រាជធានីភ្នំពេញ ៖ រដ្ឋសភាកម្ពុជា បានប្រកាសគាំទ្រសេចក្តីសម្រេច ចំនួន៧ ក្នុងចំណោមសេចក្តីសម្រេច ចំនួន៣៧ ដែលស្នើដោយសមាជិកជាប្រទេសអាស៊ាន ចំនួន១០ ក្នុងមហាសន្និបាតអាយប៉ា លើក៤៥ នៅក្នុងប្រទេសឡាវ ខណៈដែលប្រទេសម៉ាឡេស៊ី និងធ្វើជាម្ចាស់ផ្ទះ នៅកិច្ចប្រជុំមហាសន្និបាតអាយប៉ា លើកទី៤៦ ក្នុងឆ្នាំ២០២៥ ខាងមុខ នេះបើយោងតាមសេចក្តីប្រកាសព័ត៌មាន ស្តីពីលទ្ធផល នៃការចូលរួមរបស់គណៈប្រតិភូជាន់ខ្ពស់សភាកម្ពុជា ក្នុងមហាសន្និបាតអន្តរសភាអាស៊ាន លើកទី៤៥ (AIPA-45) នៅសាធារណរដ្ឋប្រជាធិបតេយ្យប្រជាមានិតឡាវ ។
ឯកឧត្តម ឡេង ប៉េងឡុង អ្នកនាំពាក្យរដ្ឋសភាកម្ពុជា បានឱ្យដឹងក្នុងសន្និសីទសារព័ត៌មាន បន្ទាប់ពីវិលត្រឡប់ពីកិច្ចប្រជុំមហាសន្និបាតអាយប៉ានៅប្រទេសឡាវ នារសៀលថ្ងៃទី២៣ តុលាឆ្នាំ ២០២៥ នៅឯព្រលានយន្តហោះអន្តរជាតិភ្នំពេញ ថា សេចក្តីសម្រេចចំនួន៧ ដែលចូល រួមគាំទ្រដោយសភាកម្ពុជា ក្នុងចំណោមសេចក្តីសម្រេចចំនួន៣៧ ស្នើឡើងដោយសភា នៃប្រទេសអាស៊ានទាំង១០ ត្រូវបានអនុម័តជាឯកច្ឆន្ទ ក្នុងមហាសន្និបាតអន្តរសភាអាស៊ាន (AIPA) លើកទី៤៥ ដែលបានធ្វើឡើងនៅទីក្រុងវៀងចន្ទន៍ ប្រទេសឡាវ ចាប់ពីថ្ងៃទី១៧ ដល់ថ្ងៃទី២៣ ខែតុលា ឆ្នាំ២០២៤ ។
ក្នុងសន្និសីទសារព័ត៌មាន ក្រោយគណៈប្រតិភូជាន់ខ្ពស់សភាកម្ពុជា ដឹកនាំដោយសម្ដេចរដ្ឋសភាធិបតី ឃួន សុដារី ប្រធានរដ្ឋសភាកម្ពុជា ធ្វើមាតុភូមិនិវត្តន៍មកដល់មាតុប្រទេសវិញ ឯកឧត្តម ឡេង ប៉េងឡុង បានចាត់ទុកថា នេះជាជោគជ័យ និងលទ្ធផលផ្លែផ្កា នៃការចូលរួមរបស់សភាកម្ពុជា នៅក្នុងក្របខ័ណ្ឌស្ថាប័ននីតិប្បញ្ញតិរបស់អាស៊ាន ។
យោងតាមសេចក្តីប្រកាសព័ត៌មានស្តីពីលទ្ធផល នៃការចូលរួមរបស់គណៈប្រតិភូជាន់ខ្ពស់សភាកម្ពុជា ក្នុងមហាសន្និបាតអន្តរសភាអាស៊ាន លើកទី៤៥ បានឱ្យដឹងថា សភាកម្ពុជាបានចូលរួមគាំទ្រ (Co-sponsor) សេចក្តីសម្រេចចំនួន៧ ដែលរួមមាន ៖
