នេះបានហៅថា ជើងខ្លាំងលាក់មុខមែន ! ស្ងាត់ៗមិនល្បីដូចទូកងដទៃ តែទូកងតេជោកែវវិជ័យ បារមីចៅសែន ខេត្តពោធិ៍សាត់ បានធ្វើឲ្យមហាជនអ្នកគាំទ្រភ្លឺភ្នែក ស្រឡាំងកាំង និងស្ទើរតែមិននឹកស្មានដល់ឡើយ…
នេះបានហៅថា ជើងខ្លាំងលាក់មុខមែន ! ស្ងាត់ៗមិនល្បីដូចទូកងដទៃ តែទូកងតេជោកែវវិជ័យ បារមីចៅសែន ខេត្តពោធិ៍សាត់ បានធ្វើឲ្យមហាជនអ្នកគាំទ្រភ្លឺភ្នែក ស្រឡាំងកាំង និងស្ទើរតែមិននឹកស្មានដល់ឡើយ ។
ទូកងខេត្តពោធិ៍សាត់មួយនេះ បានក្លាយជាម្ចាស់ជើងឯក ជាប់ចំណាត់ថ្នាក់លេង១ ជាទូកង ដែលមានល្បឿនលឿនជាងគេទូទាំងប្រទេសកម្ពុជានៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ២០២៤ ។
ទន្ទឹមនឹងចំណាត់ថ្នាក់លេខ១ ក្នុងឆ្នាំ២០២៤នេះ តែបើងាកមកចាប់អារម្មណ៍ប្រវត្តិខ្លះៗរបស់ទូកង តេជោកែវវិជ័យ បារមីចៅសែន ខេត្តពោធិ៍សាត់ គឺកាន់តែមិនធម្មតា និងកាន់តែញាក់សាច់ថែមមួយកម្រិតទៀត ហើយមិនខុសពីពាក្យគេនិយាយថា អ្នកខ្លាំងមិនល្បី មិនមានអំនួតឡើយ តែស្ងាត់ៗចេញលទ្ធផលឲ្យមើលតែម្ដង ។
តស់ចង់ដឹងអត់ តើជើងខ្លាំងចំណាត់ថ្នាក់លេខ១ ផ្នែកល្បឿនទូទាំងប្រទេស ទូកង តេជោកែវវិជ័យ បារមីចៅសែន ខេត្តពោធិ៍សាត់ មានប្រវត្តិយ៉ាងណាខ្លះ ?
ថ្ងៃនេះក្រុមការងារសារព័ត៌មានកោះសន្តិភាព និងធ្វើការលើកយកមកជម្រាបលម្អិតជូនប្រិយមិត្តអ្នកគាំទ្រឲ្យបានជ្រាបដូចខាងក្រោម ។ បើយោងតាមវីដេអូ រូបភាព និងសំណេរនៅលើបណ្ដាញសង្គម តាមរយៈហ្វេសប៊ុកផេកផ្លូវការរបស់ឯកឧត្ដម ខូយ រីដា អភិបាលនៃគណៈអភិបាលខេត្តពោធិ៍សាត់ និងផេកផ្លូវការ ទូកងតេជោកែវវិជ័យ បារមីចៅសែន បានបង្ហាញពីប្រវត្តិខ្លះឲ្យមហាជនបានដឹង បន្ទាប់ពីម្សិលមិញនេះ ទូកង តេជោកែវវិជ័យ បារមីចៅសែន រួមទាំងពានផ្នែកល្បឿនលឿនទូទាំងប្រទេសកម្ពុជាក្នុងឆ្នាំ២០២៤ បានដង្ហែចេញពីរាជធានីភ្នំពេញ ទៅកាន់ទឹកដីកំណើតខេត្តពោធិ៍សាត់វិញ ។
យ៉ាងណាមិញ បើតាមប្រភពទាំង២ខាងលើ បានជម្រាបជូនពីប្រវត្តិខ្លះៗរបស់ទូកងតេជោកែវវិជ័យ បារមីចៅសែន ខេត្តពោធិ៍សាត់ ឲ្យប្រិយមិត្តអ្នកគាំទ្របានដឹង ដោយគិតតាមឆ្នាំនីមួយៗចាប់ពីឆ្នាំ២០១៤ រហូតដល់ឆ្នាំ២០២៤ បច្ចុប្បន្ននេះ ។ នៅឆ្នាំ២០១៤ ទូកងតេជោកែវវិជ័យ បារមីចៅសែន ទទួលបានពាន ចំនួន១ គឺពានផែនលេខ១ ទូកអុំបុរស ។ ក្នុងឆ្នាំ២០១៦ ជើងខ្លាំងលាក់មុខទូកងខេត្តពោធិ៍សាត់ ទទួលបានពានចំនួន១ទៀត គឺពានផែនលេខ១ ទូកអុំបុរសដូចគ្នា ។
រីឯនៅក្នុងឆ្នាំ២០១៩ ទទួលបានពានចំនួន១បន្ថែមទៀត គឺពានផែនលេខ១ ទូកអុំបុរស ដូចគ្នាទៅ និងឆ្នាំ២០១៤ និងឆ្នាំ២០១៦ រួមទាំងទទួលបានចំណាប់ថ្នាក់លេខ៤ផងដែរ ។ ដោយឡែកក្នុងឆ្នាំ២០២៣ ទទួលបានពានចំនួន២ គឺពានផែនលេខ១ ទូកអុំបុរស និងពានទូកសោភ័ណភាព រួមទាំងទទួលបានចំណាប់ថ្នាក់លេខ៩ ។
សូមបញ្ជាក់ផងដែរថា ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ២០២៤ ទូកងគូពិសេស ដែលមានល្បឿនលឿនជាងគេចំនួន៣ ទូទាំងប្រទេសកម្ពុជា ចំណាត់ថ្នាក់លេខ១ បានទៅលើទូកងតេជោកែវវិជ័យ បារមីចៅសែន ខេត្តពោធិ៍សាត់ ។ ចំណាត់ថ្នាក់លេខ២ បានទៅលើទូកង សារាយតេជោសែនជ័យ ខេត្តកណ្ដាល ។ ចំណាត់ថ្នាក់លេខ៣ បានទៅលើទូកង កោះកេរធិបតី ខេត្តព្រះវិហារ ៕ អត្ថបទ៖ រៀម រ៉ាន់
ចែករំលែកព័តមាននេះ