ខេត្តសៀមរាបះ ពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ក្នុងខេត្តសៀមរាប រយៈពេលពីរថ្ងៃ ត្រូវបានបញ្ចប់ដោយជោគជ័យ ខណៈក្នុងពិធីនេះ ទទួលបានភ្ញៀវទេសចរជាតិ…
ខេត្តសៀមរាបះ ពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ក្នុងខេត្តសៀមរាប រយៈពេលពីរថ្ងៃ ត្រូវបានបញ្ចប់ដោយជោគជ័យ ខណៈក្នុងពិធីនេះ ទទួលបានភ្ញៀវទេសចរជាតិ អន្តរជាតិ ចំនួន ប្រមាណជាង ២៧ម៉ឺននាក់បានចូលមកកម្សាន្ត ។
នៅក្នុងពិធីបិទកម្មវិធីប្រណាំទូក នាល្ងាចថ្ងៃទី១៥ ខែវិច្ឆិកា ឆ្នាំ២០២៤នេះ ក្រោមអធិបតីភាព លោក លី សំរិទ្ធ ប្រធានក្រុមប្រឹក្សាខេត្តសៀមរាប លោក ប្រាក់ សោភ័ណ អភិបាលនៃគណៈអភិបាលខេត្ត និង លោកជំទាវ ដោយមានវត្តមានដ៏ខ្ពង់ខ្ពស់អញ្ជើញចូលរួមពី លោក ប្រាក់ សុខុន អនុប្រធានទី១ ព្រឹទ្ធសភា នៃព្រះរាជាណាចក្រកម្ពុជា និង វត្តមានរបស់លោក អាន ទ្រេ ផាសត្រាណា អារ៉ាហ្គូ ប្រធានអង្គការ លោកជំទាវបណ្ឌិត ហ្សូហ្សា ណា រ៉ាហូ (Zsuzsanna RAHOI) ទីប្រឹក្សានយោបាយជាន់ខ្ពស់នាយករដ្ឋមន្ត្រីហុងការីលោក ទីប៊ឺ បាឡូឌី (Tiber Baloghdi) អគ្គរដ្ឋទូតហុងការីប្រចាំប្រទេសកម្ពុជា វៀតណាម ឡាវ ។
មានប្រសាសន៍បិទការប្រណាំងទូកនោះដែរ លោក លី សំរិទ្ធ ប្រធានក្រុមប្រឹក្សាខេត្ត បានបញ្ជាក់ថា ទោះបីជាថ្ងៃបញ្ចប់នៃការប្រណាំងទូក ប៉ុន្តែពិធីបុណ្យអុំទូក បណ្តែតប្រទីប និង សំពះព្រះខែ អកអំបុក ខេត្តសៀមរាបឆ្នាំ២០២៤ ក៏នៅមានកម្មវិធីកម្សាន្តសប្បាយរយៈពេលមួយថ្ងៃទៀត ដល់ថ្ងៃទី១៦ ខែ វិច្ឆិកា ឆ្នាំ២០២៤។
លោក បានបន្តថា ក្នុងរយៈពេលពីរថ្ងៃនេះ ភ្ញៀវទេសចរជាតិ អន្តរជាតិ និងបងប្អូនប្រជាពលរដ្ឋមកចូលរួមទស្សនាកម្សាន្តក្នុងឱកាសនៃព្រះរាជពិធីបុណ្យអុំទូកមានចំនួនប្រមាណជាង ២៧ម៉ឺននាក់ ក្នុងនោះភ្ញៀវអន្តរជាតិមានចំនួន ៨ពាន់៩៨២នាក់ បើប្រៀបធៀបនឹងរយៈពេលដូចគ្នាឆ្នាំ ២០២៣ កើនឡើង ១៣,១ភាគរយ ។
