ទីក្រុងហ្សាកាតា៖ ប្រធានាធិបតីថ្មីរបស់ប្រទេសឥណ្ឌូណេស៊ីដែលស្បថចូលកាន់តំណែងកាលពីថ្ងៃអាទិត្យនោះបានប្រកាសសុពលភាពគណៈរដ្ឋមន្ត្រីរបស់លោកនៅថ្ងៃចន្ទ។ ពួកគេទាំងអស់ជាអ្នកដើរតាមមាគ៌ានយោបាយរបស់លោកវីដូដូដែលជាប្រធានាធិបតីទើបផុតអាណត្តិ និងដែលកូនប្រុសរបស់គាត់ក៏ជាអនុប្រធានាធិបតីនៃរដ្ឋាភិបាលថ្មីនេះផងដែរ។
សូមរំលឹកថានៅក្នុងពិធីស្បថចូលកាន់តំណែងកាលពីថ្ងៃអាទិត្យនោះ លោកប្រាបូវ៉ូបានឡើងថ្លែងសុន្ទរកថាដ៏រំជួលចិត្តរយៈពេលមួយម៉ោង។ លោកបានសន្យាលុបបំបាត់អំពើពុករលួយឱ្យដល់ឫសគល់ និងខិតខំធ្វើយ៉ាងណាឱ្យប្រទេសជាតិមានភាពឯករាជ្យ-ម្ចាស់ការខាងស្បៀងអាហារ និងថាមពល។ គណៈរដ្ឋមន្ត្រីរបស់លោកប្រាបូវ៉ូមាន៤៨ស្ថាប័នរួមទាំងតំណែងរដ្ឋមន្ត្រី និងអនុរដ្ឋមន្ត្រីជាងមួយរយនាក់ផងដែរ។
រដ្ឋមន្ត្រីមួយចំនួនដែលបន្សល់ទុកតាំងពីជំនាន់លោកវីដូដូក៏នៅមានកៅអីអង្គុយនៅក្នុងគណៈរដ្ឋមន្ត្រីថ្មីនេះផងដែរ។ ឧទាហរណ៍ រដ្ឋមន្ត្រីហិរញ្ញវត្ថុ និងរដ្ឋមន្ត្រីថាមពលជាដើម។ រដ្ឋមន្ត្រីហិរញ្ញវត្ថុជាសេនាធិការដ៏សំខាន់ម្នាក់ដែលត្រូវមើលការខុសត្រូវទៅលើកម្មវិធីជាតិចែកអាហារជូនសិស្សានុសិស្សនៅថ្នាក់បឋមសិក្សាដោយឥតគិតថ្លៃចំនួនម្ភៃលាននាក់។ យោងតាមគម្រោងនេះ រដ្ឋាភិបាលនឹងចំណាយថវិកាជាតិជាង៤ពាន់លានដុល្លារសម្រាប់ឆ្នាំដំបូង។ រដ្ឋមន្ត្រីរូបនេះធ្លាប់មានស្នាដៃឆ្នើមខាងកែទម្រង់ពន្ធដារ។
អ្នកវិភាគម្នាក់ឈ្មោះបឺហានូឌីន មូតថាឌី (Burhanuddin Muhtadi) យល់ឃើញថាលោកប្រាបូវ៉ូប្រហែលជាមិនហ៊ានប្រថុយនៅក្នុងល្បែងនយោបាយដែលមិនច្បាស់លាស់ទេ។ ដូច្នេះ លោកសម្រេចចិត្តជ្រើសរើសមនុស្សសំខាន់ដែលធ្លាប់ធ្វើការនៅក្នុងជំនាន់លោកវីដូដូដើម្បីបន្តធ្វើការនៅក្នុងរដ្ឋាភិបាលថ្មី។ លោកយល់ថាការដាក់អេគីបនយោបាយបែបនេះអាចធ្វើឱ្យរដ្ឋាភិបាលមានលំនឹងល្អ។
អនុប្រធានគណបក្សរបស់លោកប្រាបូវ៉ូទទួលការតែងតាំងជារដ្ឋមន្ត្រីការបរទេសថ្មី។ លោកក៏ជាអនុប្រធានគណៈកម្មការរដ្ឋសភាទទួលបន្ទុកខាងកិច្ចការបរទេសផងដែរ។ ចំណែកទេសរដ្ឋមន្ត្រីម្នាក់ទៀតកាលពីជំនាន់លោកវីដូដូទទួលការតែងតាំងជាប្រធានឧត្ដមក្រុមប្រឹក្សាសេដ្ឋកិច្ចជាតិ។ គេសង្កេតឃើញថាការរៀបចំសមាសភាពគណៈរដ្ឋមន្ត្រីរបស់លោកប្រាបូវ៉ូមានចំណុចខុសគ្នាខ្លះៗពីជំនាន់លោកវីដូដូ។ មូលហេតុដោយសារក្រសួងមួយចំនួនត្រូវបំបែកជាពីរ ឬត្រូវដូរឈ្មោះថ្មី។
កាលពីមុន ក្រសួងអប់រំ និងវប្បធម៌ស្ថិតនៅក្នុងស្ថាប័នតែមួយ។ ប៉ុន្តែជំនាន់លោកប្រាបូវ៉ូ លោកបំបែកក្រសួងអប់រំផ្សេង និងក្រសួងវប្បធម៌ផ្សេង។ ក្រសួងបរិស្ថាន និងព្រៃឈើក៏បំបែកចេញពីគ្នាផងដែរ។ មុនពេលប្រកាសសុពលភាពគណៈរដ្ឋមន្ត្រីថ្មីនេះ លោកប្រាបូវ៉ូបានជួបពិភាក្សាការងារជាមួយអនុប្រធានាធិបតីចិន លោកហានសេង (Han Zheng)។ នេះបើយោងបណ្ដាញអ៊ិច និងសេចក្ដីជូនដំណឹងរបស់ក្រសួងការបរទេសចិន។ ប៉ុន្តែ គេមិនបានដឹងថាតើភាគីទាំង២បានពិភាក្សាគ្នាអំពីបញ្ហាអ្វីខ្លះទេ៕
ចែករំលែកព័តមាននេះ