ទីក្រុងហ្សាកាតា៖ ថ្មីៗនេះមានរឿងភ្ញាក់ផ្អើល១កើតឡើងនៅលើឆ្នេរសមុទ្រកោះស៊ូម៉ាត្រា ប្រទេសឥណ្ឌូណេស៊ី នៅពេលនារីម្នាក់ត្រូវត្រីដាវហក់ចេញពីក្នុងទឹកមកចាក់នឹងធ្មង់ដ៏មុតស្រួចរបស់វារហូតដល់ក្ស័យសង្ខារយ៉ាងអាណោចអាធ័ម។ សាក្សីនិយាយថាមុនពេលកើតហេតុ នារីរងគ្រោះជិះក្ដារបណ្ដែតនៅលើទឹកសមុទ្រ (surfing) នៃកោះស៊ូម៉ាត្រាខាងលិច។
អ្នកស្រីជូលៀ ម៉ាន់ហ្វ្រ៊ីនី (Giulia Manfrini) អាយុ៣៦ឆ្នាំក្រោយពេលត្រីដាវវាយប្រហារដំបូងមិនទាន់ស្លាប់ភ្លាមៗទេ។ ប៉ុន្តែស្នាមរបួសនៅលើដងខ្លួនមានសភាពធ្ងន់ធ្ងរដល់កម្រិតដែលអ្នកស្រីមិនអាចស៊ូទ្រាំបានទៅទៀត ហេតុនេះអ្នកស្រីក៏ស្លាប់ទៅ។ នេះបើយោងតាមការផ្សាយរបស់សារព័ត៌មានឥណ្ឌូណេស៊ី។
សារព័ត៌មានឈ្មោះអាន់តារ៉ា (Antara) ចុះផ្សាយថាកំពុងជិះក្ដារបន្ទះនៅលើទឹកសមុទ្រសុខៗស្រាប់តែត្រីដាវ១ក្បាលហោះចេញពីក្នុងទឹក ហើយចាក់ទម្លុះដើមទ្រូងរបស់ជនរងគ្រោះមួយទំហឹង។ ពេលនោះ អ្នកស្រីម៉ាន់ហ្វ្រ៊ីនីនៅដឹងខ្លួន និងខំលើកដៃជាសញ្ញាប្រាប់អ្នកជិះក្ដារបន្ទះនៅក្បែរនោះឱ្យជួយ។ ពួកគេក៏ប្រញាប់ផ្ដល់ការសង្គ្រោះបឋម និងដឹកទៅមណ្ឌលសុខភាព។
ប៉ុន្តែនៅពេលទៅដល់យឺតពេលទៅហើយ។ អ្នកស្រីក៏ទទួលអនិច្ចកម្មទៅ។ របាយការណ៍កោសល្យវិច័យបង្ហាញថាអ្នកស្រីរងរបួសជម្រៅ៥សង់ទីម៉ែត្រនៅត្រង់ដើមទ្រូងប៉ែកខាងលើ ខាងឆ្វេង។ ក្រៅពីនេះ សាកសពក៏បង្ហាញសញ្ញាលង់ទឹកផងដែរ។ សាកសពរបស់ជនរងគ្រោះត្រូវគេដឹកទៅទីក្រុងផាដាង (Padang) និងត្រៀមបញ្ជូនបន្តទៅប្រទេសអ៊ីតាលីដែលជាមាតុភូមិរបស់ជនរងគ្រោះ។ នេះបើយោងតាមការផ្សាយរបស់គេហទំព័រអេប៊ីស៊ីអូស្ត្រាលី (ABC)។
សារព័ត៌មានដទៃទៀតបានដកស្រង់សម្ដីរបស់អ្នកស្រុកនៅកន្លែងកើតហេតុមកចុះផ្សាយថាត្រីដែលជាឃាតករចាក់សម្លាប់ជនរងគ្រោះនោះជាប្រភេទត្រីម្ជុល ( needlefish) ដែលមានចំពុះមុតស្រួចដូចចំពុះទុង។ អភិបាលក្រុងវេណារៀ រ៉េអាល់ (Venaria Reale) ដែលជាស្រុកកំណើតរបស់ជនរងគ្រោះនៅប្រទេសអ៊ីតាលីក៏ចូលរួមសោកស្ដាយចំពោះការស្លាប់នេះផងដែរ។
«អ្នកស្រីជូលៀកំពុងជិះក្ដារបន្ទះនៅលើទឹកសមុទ្រសុខៗក៏ជួបប្រទះនឹងគ្រោះអកុសលនេះតែម្ដង។ គួរឱ្យស្ដាយ ទោះបីមានកិច្ចខិតខំប្រឹងប្រែងដើម្បីជួយសង្គ្រោះយ៉ាងអស់ពីចិត្តពីថ្លើមពីសំណាក់មិត្តភក្តិ បុគ្គលិកដែលបម្រើការនៅតំបន់រមណីយដ្ឋាន និងគ្រូពេទ្យយ៉ាងណាក្ដី អ្នកស្រីជូលៀមិនអាចរួចផុតពីសេចក្ដីស្លាប់បានឡើយ»។ ខាងលើនេះជាអ្វីដែលមិត្តភក្ដិរួមការងារជាមួយជនរងគ្រោះសរសេររៀបរាប់នៅលើបណ្ដាញសង្គម។
យើងជឿជាក់ថាអ្នកស្រីស្លាប់នៅក្នុងបុព្វហេតុកីឡាដែលអ្នកស្រីស្រឡាញ់ចូលចិត្តយ៉ាងខ្លាំង។ មិត្តភក្ដិរបស់អ្នកស្រីយល់ថាការនិយមចូលចិត្តកីឡាជិះក្ដារបន្ទះនៅលើទឹកសមុទ្រ ក៏ដូចជាការជិះក្ដារនៅលើទឹកកក និងឆាកជីវិតរបស់អ្នកស្រីកាលពីពេលកន្លងមកនឹងត្រូវគេចងចាំទុកនៅក្នុងចិត្តជានិច្ចនៅក្នុងចំណោមអ្នកដែលធ្លាប់ស្គាល់ និងប្រាស្រ័យទាក់ទងជាមួយអ្នកស្រី៕
ចែករំលែកព័តមាននេះ