ខេត្តសៀមរាប ៖ នៅថ្ងៃអាទិត្យទី២០ ខែតុលា ឆ្នាំ២០២៤ អ្នកមកចុះឈ្មោះប្រឡងមានចំនួន ៣៥០អង្គ/នាក់ ហើយក្នុងចំណោមបេក្ខជនទាំងនោះ មានអ្នកចុះឈ្មោះអាយុតិចជាងគេ គឺកុមារាអាយុ៦ឆ្នាំ…
ខេត្តសៀមរាប ៖ នៅថ្ងៃអាទិត្យទី២០ ខែតុលា ឆ្នាំ២០២៤ អ្នកមកចុះឈ្មោះប្រឡងមានចំនួន ៣៥០អង្គ/នាក់ ហើយក្នុងចំណោមបេក្ខជនទាំងនោះ មានអ្នកចុះឈ្មោះអាយុតិចជាងគេ គឺកុមារាអាយុ៦ឆ្នាំ មកពីរាជធានីភ្នំពេញ និងអ្នកចុះឈ្មោះអាយុច្រើនជាងគេ៧២ឆ្នាំ ភេទប្រុស មកពីខេត្តសៀម រាប ។
ព្រឹត្តិការណ៍សរសេរតាមអានជាសាធារណៈ«សំណេរអង្គរ» គ្រោងនឹងរៀបចំជាលើកទី២ នៅថ្ងៃទី១៩ ខែមករា ឆ្នាំ២០២៥ ដែលជិតឈានមកដល់ហើយ ស្ថិតនៅទីតាំងលើស្ពានហាលខាងលិចមុខប្រាសាទអង្គរវត្ត ខេត្តសៀមរាប ក្នុងគោលបំណង គឺដើម្បីលើកស្ទួយអក្សរសាស្ត្រខ្មែរ ។
ព្រឹត្តិការណ៍«សំណេរអង្គរ»លើកទី២នេះ មានលក្ខណៈខុសពីលើកទីមួយបន្តិច ត្រង់មានការបែង ចែកបេក្ខជនជាពីរក្រុមផ្សេងគ្នា ។ ក្រុមទី១ សម្រាប់ក្រុមអាយុ១៨ឆ្នាំចុះក្រោម និងក្រុមទី២ ចាប់ពីអាយុ១៩ឆ្នាំឡើងទៅ ។ ការបែងចែកបែបនេះ គឺដើម្បីឱ្យមានភាពសុក្រឹត កុំឱ្យមានការលើកឡើងពីភាពមិនស្មើគ្នានៃអាយុ ឬតួនាទីដែលត្រូវមកប្រកួតជាមួយគ្នា ។
ក្នុងឱកាសនោះដែរ លោក លីម ប៊ុនហុក រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ ជាអ្នកផ្ដួចផ្ដើមរៀបចំកម្មវិធីសំណេរអង្គរបានឱ្យដឹងថា បេក្ខជនអាចចុះឈ្មោះចូលរួមប្រកួតប្រជែងនៅក្នុងកម្មវិធី«សំណេរអង្គរ»លើកទី២នេះ តាមរយៈលេខ ទូរស័ព្ទ ០៩២ ៣៣៧ ៦២៦ ហើយការចុះឈ្មោះនឹងត្រូវបិទវិញមុនថ្ងៃប្រឡង៣សប្ដាហ៍ ។ កម្មវិធី«សំណេរអង្គរ» ដែលត្រៀមរៀបចំឡើងនៅដើមឆ្នាំ២០២៥ខាងមុខនេះ ត្រូវបានកំណត់យកបេក្ខជនចន្លោះពី ១.០០០ទៅ ១.៥០០នាក់ បើធៀបនឹងឆ្នាំ២០២៣ គឺលើសមុនប្រមាណ៥០០នាក់ផងដែរ ។
កម្មវិធី«សំណេរអង្គរ» ត្រូវបានរៀបចំឡើងដោយក្រសួងការបរទេស និងសហប្រតិបត្តិការអន្តរជាតិ ក្រសួងអប់រំ ក្រសួងវប្បធម៌ ក្រសួងទេសចរណ៍ និង មាន ការ គាំ ទ្រពីក្រុមអ្នកស្រឡាញ់
អក្សរសាស្ត្រខ្មែរផងដែរ ។
កម្មវិធី«សំណេរអង្គរ» គឺជាព្រឹត្តិការណ៍ដ៏មានសារសំខាន់ ក្នុងការលើកកម្ពស់អក្សរសាស្ត្រខ្មែរ ពិសេសគឺជួយឱ្យប្រជាពលរដ្ឋ មហាជនទូទៅ កែប្រែទម្លាប់អក្ខរាវិរុទ្ធក្នុងការសរសេរ និងអានពាក្យខ្មែរឱ្យត្រឹមត្រូវឡើងវិញ ខណៈមហាជនទូទៅ ក្រសួង ស្ថាប័ន ផ្នែកឯកជន មានការគាំទ្រយ៉ាងក្លៀវក្លា ចំពោះកម្មវិធីដ៏មានសារសំខាន់នេះ ។
យើងអាចហៅកម្មវិធីសំណេរអង្គរនេះថា ជាការប្រកួតសរសេរតាមអានអក្សរខ្មែរក៏បាន ព្រោះជាការចូលរួមប្រកួតសរសេរអត្ថបទជាភាសាខ្មែរ ដែលបើកឱ្យមានការចូលរួមប្រកួតពីសំណាក់ប្រជាពលរដ្ឋគ្រប់ស្រទាប់ មិនប្រកាន់អាយុ ភេទ ជាតិ សាសន៍ តួនាទី ដើម្បីជ្រើសរើសជ័យលាភីដែលសរសេរពាក្យខ្មែរបានត្រឹមត្រូវជាងគេ ៕
ចែករំលែកព័តមាននេះ