រាជធានីភ្នំពេញ ៖ ឃ្លាំងស្តុកម៉ាស៉ីនដេរមួយកន្លែង ត្រូវបានភ្លើងឆាបឆេះ បង្កឲ្យមានការភ្ញាក់ផ្អើលដល់អាជ្ញាធរ និងសមត្ថកិច្ចចេញអន្តរាគមន៍ ហើយរថយន្តពន្លត់អគ្គិភ័យច្រើនគ្រឿង ក៏បានចេញទៅអន្តរាគមន៍ភ្លាមៗដែរ ។ ប៉ុន្តែបាញ់ទឹកអស់ត្រឹមតែ១រថយន្តប៉ុណ្ណោះ…
រាជធានីភ្នំពេញ ៖ ឃ្លាំងស្តុកម៉ាស៉ីនដេរមួយកន្លែង ត្រូវបានភ្លើងឆាបឆេះ បង្កឲ្យមានការភ្ញាក់ផ្អើលដល់អាជ្ញាធរ និងសមត្ថកិច្ចចេញអន្តរាគមន៍ ហើយរថយន្តពន្លត់អគ្គិភ័យច្រើនគ្រឿង ក៏បានចេញទៅអន្តរាគមន៍ភ្លាមៗដែរ ។ ប៉ុន្តែបាញ់ទឹកអស់ត្រឹមតែ១រថយន្តប៉ុណ្ណោះ ភ្លើងក៏រលត់ទៅវិញ មិនបានឆេះរាលដល់កន្លែងផ្សេង ឬ បង្កឲ្យមានមនុស្សណាម្នាក់រងរបួសនោះឡើយ ។
ហេតុការណ៍ខាងលើនេះបានបង្កការភ្ញាក់ផ្អើលកើតឡើង កាលពីវេលាម៉ោង១០និង១០នាទីព្រឹកថ្ងៃទី១៤ ខែវិច្ឆិកា ឆ្នាំ២០២៤ ស្ថិតនៅក្នុងភូមិទួលកី សង្កាត់ភ្លេីងឆេះរទេះ ខណ្ឌកំបូល រាជធានីភ្នំពេញ ។
កងប្រតិបត្តិការរុករកនិងសង្គ្រោះគ្រោះមហន្តរាយ៧១១ កងពលតូចលេខ៧០បានប្រាប់ឲ្យដឹងថា អគ្គិភ័យនេះបានកើតឡើង បណ្តាលមកពីឆ្លងចរន្តអគ្គិសនី ហើយឃ្លាំងស្តុកម៉ាស៊ីនដេរដែលត្រូវភ្លើងឆេះនោះមានទំហំ១០ម៉ែត្រគុណ៤០ម៉ែត្រ ដោយបានបណ្ដាលឲ្យខូចខាតគ្រឿងជួសជុលម៉ាស៉ីនដេរអស់១បន្ទប់ ប៉ុន្តែអត់ដឹងថាទំហំនៃការខូចខាតនោះគិតជាប្រាក់ប៉ុន្មាននោះទេ ។
ប្រភពដែលបានប្រាប់ឲ្យដឹងបន្តទៀតថា ខណៈនោះបានបង្កឲ្យមានការភ្ញាក់ផ្អើលដល់អាជ្ញាធរ និងសមត្ថកិច្ច ព្រមទាំងប្រជាពលរដ្ឋ ហើយភ្លាមៗនោះកងប្រតិបត្តិការរុករកនិងសង្គ្រោះគ្រោះមហន្តរាយ៧១១ កងពលតូចលេខ៧០ ។ បានបញ្ចេញរថយន្តពន្លត់អគ្គិភ័យចំនួន០៤គ្រឿង និងរថយន្តដឹកឧបករណ៌សម្ភារៈ០១គ្រឿង សហការណ៍ជាមួយរថយន្តពន្លត់អគ្គិភ័យដែលប្រចាំការនៅសាលាខណ្ឌកំបូល ។ ចេញទៅពន្លត់ហើយបាញ់ទឹក១សុីទែនក៏រលត់ទៅវិញ ពុំបានឆេះរាលដល់លំនៅដ្ឋានប្រជាពលរដ្ឋ ឬ មានគ្រោះថ្នាក់ដល់មនុស្សណាម្នាក់នោះឡើយ ៕
ចែករំលែកព័តមាននេះ