ខេត្តកណ្ដាល ៖ មន្ត្រីអាវុធហត្ថម្នាក់ រងនូវការរិះគន់ពីសំណាក់មហាជនថា អសីលធម៌ ពេលបំពេញភារកិច្ចនោះ ត្រូវបានកោះហៅមកសាកសួរហើយ ក្រោយប្រព្រឹត្តទង្វើមិនគប្បីដោយបានចាប់បោចសក់អ្នកបើកបរម្នាក់ក្របួចអូស ក្នុងពេលសហការត្រួតពិនិត្យចរាចរណ៍នៅផ្លូវជាតិលេខ៦អា ចំណុចស្ពានភូមិថ្មី ឃុំរកាកោង២ ស្រុកមុខកំពូល ខេត្តកណ្ដាល កាលពីថ្ងៃទី២២ ខែតុលា ឆ្នាំ២០២៤ ។
ក្រោយពីបានឃើញការបង្ហោះផ្សព្វផ្សាយវីដេអូមួយតាមបណ្តាញព័ត៌មានសង្គមរួចមក នៅថ្ងៃទី២៣ ខែតុលា ឆ្នាំ២០២៤នេះ លោកឧត្តមសេនីយ៍ត្រី អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស បានបំភ្លឺថា បុគ្គលរូបនេះ ជានាយទាហាន នៃកងរាជអាវុធហត្ថខេត្តកណ្តាល ។
លោកឧត្តមសេនីយ៍ត្រី អេង ហ៊ី បានបញ្ជាក់ថា ក្រោយដឹងហេតុការណ៍នេះ នាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស បានបញ្ជាឱ្យលោកឧត្តមសេនីយ៍ត្រី មេបញ្ជាការកងរាជអាវុធហត្ថខេត្តកណ្ដាល កោះហៅឈ្មោះ ពៅ សាលួត ដែលបានបង្ហាញឥរិយាបថបំពានក្រមសីលធម៌ វិជ្ជាជីវៈ ល្មើសបទវិន័យកងទ័ព ដើម្បីធ្វើការត្រួតពិនិត្យជំហានដំបូង ។
លោកឧត្តមសេនីយ៍ត្រី អេង ហ៊ី បានបញ្ជាក់ទៀតថា អនុវត្តទិសស្លោករបស់កងរាជអាវុធហត្ថ «ចំពោះប្រទេសជាតិ ត្រូវតែការពារ ចំពោះប្រជាត្រូវតែបម្រើ ច្បាប់ត្រូវតែគោរព និងបទល្មើសត្រូវតែបង្ក្រាប» នឹងចាត់តាំងធ្វើអធិការកិច្ច។ ក្នុងករណីរកឃើញបុគ្គលនេះ ប្រព្រឹត្តបទល្មើស កងរាជអាវុធហត្ថ នឹងកសាងសំណុំរឿងបញ្ជូនទៅតុលាការតាមច្បាប់ ។
នៅលើបណ្តាញព័ត៌មានសង្គម គេឃើញមតិមហាជនរិះគន់ខ្លាំងៗថា ៖ «នៅក្នុងរឿងនេះ ខ្ញុំអត់ដឹងពីឫសគល់ នៃបញ្ហានេះទេ ប៉ុន្តែចរិតរបស់បងៗមន្ត្រីរាជការមួយចំនួន ហាក់ចូលធ្វើមន្ត្រី ដើម្បីបានអំណាចទៅប្រើ ចូលមន្ត្រីដើម្បីតែរកលុយ ជាពិសេស ប៉ូលិសចរាចរណ៍ ភាគច្រើនពួកគាត់ចាត់ទុករាស្ត្រជាសត្រូវ និងជាកន្លែងបើកប្រាក់ ឯរាស្ត្រខ្មែរ ស្អប់គាត់ដូចចោរ ។ បើនៅអាមេរិកមកបោចសក់ខ្ញុំចឹង ខ្ញុំមានតែអរគុណ ព្រោះប្តឹងបានតិចណាស់ ក៏១លាន ២លានដុល្លារដែរ ដល់តែបោចនៅស្រុកខ្មែរ ស៊ីអំបិល» ៕
ចែករំលែកព័តមាននេះ