ទីក្រុងតេអេរ៉ង់៖ បន្ទាប់ពីទទួលដំណឹងថាលោកត្រាំឈ្នះឆ្នោតក្លាយជាប្រធានាធិបតីអាមេរិកនៅអាណត្តិថ្មី អ៊ីរ៉ង់មិនបានផ្ញើសារអបអរសាទរទេ ប៉ុន្តែក៏មិនសូវហ៊ានប្រើសម្ដីខ្លាំងប៉ុន្មានដែរ។ រដ្ឋាភិបាលទីក្រុងតេអេរ៉ង់គ្រាន់តែសង្ឃឹមថាអាមេរិកចេះកែខ្លួន ហើយនឹងពិនិត្យមើលនយោបាយការបរទេសរបស់ខ្លួនឡើងវិញដែលអ៊ីរ៉ង់ចាត់ទុកថាជានយោបាយខុសឆ្គង។
កាលពីពេលកាន់អំណាចអាណត្តិមុន (អំឡុងឆ្នាំ២០១៧-២០២១) លោកត្រាំធ្លាប់ផ្ដល់មេរៀនដ៏ល្វីងជូរចត់សម្រាប់អ៊ីរ៉ង់ម្ដងហើយ។ កាលនោះ លោកបានដាក់សម្ពាធដល់កម្រិតកំពូលទៅលើរបបនេះ។ ដូច្នេះ អ្នកនាំពាក្យក្រសួងការបរទេសអ៊ីរ៉ង់ថ្លែងថាយើងធ្លាប់មានបទពិសោធជូរចត់ណាស់ជាមួយនយោបាយរបស់រដ្ឋាភិបាលអាមេរិកជាច្រើនសម័យកាលកន្លងមកហើយកាលពីអតីតកាល។ ជ័យជម្នះរបស់លោកត្រាំលើកនេះជាឱកាសកែសម្រួលនយោបាយខុសឆ្គងទាំងនោះឡើងវិញ។
អ៊ីរ៉ង់ និងអាមេរិកក្លាយជាសត្រូវនឹងគ្នាចាប់តាំងពីឆ្នាំ១៩៧៩នៅពេលអ៊ីរ៉ង់ធ្វើបដិវត្តឥស្លាមផ្ដួលរំលំរបបរាជានិយមដែលលម្អៀងទៅខាងក្រុមបស្ចិមប្រទេស។ ទំនាស់នេះឈានដល់ដំណាក់កាលស្រួចស្រាល់បំផុតនៅពេលលោកត្រាំឡើងកាន់អំណាចកាលពីអំឡុងឆ្នាំ២០១៧-២០២១។ កាលពីមុនពេលដឹងថាលោកត្រាំឈ្នះឆ្នោតនៅអាណត្តិថ្មី អ៊ីរ៉ង់ធ្វើជាមិនចាប់អារម្មណ៍នឹងការបោះឆ្នោតនេះទេដោយចាត់ទុកថាជារឿងមិនសំខាន់។
ប្រហែលជាអ៊ីរ៉ង់រង់ចាំអ៊ុតលទ្ធផលឆ្នោតសិន មុននឹងធ្វើអត្ថាធិប្បាយ ព្រោះមិនដឹងថាលោកស្រីហារីស ឬលោកត្រាំនឹងទទួលជ័យជម្នះ។ អ្នកនាំពាក្យរដ្ឋាភិបាលអ៊ីរ៉ង់ថ្លែងថានយោបាយរបស់អាមេរិក និងអ៊ីរ៉ង់នៅរក្សាជំហរដដែលមិនប្រែប្រួលទេ។ ដូច្នេះទោះបីនរណាឈ្នះឆ្នោតឡើងមកកាន់អំណាចក៏គ្មានបញ្ហា។ ផែនការត្រូវបានកំណត់រួចហើយ។ ដូច្នេះ គ្មានអ្វីប្រែប្រួលនោះទេនៅក្នុងជីវិតរស់នៅប្រចាំថ្ងៃរបស់ប្រជាជន។
កាលពីពេលលោកត្រាំកាន់អំណាចអាណត្តិមុន លោកបានសម្រេចចិត្តដកខ្លួនថយជាឯកតោភាគីចេញពីកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ២០១៥ ហើយដាក់ទណ្ឌកម្មសេដ្ឋកិច្ចទៅលើប្រទេសអ៊ីរ៉ង់យ៉ាងធ្ងន់ធ្ងរ ធ្វើឱ្យអ៊ីរ៉ង់មិនអាចនាំប្រេងទៅលក់នៅក្រៅប្រទេសបានឡើយ។ ក្រោយមកនៅឆ្នាំ២០២០ លោកត្រាំបញ្ជាឱ្យបាញ់សម្លាប់មេបញ្ជាការកំពូលនៃឆ្មាំបដិវត្តអ៊ីរ៉ង់ឈ្មោះកាសេម សូឡេម៉ានីនៅលើទឹកដីអ៊ីរ៉ាក់ដោយប្រើប្រាស់គ្រាប់មីស៊ីលបាញ់ចេញពីយន្តហោះដ្រូន៕
ចែករំលែកព័តមាននេះ