ខេត្តកំពង់ស្ពឺ ៖ ផ្លូវមួយខ្សែដែលតភ្ជាប់ពីទួលធ្នង់ ដល់ភូមិខោប ក្នុងសង្កាត់រការធំ ក្រុងច្បារមន ខេត្តកំពង់ស្ពឺ ប្រមាណជាង១គីឡូម៉ែត្របានរងការខូចខាតជាយូរខែណាស់មកហើយ ស្ទើរក្លាយទៅជាថ្លុកក្របីដេក កំពុងបង្កការលំបាកក្នុងការធ្វើដំណើរ និងសំណូមពរដល់អាជ្ញាធរធ្វើការជួសជុល។
តាមប្រភពព័ត៌មានពីប្រជាពលរដ្ឋឈ្មោះ សារ៉ុម អាយុជាង៥០ឆ្នាំ រស់នៅក្នុងភូមិទួលធ្នង់ សង្កាត់រការធំ បាននិយាយឱ្យដឹងថា ផ្លូវមួយខ្សែរនេះរងការខូចខាតយូរខែមកហើយ មិនដែលឃើញអាជ្ញាធរសង្កាត់ ក្រុង ឬជំនាញពាក់ព័ន្ធណាចុះមកធ្វើការពិនិត្យមើល ឬជួសជុលនោះទេ។ ផ្លូវមួយខ្សែរនេះប្រវែងជាង១គីឡូម៉ែត្រតែប៉ុណ្ណោះ ដែលតភ្ជាប់ពីភូមិទួលធ្នង់ ទៅភូមិខោប ក្នុងសង្កាត់រការធំ ក្រុងច្បារមន ខេត្តកំពង់ស្ពឺ ផ្លូវនេះផងដែរមានអ្នកធ្វើដំណើរច្រើន មានតាំងពីប្រជាពលរដ្ឋ សិស្សានុសិស្ស ហើយជាពិសេសនោះគឺរថយន្តដឹកកម្មករ កម្មការរិនីរោងចក្រតែម្តង។
ប្រជាពលរដ្ឋដដែលបានបន្តថា កាលពីអំឡុងឆ្នាំ២០១៩~២០២០ ផ្លូវមួយខ្សែរនេះឃើញមានអាជ្ញាធរក្រុងច្បារមន បានធ្វើការជួសជុលម្តងដែរ មានដាក់លូផង ប៉ុន្តក៏បាត់ទៅវិញ។ រហូតដល់បច្ចុប្បន្ននេះមានការផ្លាស់ប្តូរអភិបាលក្រុងច្បារមន វ័យក្មេងឡើងកាន់តំណែង ផ្លូវមួយខ្សែរនេះក៏មានការខូចខាតពិបាកធ្វើដំណើរបែបនេះតែម្តងទៅ។ ខែវស្សាគឺបែកភក់ មានជង្ហុក ស្ទើរតែក្លាយទៅជាបឹងសម្រាប់សត្វក្របីដេកទៅហើយ បើខែប្រាំងវិញ មានសភាពហុយទ្រលោម។
ប្រជាពលរដ្ឋធ្វើការសំណូមពរដល់អាជ្ញាធរសង្កាត់ ក្រុងច្បារមន និងជំនាញពាក់ព័ន្ធមេត្តាជួយធ្វើការជួសជុលផ្លូវដែលរងការខូចខាត ដើម្បីប្រជាពលរដ្ឋ កម្មករ កម្មការិនី និងសិស្សានុសិស្សងាយស្រួលធ្វើដំណើរផង ៕
ចែករំលែកព័តមាននេះ