃាត់ខ្លួននេះបានធ្វើឡើង កាលពីរសៀលថ្ងៃទី១៧ ខែធ្នូ ឆ្នាំ២០២៤នៅត្រង់ចំណុចមុខផ្ទះលេខ១៩៩…
រាជធានីភ្នំពេញ ៖ កម្លាំងនគរបាលខណ្ឌច្បារអំពៅ បានឃាត់ខ្លួនជនសង្ស័យជនជាតិវៀតណាម២នាក់ បន្ទាប់ពីធ្វើសកម្មភាពលួចផ្លាកលេខរថយន្តនៅក្នុងបុរីប៉េងហួតបឹងស្នោ ។
ប្រតិបត្តិការឃាត់ខ្លួននេះបានធ្វើឡើង កាលពីរសៀលថ្ងៃទី១៧ ខែធ្នូ ឆ្នាំ២០២៤នៅត្រង់ចំណុចមុខផ្ទះលេខ១៩៩ ផ្លូវP-១៥ ភូមិក្តីតាកុយ សង្កាត់វាលស្បូវ ខណ្ឌច្បារអំពៅ រាជធានីភ្នំពេញ ។ ជនរងគ្រោះឈ្មោះ សុខ ដារ៉ា ភេទប្រុស អាយុ៣០ឆ្នាំ ជនជាតិខ្មែរ មុខរបរលក់ដូរ ស្នាក់នៅផ្ទះកើតហេតុ ។
ជនសង្ស័យទាំង២នាក់មានម្នាក់ឈ្មោះ NGUYEN VAN NGHIEP ភេទប្រុស អាយុ៣៤ឆ្នាំ ជនជាតិវៀតណាម ជាបុគ្គលិកក្លិប ECL និងម្នាក់ទៀតឈ្មោះ HOANG VAN THE ភេទប្រុស អាយុ៣២ឆ្នាំ ជនជាតិវៀតណាម ជាបុគ្គលិកក្លិប ECL ដូចគ្នា ។
អ្នកទាំង២នាក់ស្នាក់នៅផ្ទះជួល៤៦ ផ្លូវD-០៤(បុរីប៉េងហួត) ភូមិស្វាយតាអុក សង្កាត់វាលស្បូវ ខណ្ឌច្បារអំពៅ ។
គួររំលឹកផងដែរថា កាលពីថ្ងៃទី១៥ ខែធ្នូឆ្នាំ២០២៤ វេលាម៉ោង១១និង៥០នាទីយប់ ជនរងគ្រោះបានចតរថយន្តម៉ាកតូយ៉ូតា ព្រូស ពណ៌ស ពាក់ផ្លាកលេខភ្នំពេញ2BN-6595 នៅមុខផ្ទះ រួចចូលសម្រាកនៅក្នុងផ្ទះ ។ ស្រាប់តែជនសង្ស័យ២នាក់ខាងលើ ជិះរថយន្តម៉ាក LEXUS-GS ពណ៌ស ពាក់ផ្លាកលេខព្រះសីហនុ 2D-8699 មកឈប់ក្បែរ រួចយកទួណឺវីស លួចដោះផ្លាកលេខរថយន្តជនរងគ្រោះខាងមុខ រួចគេចខ្លួនបាត់ស្រមោល តែពួកគេគេចមិនផុតពីកាមេរ៉ាសុវត្ថិភាពឡើយ ។
ទីបំផុត រហូតដល់ថ្ងៃទី១៧ ខែធ្នូ ឆ្នាំ២០២៤ ម៉ោង៣និង៣០នាទីរសៀល សមត្ថកិច្ចឃាត់ខ្លួនបានជនសង្ស័យទាំង២នាក់ខាងលើ រួមនិងវត្ថុតាងផ្លាកលេខរថយន្ត ១គូ (ភ្នំពេញ 2BN-6595 របស់ជនរងគ្រោះ) និងរថយន្តមួយគ្រឿង ម៉ាកLEXUS-GS ពណ៌ស(ជិះធ្វើសកម្មភាព) រួមនឹងវត្ថុតាងមួយចំនួនទៀតបញ្ជូនមកអធិការដ្ឋាននគរបាលខណ្ឌច្បារអំពៅ ចាត់ការតាមច្បាប់ ៕
ចែករំលែកព័តមាននេះ