ទីក្រុងវ៉ាស៊ីនតោន៖ ថ្ងៃនេះ លោកត្រាំមានសារនយោបាយសំខាន់មួយជម្រាបជូនទៅសហគមន៍ជាតិ និងអន្តរជាតិអំពីគោលជំហររបស់លោកពាក់ព័ន្ធនឹងបញ្ហានៅមជ្ឈិមបូព៌ា ខណៈដែលការបោះឆ្នោតប្រធានាធិបតីនៅអាមេរិកកាន់តែខិតចូលមកដល់។ គិតទៅនៅសល់មិនដល់២អាទិត្យទៀតនោះទេ។ នៅក្នុងបទសម្ភាសជាមួយទូរទស្សន៍អាល់អារ៉ាប៊ីយ៉ា (Al Arabiya) លោកត្រាំសន្យាថាបើលោកជាប់ឆ្នោតនៅអាណត្តិថ្មី…
ទីក្រុងវ៉ាស៊ីនតោន៖ ថ្ងៃនេះ លោកត្រាំមានសារនយោបាយសំខាន់មួយជម្រាបជូនទៅសហគមន៍ជាតិ និងអន្តរជាតិអំពីគោលជំហររបស់លោកពាក់ព័ន្ធនឹងបញ្ហានៅមជ្ឈិមបូព៌ា ខណៈដែលការបោះឆ្នោតប្រធានាធិបតីនៅអាមេរិកកាន់តែខិតចូលមកដល់។ គិតទៅនៅសល់មិនដល់២អាទិត្យទៀតនោះទេ។ នៅក្នុងបទសម្ភាសជាមួយទូរទស្សន៍អាល់អារ៉ាប៊ីយ៉ា (Al Arabiya) លោកត្រាំសន្យាថាបើលោកជាប់ឆ្នោតនៅអាណត្តិថ្មី លោកនឹងខិតខំធ្វើឱ្យមានសន្តិភាពយូរអង្វែងនៅមជ្ឈិមបូព៌ា។
តាមពិត នយោបាយការបរទេសរបស់លោកត្រាំនរណាក៏ជឿជាក់ថាគាត់ពិតជាមនុស្សចង់ឃើញពិភពលោកមានសន្តិភាពពិតមែន។ មិនមែនគាត់និយាយឱ្យតែរួចពីមាត់ទេ។ ផ្ទុយពីនយោបាយរបស់លោកអូបាម៉ាដែលចូលចិត្តដើរផ្ដួលរំលំរដ្ឋាភិបាលប្រទេសដទៃ លោកត្រាំឡើងមកកាន់អំណាចកាលពីអាណត្តិមុនឃើញថាពិភពលោកទទួលបានភាពស្ងប់ស្ងាត់។ ម៉្យាងទៀត លោកមិនមែនជាមនុស្សប្រកាន់ច្រើនទេ។ សូម្បីតែមេដឹកនាំដែលគេចាត់ទុកជា «បុរសខ្លាំង – strongman» ក៏លោកអាចសេពគប់ជាមួយបានជាធម្មតា។
លោកត្រាំថ្លែងដោយមោទកភាពថាបើតំណែងប្រធានាធិបតីស្ថិតនៅក្នុងដៃលោកតាំងពីជំនន់វ៉ៃគ្នាដើមខែតុលា ឆ្នាំ២០២៣ ម៉្លេះសមព្រឹត្តិការណ៍នោះមិនកើតឡើងទេ ហើយក៏គ្មានការបាត់បង់ជីវិតមនុស្សយ៉ាងរង្គាលដល់ថ្នាក់ហ្នឹងដែរ។ ឥឡូវនេះបើទុកជាព្រឹត្តិការណ៍នេះបានកើតឡើងទៅហើយក៏ដោយ ក៏លោកយល់ថាបញ្ហាសង្គ្រាមនៅហ្កាហ្សាប្រហែលជាងាយស្រួលបិទបញ្ចប់ទៅវិញឆាប់រហ័សជាងលីបង់។ មូលហេតុព្រោះលោកស៊ីនវ៉ាដែលជាអ្នកដុតបញ្ឆេះសង្គ្រាមនេះបានស្លាប់ហើយ។
