ខេត្តពោធិ៍សាត់ ៖ តេជោកែវវិជ័យបារមីចៅសែនអើយ អ្នកពិតជាគួរឲ្យស្រណោះ និងអាណិតអាសូរខ្លាំងណាស់ ត្បិតអ្នកទទួលបានចំណាត់ថ្នាក់លេខ១ ទូទាំងប្រទេសក៏ពិតមែន ប៉ុន្តែឆ្នាំនេះអ្នកធ្វើការធ្ងន់ណាស់ ។ ទូកងតេជោកែវវិជ័យបារមីចៅសែន…
ខេត្តពោធិ៍សាត់ ៖ តេជោកែវវិជ័យបារមីចៅសែនអើយ អ្នកពិតជាគួរឲ្យស្រណោះ និងអាណិតអាសូរខ្លាំងណាស់ ត្បិតអ្នកទទួលបានចំណាត់ថ្នាក់លេខ១ ទូទាំងប្រទេសក៏ពិតមែន ប៉ុន្តែឆ្នាំនេះអ្នកធ្វើការធ្ងន់ណាស់ ។
ទូកងតេជោកែវវិជ័យបារមីចៅសែន មិនត្រឹមតែទ្រុតទ្រោមរូបរាងកាយប៉ុណ្ណោះទេ ប៉ុន្តែទូកងតំណាងខេត្តពោធិ៍សាត់មួយនេះ រងការរិះគន់យ៉ាងខ្លាំង ពីមហាជន អ្នកស្នេហាវិស័យទូកងខ្មែររឿងចំណាត់ថ្នាក់លេខ១ ទូទាំងប្រទេស ។ ជាការពិតណាស់ បើយោងតាមហ្វេសប៊ុកផេកផ្លូវការរបស់ទូកង តេជោកែវវិជ័យបារមីចៅសែន ខេត្តពោធិ៍សាត់ បានបង្ហោះវីដេអូបង្ហាញពីសភាពទ្រុមទ្រោមរបស់ទូកងមួយនេះ រួចពោលយ៉ាងកំសត់ ស្ដាប់ហើយពិតជាអាសូរ និងស្រណោះជាពន់ពេក ។
យោងតាមសម្រង់សម្ដីរបស់ចំណុះទូក ចៅសែន បានឲ្យដឹងថា «នៅក្នុងឆ្នាំនេះ ចៅសែន ទទួលរងការវា.យប្រហារ និងរិះគន់យ៉ាងខ្លាំងពីសំណាក់បងប្អូនប្រជាពលរដ្ឋក៏ដូចជា អ្នកគាំទ្រមួយចំនួនដោយមិននឹកស្មានដល់ថា រឿងទៅជាបែបនឹងទាំងដែលបងប្អូនមួយចំនួនមិនទាន់បានទស្សនាក៏ដូចជា បានពិនិត្យមើលទៅលើនាទីផ្ទៀងផ្ទាត់នៅក្នុងថ្ងៃ៣» ។
ប្រភពខាងលើបន្តថា «សម្រាប់ ចៅសែន នៅក្នុងឆ្នាំនេះ គឺមានបញ្ហាច្រើន ទាំងដែលមានគេមកបុកចៅសែន នៅក្នុងថ្ងៃទី២ ធ្វើឲ្យត្រូវភ្នែកទូកងខាងឆ្វេងបន្តិច ហើយនិងសក់ទូក គឺបានដាច់ ហើយមានការប្រេះស្រាំជាច្រើនទាំងប៉ាក្រាបក៏ដូចជា ទៅលើខ្នងទូកជាដើម» ។
ប្រភពពីហ្វេសប៊ុកផេកខាងលើ បានបន្តពោលថា «តែទោះជាយ៉ាងណា ចៅសែន នៅតែមិនខឹងសម្បារទៅលើបងប្អូននោះដែរ គឺមានតែនៅស្ងៀមឲ្យបងប្អូនបញ្ចេញមតិទៅតាមការមើលឃើញ ឬនឹកឃើញរបស់បងប្អូនទៅចុះ ប៉ុន្តែធាតុពិតជាក់ស្ដែង មានតែចំណុះទាំង២ ទូក ក៏ដូចជា គណកម្មការរៀបចំកម្មវិធីទើបដឹង និងច្បាស់ ហើយយល់ពីរឿងនឹងហើយខាងចំណុះចៅសែន ក៏មិនមានវីដេអូបកស្រាយទៅកាន់បងប្អូនដែរ ព្រោះនេះជាការរៀបចំរបស់គណកម្មការទៅលើការវាស់ស្ទង់ផេរៈវេលាទូនីមួយៗតែប៉ុណ្ណោះ» ។
