រាជធានីភ្នំពេញ ៖ លោក ឃួង ស្រេង សមាជិកគណៈកម្មាធិការកណ្តាលគណបក្សប្រជាជនកម្ពុជា ប្រធានគណៈកម្មាធិការគណបក្សរាជធានីភ្នំពេញ និងជាប្រធានក្រុមការងារ ចុះមូលដ្ឋានខណ្ឌព្រែកព្នៅ បានជំរុញអោយមន្ត្រីគណបក្សប្រជាជន…
រាជធានីភ្នំពេញ ៖ លោក ឃួង ស្រេង សមាជិកគណៈកម្មាធិការកណ្តាលគណបក្សប្រជាជនកម្ពុជា ប្រធានគណៈកម្មាធិការគណបក្សរាជធានីភ្នំពេញ និងជាប្រធានក្រុមការងារ ចុះមូលដ្ឋានខណ្ឌព្រែកព្នៅ បានជំរុញអោយមន្ត្រីគណបក្សប្រជាជន យកចិត្តទុកដាក់មើលថែ សមាជិកបក្ស និងប្រជាពលរដ្ឋនៅក្នុងមូលដ្ឋាន ដោយត្រូវចុះពិនិត្យមើល ទាំងជីវភាព និងហេដ្ឋារចនាសម្ព័ន្ធទាំងអស់ នៅក្នុងមូលដ្ឋាន បើមានការខូចខាត ត្រូវជួសជុលស្តារឡើងវិញ ។
ការជំរុញបែបនេះរបស់លោក ឃួង ស្រេង បានធ្វើឡើងនាព្រឹកថ្ងៃទី៣០ ខែវិច្ឆិកា ឆ្នាំ២០២៤ ក្នុងកិច្ចប្រជុំប្រចាំខែ គណបក្សចុះមូលដ្ឋានខណ្ឌព្រែកព្នៅ នៅទីស្នាក់ការបក្សខណ្ឌ នៅទីស្នាក់ការមន្ទីរគណបក្ស ខណ្ឌព្រែកព្នៅ ។
លោក ឃួង ស្រេង បានមានប្រសាសន៍លើឡើងថា មន្ត្រីបក្សរបស់យើងទាំងអស់ ត្រូវយកចិត្តទុកដាក់មើលថែ សមាជិកបក្ស និងប្រជាពលរដ្ឋនៅក្នុងមូលដ្ឋាន ពោលគឺនៅពេលពួកគាត់មានបញ្ហាអ្វីមួយ ត្រូវដោះស្រាយជួយពួកគាត់ភ្លាម! ដូចជាការដោះស្រាយបញ្ហាទឹកលិច និងការផ្តល់ស្បៀងអាហារជាដើម។ បន្ថែមពីនេះ មន្ត្រីបក្សរបស់យើង ក៏ត្រូវចុះពិនិត្យមើលហេដ្ឋារចនាសម្ព័ន្ធ នៅក្នុងមូលដ្ឋានផងដែរ ទាំងប្រឡាយទឹក លូទឹក ផ្លូវ បង្គោលភ្លើងបំភ្លឺសាធារណៈ ជាដើម បើមានការខូចខាត ត្រូវជួសជុលស្តារឡើងវិញ។ មន្ត្រីបក្សរបស់យើង ត្រូវពង្រឹងប្រព័ន្ធផ្សព្វផ្សាយអោយបានខ្លាំងក្លា និងវាយបកអោយបានទាន់ពេលវេលា ពិសេសប្រសាសន៍ថ្នាក់ដឹកនាំប្រទេស ត្រូវបន្តផ្សព្វផ្សាយភ្លាមៗ ដើម្បីអោយសមាជិក និងប្រជាពលរដ្ឋ បានទទួលព័ត៌មានភ្លាមៗ ។ មិនមែន គណបក្សប្រជាជនកម្ពុជាឈ្នះ នៃការបោះឆ្នោត ផ្លូកទឹក ផ្លូកដីហើយ លែងដៃចោលនោះទេ។ ត្រូវក្តាប់អោយបានពីចលនារបស់បក្សប្រឆាំងជ្រុលនិយម និងក្តាប់សន្តិអារម្មណ៍ប្រជាពលរដ្ឋអោយបាន ហើយជម្រាបពួកគាត់អោយបានយល់ជាមួយការផ្តល់ក្តីសង្ឃឹម ជូនពួកគាត់ ពិសេសចលនាពួកគាត់អោយបានយល់ច្បាស់ពីការដឹកនាំរបស់សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងជាប្រធានព្រឹទ្ធសភា នៃព្រះរាជាណាចក្រកម្ពុជា និងសម្តេចមហាបវរធិបតី ហ៊ុន ម៉ាណែត អនុប្រធាន គណបក្សប្រជាជនកម្ពុជា និងជានាយករដ្ឋមន្ត្រី នៃព្រះរាជាណាចក្រកម្ពុជា ។
លោក ឃួង ស្រេង បន្តថា គណបក្សប្រជាជនកម្ពុជា ត្រូវទទួលបានជ័យជំនះរហូត ដើម្បីអោយប្រទេសកម្ពុជារក្សា បានសន្តិភាព ដែលជាឱកាស អភិវឌ្ឍន៍ប្រទេស អោយកាន់តែរីកចម្រើន ពិសេស សម្រេចបាននូវចក្ខុវិស័យរបស់ខ្លួន ប្រែក្លាយកម្ពុជា មានចំណូលមធ្យមកំរិតខ្ពស់នៅឆ្នាំ២០៣០ និងចំណូលខ្ពស់ នៅឆ្នាំ២០៥០ ខាងមុខ ។
លោក ធឹម សំអាន សមាជិកគណៈកម្មាធិការគណបក្សរាជធានីភ្នំពេញ និងជាប្រធានគណៈកម្មាធិការគណបក្សខណ្ឌព្រែកព្នៅ ក្នុងឱកាសនោះ ក៏បានរាយការណ៍ពីរចនាសម្ព័ន្ធ គណបក្សខណ្ឌ ដែលមានសាខាបក្ស សង្កាត់ ចំនួន៥ និងសាខាភូមិ ចំនួន៦៩។ បានចលនា កសាងសមាជិកបក្សថ្មី បានចំនួន៦១នាក់ ។
លោកបន្តថា នារដូវវស្សាកន្លងមកនេះមានសង្កាត់មួយចំនួន នៅក្នុងមូលដ្ឋានខណ្ឌព្រែកព្នៅ បានទទួលរងនូវការជន់លិច ដោយជំនន់ទឹកភ្លៀង ដែលហូរមកពីខេត្តកំពង់ស្ពឺ តែបញ្ហានេះយើងបានចាត់វិធានការភ្លាមៗ ជាមួយនឹងការចុះជួប សួរសុខទុក្ខនិងយកអំណោយទៅចែកជូនពួកគាត់ ៕
ចែករំលែកព័តមាននេះ