ទីក្រុងវ៉ាស៊ីនតោន៖ លោកត្រាំទំនងជាបារម្ភមិនតិចទេថាលោកអាចនឹងចាញ់ឆ្នោតនៅថ្ងៃទី៥ ខែវិច្ឆិក។ លទ្ធផលស្ទង់មតិថ្មីៗនេះបង្ហាញថាលោកស្រីហារីសនាំមុខលោកជាបន្តបន្ទាប់។ ដូច្នេះ លោកបានបញ្ចេញសារនយោបាយថ្មី១ដើម្បីបញ្ចុះបញ្ចូលអ្នកគាំទ្រលោកស្រីហារីសឱ្យងាកទៅបោះឆ្នោតឱ្យលោកវិញ។ លោកថាបើលោកស្រីហារីសឈ្នះឆ្នោតជាប្រធានាធិបតី, ប្រទេសចិនគ្មានកោតខ្លាចអំណាចរបស់លោកស្រីទេ។ ចិននឹងកំញើញលោកស្រីប្រៀបបាននឹងកូនង៉ែតម្នាក់តែប៉ុណ្ណោះ។
បើលោកស្រីហារីសឈ្នះឆ្នោតនៅអាណត្តិនេះ លោកស្រីត្រូវអង្គុយធ្វើការជាមួយលោកស៊ីជីនពីង (ប្រធានាធិបតីចិន) ដូច្នេះតើប្រធានាធិបតីចិនរូបនេះនឹងសម្ដែងអាកប្បកិរិយាបែបណាចំពោះលោកស្រី? ខាងលើនេះជាអ្វីដែលពិធីករវិទ្យុបានតាំងសំណួរទៅលោកត្រាំ។ លោកត្រាំតបថាលោកស៊ីជីនពីងនឹងចាត់ទុកលោកស្រីហារីសដូចជាកូនង៉ែតម្នាក់។ លោកស៊ីជីនពីងនឹងយកស្ករគ្រាប់ទាំងអស់ចេញឱ្យឆ្ងាយពីលោកស្រីហារីសភ្លាមមួយរំពេច។ លោកស្រីគ្មានដឹងថាមានរឿងអ្វីកើតឡើងទេ។
លោកត្រាំយល់ថាបើលោកស្រីហារីស និងលោកស៊ីជីនពីងធ្វើការជាមួយគ្នាគឺគីឡូខុសគ្នាឆ្ងាយណាស់។ ពោលគឺមិនខុសពីការប្រកួតលេងអុករវាងព្រឹទ្ធាចារ្យអុកជាមួយអ្នកដែលទើបតែចាប់ផ្ដើមលេងនោះទេ។ ជាទម្លាប់របស់លោកត្រាំ លោកច្រើនដាក់ងារឱ្យអ្នកនយោបាយដែលប្រកួតប្រជែងជាមួយលោក។ ឧទាហរណ៍ លោកដាក់ងារឱ្យលោកជេបប៊ូស (Jeb Bush) ថាបុរសកម្សោយ, ជួនកាលគាត់ហៅសមាជិកព្រឹទ្ធសភាឈ្មោះម៉ារ៉ាកូ រ៉ូប៊ីយ៉ូ (Marco Rubio) ដែលមកពីរដ្ឋផ្លរីដាថាជាក្មេងតូច។ លោកត្រាំក៏ធ្លាប់មានប្រវត្តិជាមនុស្សដែលចូលចិត្តប្រមាថតម្លៃរបស់ស្ត្រីផងដែរ។
នៅក្នុងករណីវាយប្រហារទៅលើលោកស្រីហារីសលើកនេះ លោកត្រាំមិនមែនប្រើប្រាស់យុទ្ធសាស្ត្រធម្មតាៗប៉ុណ្ណោះទេ។ លោកនឹករកចំណុចខ្សោយ និងរឿងឯកជនរបស់លោកស្រីហារីសដើម្បីយកមកវាយប្រហារ។ ជួនកាលលោកត្រាំពិពណ៌នាលោកស្រីហារីសថាស្រីកម្ជិល។ នេះជាភាសាមាក់ងាយចំពោះជនជាតិស្បែកខ្មៅ (អ្នកដែលទៅពីទ្វីបអាស៊ី ឬអាហ្វ្រិក)។ គោលបំណងរបស់គាត់ដើម្បីបន្តុះបង្អាប់លោកស្រីហារីសថាជាមនុស្សឡប់ៗ។ ជួនកាលគាត់ដាក់ជាសំណួរថាតើលោកស្រីហារីសកំពុងប្រើប្រាស់គ្រឿងញៀនទេដឹង? ជួនកាលលោកហៅលោកស្រីហារីសជាមនុស្សស្ទក់ និងខ្សោយបញ្ញា (low IQ)។
ការបោះឆ្នោតនៅអាមេរិកជារឿង១ចានទឹក ១ចានគោក។ គ្មាននរណាអាចទស្សន៍ទាយដឹងច្បាស់ថាតើបេក្ខជនរូបណានឹងទទួលជ័យជម្នះនៅទីបញ្ចប់។ រហូតមកដល់ពេលនេះ ពលរដ្ឋអាមេរិកាំងបានទៅបោះឆ្នោតមុនកាលកំណត់ជាង៣២លាននាក់រួចហើយ។ ពួកគេអាចបោះឆ្នោតតាមច្រើនជម្រើស អាចបោះនៅមណ្ឌល ឬបោះតាមសំបុត្រ និងផ្ញើតាមប្រៃសណីយ៍។
ប្រទេសខ្លះដូចជាអ៊ុយក្រែនកំពុងខ្វាយខ្វល់ និងតាមដានព្រឹត្តិការណ៍បោះឆ្នោតនេះដោយយកចិត្តទុកដាក់។ ពួកគេបារម្ភថាបើលោកត្រាំជាប់ឆ្នោត ការគាំទ្រចំពោះអ៊ុយក្រែនពីសំណាក់ទីក្រុងវ៉ាស៊ីនតោនអាចនឹងចុះខ្សោយ។ លោកត្រាំធ្លាប់ប្រកាសរួចហើយថានៅពេលដឹងថាឈ្នះឆ្នោតភ្លាម លោកមិនចាំបាច់រង់ចាំដល់ថ្ងៃស្បថចូលកាន់តំណែងទេ។ លោកនឹងគិតគូរដោះស្រាយបញ្ហាអ៊ុយក្រែនភ្លាមៗតែម្ដង។ ប៉ុន្តែអ៊ុយក្រែនបារម្ភថាការចរចានេះអាចនឹងគ្មានយុត្តិធម៌ទេព្រោះលោកត្រាំផ្ដោតសំខាន់តែទៅលើការបញ្ចប់សង្គ្រាម។ ហេងស៊យគាត់អាចនឹងបង្ខំឱ្យអ៊ុយក្រែនកាត់ទឹកដីរបស់ខ្លួនទៅឱ្យរុស្ស៊ីដើម្បីជាថ្នូរនឹងសន្តិភាព៕
ចែករំលែកព័តមាននេះ