លោក ក៏បានថ្លែកោតសរសើរ ចំពោះ អនុគណៈកម្មការរៀបចំពិធីទាំង៧ ក្នុងការរៀបចំ ពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ព្រមទាំងថ្នាក់ ដឹកនាំនៃរដ្ឋបាលក្រុង ស្រុក មន្ទីរ អង្គភាពជុំវិញ ខេត្ត ដែលបានរៀបចំទូក “ង” ចូល រួមក្នុងការប្រកួត ហើយបានខិតខំប្រឹង ប្រែងដោយស្មារតីយកចិត្តទុកដាក់ខ្ពស់របស់ខ្លួនយ៉ាងសកម្ម ប្រកបដោយការ ទទួលខុសត្រូវ និងធ្វើឱ្យដំណើរការទូទៅក្នុងពិធីបុណ្យអុំទូកនេះ ទទួលបានលទ្ធ ផលជាផ្លែផ្កាទៅតាមផែនការគួរជាទី មោទនភាព ។
ក្នុងនោះ លោក ក៏បានថ្លែង អំណរ គុណចំពោះ ឯកឧត្តម លោកជំទាវ អ្នក ឧកញ៉ា លោកស្រី អស់លោក ដែលបានចែករំលែកនូវធនធានផ្ទាល់ខ្លួនធ្វើ អំណោយឧបត្ថម្ភដោយទឹកចិត្តសប្បុរសថ្លៃថ្លាជូនចំពោះគណៈ-កម្មការរៀបចំពិធី និង ជូនដល់កីឡាករ កីឡាការិនីដោយផ្ទាល់ ដែលជាវប្បធម៌ចែករំលែក នៃមហា សាមគ្គីភាពគ្រួសារខ្មែរ ។ ក្នុងនោះ លោក លី សំរិទ្ធ ក៏បានធ្វើការផ្តាំផ្ញើដល់ក្រុមកីឡាករ កីឡាការិនីទូកទាំងអ្នកឈ្នះ និង អ្នកមិនមានចំណាត់ថាក់ ត្រូវបន្តការហ្វឹក ហាត់បច្ចេកទេសរបស់ខ្លួនបន្តទៀត ដើម្បីត្រៀមលក្ខណៈចូលរួមប្រកួននៅឆ្នាំបន្ត ឬក៏ក្នុងពិធីផ្សេងៗផងដែរ ។ ម្យ៉ាងទៀត ចំពោះអ្នកទទួលបានចំណាត់ថ្នាក់ ក៏មិនត្រូវមានមោទនភាពនៃជ័យជំនះរបស់ខ្លួនក្នុងឆ្នាំនេះដែរ ក៏ត្រូវបង្កើនសមត្ថភាពបច្ចេក ទេសរបស់ខ្លួនបន្តទៀតផង ។
សូមជម្រាបផងដែរថា ចំពោះកិច្ចការងារថែរក្សាសន្តិសុខ សណ្តាប់ធ្នាប់ របៀបរៀប រយសាធារណៈ ក្នុងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នៅខេត្តសៀមរាបនេះ បានប្រព្រឹត្តបានល្អប្រសើរ ដោយគ្មានគ្រោះ ថ្នាក់ចរាចរណ៍ គ្មានការប៉ះទង្គិចដោយអំពើហិង្សា អំពើឆក់ ប្លន់ និងបាតុភាព អវិជ្ជមានផ្សេងៗណាមួយគួរឲ្យកត់សម្គាល់ឡើយ។
ក្នុងនោះ ស្ថានភាពអនាម័យបរិ ស្ថាន ក៏មានសភាពល្អប្រសើរជាងពេលមុនៗ ដោយនៅទីសាធារណៈ និងជុំវិញទីតាំងប្រារព្ធពិធី ក៏ដូចជាតាមបណ្តោយដងស្ទឹងសៀមរាប មានការថយចុះនូវការបោះចោលសម្រាម និងកាកសំណល់ផ្សេងៗពីបងប្អូនប្រជាពលរដ្ឋ អ្នកទេស ចរណ៍ ដែលមកទស្សនាកម្សាន្តក្នុងពិធីប្រណាំងទូក ដែលបញ្ជាក់ឲ្យឃើញថា ការយល់ដឹងពីផលប្រយោជន៍នៃការថែរក្សាបរិស្ថាន អនាម័យរបស់បងប្អូនប្រជាពលរដ្ឋយើងមានការកើនឡើង៕
ចែករំលែកព័តមាននេះ