ម្ចាស់ផេកទូកងមួយនេះ បានថ្លែងបញ្ហាញក្ដីស្រលាញ់ទៅកាន់អ្នកគាំទ្រ និងចំណុះទូកទាំងអស់យ៉ាងដូច្នេះថា «ជាចុងក្រោយចំណុះរបស់ទូកងតេជោកែវវិជ័យបារមីចៅសែន ខេត្តពោធិ៍សាត់ ចង់ប្រាប់អ្នកទាំងអស់គ្នាថា ស្រលាញ់អ្នកទាំងអស់គ្នា មិនរើសអើង មិនស្អប់ខ្ពើមទៅលើចំណុះណាមួយឡើយ ជួបគ្នានៅពេលក្រោយទៀត អរគុណ ជម្រាបលា សូមជូនពរសំណាងល្អទាំងអស់គ្នា» ។
ដោយឡែក ក្រឡេកមកកាន់មតិបងប្អូនមហាជន អ្នកគាំទ្រវិញក៏បានបញ្ចេញមតិយ៉ាងព្រោងព្រាត នៅក្នុងវីដេអូមួយនេះដោយប្រិយមិត្តអ្នកគាំទ្រមួយរូបបានលើកឡើងថា ខ្ញុំពិតជាមិនយល់ ហើយមានចម្ងល់ខ្លាំងណាស់ តើចង់ឈ្នះចាញ់គ្នាធ្វើអ្វី បើជាខ្មែរដូចតែគ្នា ទូកងណាឈ្នះក៏ឈ្នះទៅ ព្រោះគ្រប់ទូកងដែលចូលរួមប្រកួតទាំងអស់ គឺសុទ្ធតែជាទូកងរបស់ខ្មែរដូចគ្នា គ្មានអ្វីខាតបង់ឡើយ ណាមួយការប្រារព្ធពិធីបុណ្យអុំទូកនេះឡើង គឺដើម្បីគោរព និងជាការរំលឹក និងថែរក្សានៅមរតកប្រពៃណីទំនៀមទម្លាប់របស់ដូនតាខ្មែរ ដែលមានតាំងពីបុរាណកាលមកក៏ដូចធ្វើឡើង ដើម្បីបង្កលក្ខណៈសប្បាយរីករាយជូនបងប្អូនប្រជាពលរដ្ឋខ្មែរ និងជាការទាក់ទាញភ្ញៀវទេសចរជាតិ និងអន្តរជាតិប៉ុណ្ណោះ ។
បងប្អូនខ្លះទៀតបានពោលថា តេជោកែវវិជ័យបារមីចៅសែនអើយ អ្នកពិតជាគួរឲ្យស្រណោះ និងអាណិតអាសូរ្យខ្លាំងណាស់ ត្បិតអ្នកទទួលបានចំណាត់ថ្នាក់លេខ១ ទូទាំងប្រទេសក៏ពិតមែន ប៉ុន្តែឆ្នាំនេះអ្នកធ្វើការធ្ងន់ណាស់ មិនត្រឹមទ្រុតទ្រោមរូបរាងកាយទេ ប៉ុន្តែអ្នកទទួលរងការរិះគន់យ៉ាងខ្លាំង សូមចិត្តបងប្អូនបើកចិត្តឲ្យទូលាយ និងរៀនទទួលយកការពិតផង មួយទៀតទូកងណាឈ្នះក៏ជាទូកងរបស់ខ្មែរដែរ តើចាញ់ឈ្នះគ្នាដើម្បីអ្វី ។
អ្នកគាំទ្រឯទៀតពោលថា «សូមបងប្អូនបញ្ឈប់ការវែកញែក និងដាក់បន្ទុកទៅលើទូកលេខ១ទៀតទៅ ព្រោះនេះជាការសម្រេចរបស់គណកម្មការទៅលើផេរៈវេលា ណាមួយបុណ្យអុំទូកក៏បានបញ្ចប់ទៅហើយដែរ ហើយទូកណាជាអ្នកទទួលជ័យជម្នះក៏យើងត្រូវតែសប្បាយចិត្ត និងទទួលយកទៅ ព្រោះសុទ្ធតែជាទូកងរបស់ខ្មែរសុទ្ធតែជាកូនចៅនៃមហាគ្រួសារខ្មែរដូចតែគ្នានោះទេ ៕ អត្ថបទ៖ រៀម រ៉ាន់
ចែករំលែកព័តមាននេះ