ខេត្តមណ្ឌលគិរី ៖ សម្ដេចបវរធិបតី ហ៊ុន ម៉ាណែត បានគូសបញ្ជាក់ថា រាជរដ្ឋាភិបាលគ្មានគំនិតធ្វើឱ្យខ្លួនបាត់បង់ទឹកដីម្ដងណាឡើយ ខណៈដែលក្រុមប្រឆាំងនៅតែលើកយកការដាក់តំបន់អភិវឌ្ឍន៍ក្នុងក្របខណ្ឌត្រីកោណCLV ដើម្បីបំផុសបំផុលឱ្យប្រជាពលរដ្ឋមកដុតប្រទេស ក្នុងគោលបំណងផ្ដួលរំលំរាជរដ្ឋាភិបាលស្របច្បាប់ ។
ថ្លែងក្នុងពិធីសម្ពោធដាក់ឱ្យប្រើប្រាស់ជាផ្លូវការគម្រោងអភិវឌ្ឍន៍ទំនប់អូរតេធិបតីទំនប់សែនសុដុម និងទំនប់សែនមនោរម្យក្នុងខេត្តមណ្ឌលគិរី នៅព្រឹកថ្ងៃទី២៤ ខែតុលា ឆ្នាំ២០២៤ នេះ សម្តេចបវរធិបតីនាយករដ្ឋមន្ត្រីមានប្រសាសន៍ថា រយៈពេល៥០០ឆ្នាំកន្លងមកនេះ ប្រទេសកម្ពុជាទើបអាចរកបាននូវសន្ដិភាពពេញលេញនៅឆ្នាំ១៩៩៨ ក្រោមការដាក់ចេញនូវគោលនយោបាយ ឈ្នះឈ្នះរបស់សម្ដេចតេជោ ហ៊ុន សែន ។ ហើយដើម្បីឱ្យប្រទេសកម្ពុជា មានការអភិវឌ្ឍរីកចម្រើន និងអាចរក្សាសន្ដិភាពបានសម្ដេចតេជោ បានដាក់ចេញនូវយុទ្ធសាស្ដ្រត្រីកោណ យុទ្ធសាស្ដ្រចតុកោណ និងខិតខំរក្សាសន្ដិភាពរហូតប្រទេសមានការអភិវឌ្ឍមកដល់បច្ចុប្បន្ននេះ ។
សម្ដេចបវរធិបតីបានបញ្ជាក់ថា ការដាក់តំបន់អភិវឌ្ឍន៍ក្នុងក្របខណ្ឌត្រីកោណCLV គឺជាការដាក់ដើម្បីអភិវឌ្ឍន៍ប្រទេស ជំរុញការអនុវត្តនៅតំបន់ភូមិភាគឦសាន្ត មិនមែនដាក់តំបន់អភិវឌ្ឍន៍នេះ ដើម្បីកាត់ខេត្តឱ្យប្រទេសណាមួយនោះឡើយ ។
សម្ដេចធិបតីបានបញ្ជាក់ថា ក្នុងរយៈពេល២៥ឆ្នាំមកនេះ កម្ពុជាមិនដែលធ្វើការអភិវឌ្ឍន៍ណាមួយឱ្យបាត់បង់ទឹកដីនោះទេ ប៉ុន្ដែក្រុមអ្នកនយោបាយជ្រុលនិយមមួយក្ដាប់តូច នៅតែបន្តលើកឡើងបំភ្លៃការពិត ដើម្បីកេងចំណេញនយោបាយលើកិច្ចសហប្រតិបត្តការអភិវឌ្ឍខេត្តភូមិភាគឦសាន ។
សម្ដេចធិបតីបានសម្ដែងការសោកស្ដាយចំពោះក្រុមអ្នកនយោបាយជ្រុលនិយមនៅក្រៅប្រទេស ដែលបំភ្លៃការពិតញុះញង់ពលរដ្ឋពាក់ព័ន្ធនឹងកិច្ចសហប្របត្តិការអភិវឌ្ឍ កម្ពុជា ឡាវ វៀតណាម ឈានទៅបង្កើតចលនាផ្ដួលរំលំរាជរដ្ឋាភិបាល កាលពីថ្ងៃទី១៨ ខែសីហា ឆ្នាំ២០២៤ កន្លងទៅ ខណៈកិច្ចសហប្រតិបត្តិការនេះ ពេលឯកភាពនៅក្នុងរដ្ឋសភាពួកគេក៏មានវត្តមានក្នុងនោះដែរ។
ជាមួយគ្នានោះដែរ សម្ដេចបវរធិបតីបញ្ជាក់ថា ការបំផុសរឿង CLV-DTA គឺអាចបំផុសឱ្យខ្មែរបែកបាក់ផ្ទៃក្នុង ដើម្បីមានចេតនាដ៏អាក្រក់របស់ក្រុមប្រឆាំងជ្រុលនិយមនៅក្រៅស្រុក ខណៈដែលកម្ពុជាខិតខំយ៉ាងលំបាក ដើម្បីស្វែងរកសន្ដិភាពជូនដល់ប្រជាពលរដ្ឋ និងប្រទេសជាតិ។
សម្ដេចបវរធិបតី ហ៊ុន ម៉ាណែត បន្ដថា ផ្លែផ្កានៃសន្តិភាពបច្ចុប្បន្ន គឺបានមកដោយសារការពលីជីវិតរបស់បងប្អូនកងទ័ព និងវីរជនស្នេហាជាតិជាច្រើនរូប ដូច្នេះ យើងរួមគ្នាការពារសន្តិភាពនេះ ឱ្យបានកុំឱ្យបាត់បង់ ដោយសារការញុះញង់របស់ជនអគតិមួយចំនួនតូចនោះ។
សម្ដេចបវរធិបតីបានអំពាវនាវឱ្យប្រជាលរដ្ឋដែលមិនទាន់បានទៅស្គាល់ខេត្តភូមិភាគឦសាន សូមអញ្ជើញទៅទស្សនាស្វែងយល់ខេត្តភាគឦសានកម្ពុជាឱ្យបានគ្រប់ៗគ្នា ដើម្បីស្វែងយល់ពីការអភិវឌ្ឍន៍និងការតភ្ជាប់ខេត្តដែលរាជរដ្ឋាភិបាលបានធ្វើ និងចៀសវាងការចាញ់បោកការប្រឌិត និងបំភ្លៃរបស់ក្រុមជ្រុលនិយម៕
ចែករំលែកព័តមាននេះ