ខេត្តបាត់ដំបង ៖ កម្លាំងសមត្ថកិច្ចជំនាញ នៃអធិការនគរបាលស្រុកថ្មគោល បានឃាត់ខ្លួនជនសង្ស័យម្នាក់ ពាក់ព័ន្ធករណីលួចម៉ូតូរបស់អ្នកគ្រូបង្រៀន នៅក្នុងបរិវេណសាលារៀនអនុវិទ្យាល័យជ្រោយស្តៅ ។
ករណីលួចម៉ូតូខាងលើនេះ កើតឡើងកាលពីវេលាម៉ោង០៨ព្រឹកថ្ងៃទី២១ ខែតុលា ឆ្នាំ២០២៤ នៅចំណុចក្នុងបរិវេណសាលារៀនអនុវិទ្យាល័យជ្រោយស្តៅ ស្ថិតក្នុងក្រុមទី១២ ភូមិបឹងព្រីង ឃុំបឹងព្រីង ស្រុកថ្មគោល ខេត្តបាត់ដំបង ។
សមត្ថកិច្ច បានអោយដឹងថា ជនសង្ស័យមានឈ្មោះ ចាន់ រ៉ាវី ភេទប្រុស អាយុ២៧ឆ្នាំ មានទីលំនៅភូមិកៀនកែស២ ឃុំគោកឃ្មុំ ស្រុកថ្មគោល ខេត្តបាត់ដំបង ។ ចំណែកឯជនរងគ្រោះ ឈ្មោះ ឡឹង សុផានី ភេទស្រី អាយុ៥៥ឆ្នាំ មានមុខរបរជាគ្រូបង្រៀន មានទីលំនៅភូមិអូរញរ ឃុំបឹងព្រីង ស្រុកថ្មគោល ខេត្តបាត់ដំបង ។
សមត្ថកិច្ច បានបន្តថា ជនសង្ស័យខាងលើនេះបានធ្វលសកម្មភាពចូលលួចយកម៉ូតូ ០១គ្រឿង ម៉ាកហុងដាឃ្លីក ស៊េរី២០១៥ ពណ៌ស ពាក់ស្លាកលេខបាត់ដំបង 1AT-9767 ខណៈពេលជនរងគ្រោះជិះយកមកចតទុកនៅមុខទីចាត់ការ ហើយដកសោម៉ូតូទុក ក្នុងប្រអប់ក្បាលម៉ូតូ រួចក៏ដើរចូលទៅក្នុងទីចាត់ការ ក្រោយមក ក៏ត្រូវបានជនសង្ស័យធ្វើសកម្មភាពលួចតែម្ដង ។
សមត្ថកិច្ច អោយដឹងទៀតថា ក្រោយពីទទួលបណ្តឹងជនរងគ្រោះ កម្លាំងផ្នែកជំនាញនគរបាលយុត្តិធម៌ រួមជាមួយកម្លាំងប៉ុស្តិ៍នគរបាលរដ្ឋបាលបឹងព្រីង នៃអធិការដ្ឋាននគរបាលស្រុកថ្មគោល ដឹកនាំដោយលោកវរសេនីយ៍ទោ សេង លុច អធិការនគរបាលស្រុកថ្មគោល ចុះធ្វើការស៊ើបអង្កេតស្រាវជ្រាវ បានកំណត់អត្តសញ្ញាណជនសង្ស័យ ឈានដល់ការជាត់ខ្លួនជនសង្ស័យម្នាក់ ឈ្មោះ ចាន់ រ៉ាវី នាំខ្លួនយកមកសាកសួរ នៅអធិការដ្ឋាននគរបាលស្រុកថ្មគោល ។
ក្រោយពីបានសាកសួរ ជនសង្ស័យបានឆ្លើយសារភាពថា ខ្លួនពិតជាបានធ្វើសកម្មភាពលួចយកម៉ូតូរបស់ជនរងគ្រោះពិតប្រាកដមែន ។
វត្ថុតាងដកហូតបាន រួមមាន ៖ ម៉ូតូចំនួន ០១គ្រឿង របស់ជនរងគ្រោះ ។ បច្ចុប្បន្ន ការិយាល័យជំនាញ កំពុងកសាងសំណុំរឿងបញ្ជូនទៅសាលាដំបូងខេត្តបាត់ដំបង ដើម្បីចាត់ការបន្តតាមនីតិវិធី ៕
ចែករំលែកព័តមាននេះ