១. សេចក្តីសម្រេច ស្តីពីការលើកកម្ពស់កិច្ចសហប្រតិបត្តិការសភាស្តីពីបរិយាបន្នឌីជីថល ដើម្បីផ្តល់អំណាចដល់ប្រជាពលរដ្ឋអាស៊ាន និងកិច្ចសហប្រតិបត្តិការសម្រាប់សន្តិភាព ស្ថិរភាព សន្តិសុខ និងវិបុលភាពតំបន់
២. សេចក្តីសម្រេច ស្តីពីការពង្រឹងតួនាទីសភាក្នុងការលើកកម្ពស់ការតភា្ជប់ និងកំណើនប្រកបដោយបរិយាបន្នអាស៊ាន តាមរយៈកិច្ចសហប្រតិបត្តិការសន្តិសុខនយោបាយអាស៊ាន
៣. សេចក្តីសម្រេច ស្តីពីការលើកម្ពស់ការចូលរួមរបស់ប្រជាពលរដ្ឋក្នុងការជំរុញសន្តិភាព ស្ថិរភាព និងការអភិវឌ្ឍតំបន់
៤. សេចក្តីសម្រេច ស្តីពីការលើកកម្ពស់តួនាទីសភាក្នុងនវានុវត្តន៍ការថែទាំសុខភាពប្រកបដោយភាពឆ្លាតវៃ
៥. សេចក្តីសម្រេច ស្តីពីការលើកកម្ពស់សិទ្ធិសុខុមាលភាពសង្គម និងឱកាសការងារសម្រាប់មនុស្សចាស់ក្នុងតំបន់អាស៊ាន
៦. សេចក្ដីសម្រេចពាក់ព័ន្ធ នឹងបណ្ណាល័យច្បាប់ឌីជីថលអាយប៉ា (AIPALync) ដែលជាគំនិតផ្តួចផ្តើមរបស់សភាកម្ពុជា
និង៧. សេចក្តីសម្រេចអនុម័តការបង្កើតភាពជាដៃគូអាយប៉ា ជាមួយនឹងសភាអន្តរជាតិដើម្បីភាពអត់ឱននិងសន្តិភាព (IPTP) និងសន្និសីទអន្តរជាតិ នៃបណ្ដាគណបក្សនយោបាយនៅអាស៊ី (ICAPP) ។
សូមជម្រាបថា នៅក្នុងកិច្ចប្រជុំមហាសន្និបាតអាយប៉ា លើកទី៤៥ នៅប្រទេសឡាវនេះដែរ សមាជិកគណៈប្រតិភូសភាកម្ពុជា ក៏បានចូលរួមកិច្ចសន្ទនារវាងអោយប៉ា និងសភាសង្កេតការណ៍ ចំនួន១៥ ប្រទេស ជាអាទិ៍ សភាតំណាងប្រជាជនចិន ជប៉ុន សាធារណរដ្ឋកូរ៉េ អូស្ត្រាលី ឥណ្ឌា តួកគី កាណាដា និងរុស្ស៊ី ជាដើម ក្រោមប្រធានបទ «កិច្ចសហប្រតិបត្តិការសភាដើម្បីសម្រេចបានសមាហរណកម្ម និងកំណើនប្រកបដោយបរិយាបន្ន» ។
សារៈសំខាន់ៗ របស់គណៈប្រតិភូសភាកម្ពុជាផ្តោតលើ ការពង្រឹង ការទូតសភា ដើម្បីសន្តិភាព វិបុលភាព និងការអភិវឌ្ឍប្រកបដោយចីរភាព និងបរិយាបន្ន ជាពិសេសជំរុញកិច្ចសហប្រតិបត្តិការរវាងអោយប៉ានិងសភាសង្កេតការណ៍ ដើម្បីសម្រេចគោលដៅ និងផលប្រយោជន៍រួម ៕
ចែករំលែកព័តមាននេះ