កាលពីពេលចុះជួបអ្នកគាំទ្រនៅរដ្ឋហ្វ៊ីឡាដែលហ្វៀ លោកត្រាំថ្លែងថាលោក និងលោកណឺតាន់យ៉ាហ៊ូបានសន្ទនាគ្នាតាមទូរស័ព្ទអំពីបញ្ហាមជ្ឈិមបូព៌ា។ លោកថ្លែងថាលោកណឺតាន់យ៉ាហ៊ូបានស្នើសុំមតិយោបល់ល្អៗពីលោក (ត្រាំ) ដើម្បីចង់ដឹងថាតើអ៊ីស្រាអែលគួរចាត់វិធានការបែបណាទៀតចំពោះអ៊ីរ៉ង់។ បច្ចុប្បន្ននេះ អ៊ីស្រាអែលកំពុងតែថ្លឹងថ្លែងថាតើត្រូវបញ្ចេញប្រតិកម្មបែបណាចំពោះករណីដែលអ៊ីរ៉ង់បាញ់មីស៊ីលជិត២០០គ្រាប់ចូលទឹកដីរបស់ខ្លួនកាលពីថ្ងៃទី១ ខែតុលាកន្លងទៅនេះ។
ចំពោះសំណួរថាតើលោកគាំទ្រកម្រិតណាចំពោះអ៊ីស្រាអែលដែលចង់វាយប្រហារអ៊ីរ៉ង់? លោកត្រាំយល់ថាលោកណឺតាន់យ៉ាហ៊ូនឹងធ្វើអ្វីដែលគាត់ចង់ធ្វើ។ គាត់ត្រូវតែធ្វើរឿងនេះ។ រដ្ឋាភិបាលរបស់លោកបៃដិនសព្វថ្ងៃនេះបង្ហាញការគាំទ្រយ៉ាងពេញទំហឹងចំពោះការធ្វើសង្គ្រាមនៅហ្កាហ្សា និងលីបង់ពិតមែនហើយ។ ប៉ុន្តែទីក្រុងវ៉ាស៊ីនតោនបានផ្ញើលិខិត១ច្បាប់កាលពីសប្ដាហ៍មុនទៅថ្នាក់ដឹកនាំអ៊ីស្រាអែលដើម្បីរំលឹកថាអ៊ីស្រាអែលគួរតែជួយដោះស្រាយបញ្ហាមនុស្សធម៌នៅតំបន់ហ្កាហ្សា។
បើអ៊ីស្រាអែលមិនធ្វើតាមទេ អាមេរិកគំរាមកាត់បន្ថយការផ្គត់ផ្គង់អាវុធ។ លោកត្រាំយល់ឃើញថាលោកណឺតាន់យ៉ាហ៊ូចង់បានមតិយោបល់ពីលោកព្រោះទំនាក់ទំនងរវាងអ៊ីស្រាអែល និងសេតវិមានដែលមានលោកបៃដិន និងលោកស្រីហារីសនៅក្នុងនោះដែរហាក់ដូចជាសោះអង្គើយ ឬរយាលដៃបន្តិច។ លោកយល់ថាអ៊ីស្រាអែលធ្វើការទាំងទើសទ័លជាមួយសេតវិមាន។
លោកថ្លែងដូច្នេះបន្ទាប់ពីអ៊ីស្រាអែលប្រកាសថាខ្លួននៅតែស្ដាប់មតិយោបល់របស់វ៉ាស៊ីនតោនជានិច្ច។ គ្រាន់តែថាការធ្វើតាម ឬមិនធ្វើតាមជាសិទ្ធិរបស់អ៊ីស្រាអែល។ អ៊ីស្រាអែលប្រកាសថាអ្នកដែលមានសិទ្ធិសម្រេច និងអារកាត់នៅក្នុងរឿងនេះគឺមានតែអ៊ីស្រាអែលម្នាក់ប៉ុណ្ណោះ។ ម៉្យាងទៀត អ៊ីស្រាអែលយល់ថាខ្លួនធ្វើអ្វីៗត្រូវតែបម្រើផលប្រយោជន៍ជាតិរបស់ខ្លួនជាធំ។
ពាក់ព័ន្ធនឹងគម្រោងវាយប្រហារអ៊ីរ៉ង់នេះ អ៊ីស្រាអែលនៅតែប្រកាន់ជំហរថាខ្លួនត្រូវតែវាយអ៊ីរ៉ង់ឱ្យស្គាល់ដៃម្ដង។ ដូច្នេះទោះបីបរទេសណាមកនិយាយបញ្ចុះបញ្ចូល ឬផ្លុំត្រចៀកអ៊ីស្រាអែលយ៉ាងណាក៏ជាការឥតប្រយោជន៍។ កាលពីពេលថ្មីៗនេះ លោកបៃដិនចង់សម្រុះសម្រួលឱ្យប្រទេសទាំងពីរឈប់វាយសងសឹកគ្នាតទៅទៀត ហើយសុខចិត្តអហោសិកម្មឱ្យគ្នាត្រឹមនេះចុះ។ តាមចិត្តរបស់លោកបៃដិន លោកចង់ឱ្យមានបទឈប់បាញ់ជាបណ្ដោះអាសន្នក៏បានដែរ។ ប៉ុន្តែអ៊ីស្រាអែលមិនព្រម៕
ចែករំលែកព័តមាននេះ