ខេត្តបាត់ដំបង ៖ ជនសង្ស័យចំនួន០២នាក់ ម្នាក់ជាអ្នកធ្វើសកម្ម «លួចផ្ទាល់» និងម្នាក់ទៀត ជាអ្នក«ទទួលផលចោរកម្ម» ត្រូវបានកម្លាំងកងរាជអាវុធហត្ថឃាត់ខ្លួនបានជាបន្តបន្ទាប់ រួមទាំងដកហូតបាននូវវត្ថុតាង (គ្រឿងអលង្ការ)មួយចំនួនផង កាលពីថ្ងៃទី១២ និង១៣ តុលា នៅស្រុកកំរៀង និង ស្រុកភ្នំព្រឹក ដែលជាប់ពាក់ព័ន្ធនឹងអំពើចោរកម្មដែលកើតឡើងនៅផ្សារឡែម ក្នុងទឹកដីប្រទេស
ថៃ ។
យោងតាមសេចក្ដីរាយការណ៍បានឲ្យដឹងថា អំពើចោរកម្មនោះបានកើតឡើង កាលពីវេលារំលង
អធ្រាត្រឈានចូលថ្ងៃទី០៩ តុលា នៅចំណុចផ្សារឡែម ស្ថិតក្នុងភូមិបានឡែម ឃុំទេពនិម្មិត ស្រុកប៉ូណាំរ៉ន ខេត្តច័ន្ទបូរី ប្រទេសថៃ ទល់មុខច្រកទ្វារអន្តរជាតិ «ដូង» ស្រុកកំរៀង ខេត្តបាត់ដំបង ដោយជនមិនស្គាល់មុខបានគាស់តូបលួចយកគ្រឿងអល័ង្ការ ដែលម្ចាស់តូចជាជនជាតិខ្មែរ។
ក្នុងរបាយការណ៍សមត្ថកិច្ចបាននិយាយថា ម្ចាស់តូបឈ្មោះ នួន ចាន់ផល្លី ភេទស្រី អាយុ៣៦ឆ្នាំ ជាជនជាតិខ្មែរ និងជាអាជីវករលក់ដូរនៅក្នុងផ្សារថៃខាងលើ ។ ក្រោយកើតហេតុ រហូតដល់ថ្ងៃទី១២ តុលា ស្ត្រីរងគ្រោះបានទៅប្ដឹងនៅមូលកងរាជអាវុធហត្ថស្រុកកំរៀង ដើម្បីឲ្យជួយអន្តរា
គមន៍។
អ្នកស្រី ចាន់ ផល្លី បានរាយការណ៍ប្រាប់សមត្ថកិច្ចថា ជនមិនស្គាល់មុខបានគាស់តូបលក់ដូររបស់អ្នកស្រី នៅក្នុងផ្សារឡែម (ប្រទេសថៃ) រួចបានលួចយកគ្រឿងអលង្ការភាគច្រើន គឺ «ចិញ្ចៀន» អស់ចំនួន៦៣វង់ ដែលមានតំលៃសរុបប្រមាណ៣០ម៉ឺនបាត។ បន្ទាប់ពីទទួលបានពាក្យបណ្ដឹង នៅថ្ងៃដដែលនេះ មន្ត្រីជំនាញកងរាជអាវុធហត្ថបានធ្វើការស្រាវជ្រាវរហូតកំណត់បាននូវមុខសញ្ញាជនសង្ស័យ និងឈានដល់ការឃាត់ខ្លួនភ្លាមៗតែម្ដង ។
ជនសង្ស័យឈ្មោះ ហូត វីត ភេទប្រុស អាយុ៣០ឆ្នាំ ជនជាតិខ្មែរ រស់នៅភូមិអូរដាលើ ឃុំបឹងរាំងស្រុកកំរៀង ។ ជាមួយនឹងការឃាត់ខ្លួននេះ មន្ត្រីជំនាញដកហូតវត្ថុតាងបានបន្តិចបន្តួចប៉ុណ្ណោះ
ពីជនសង្ស័យ ។ ប៉ុន្តែនៅចំពោះមុខសមត្ថកិច្ចដែលបានសួរនាំ ជននេះបានសារភាពថា ខ្លួនពិតជាបានធ្វើសកម្មភាពគាស់តូបលក់គ្រឿងអលង្ការរបស់ជនរងគ្រោះ នៅក្នុងផ្សារឡែមមែន ។
ជនសង្ស័យឈ្មោះ ហូត វីត បានផ្ដល់ចម្លើយទៀតថា ចិញ្ចៀនទាំងអស់ដែលខ្លួនបានលួច គឺខ្លួនបានយកទៅលក់នៅផ្សារស្រុកភ្នំព្រឹកបានប្រាក់ចំនួន៣,៤លានរៀលប៉ុណ្ណោះ ហើយប្រាក់នោះខ្លួនបានចាយអស់ទៅហើយ ។ នៅថ្ងៃទី១៣ តុលា កម្លាំងកងរាជអាវុធហត្ថស្រុកកំរៀង និងស្រុកភ្នំព្រឹក ដែលមានកិច្ចសហការពីមន្ត្រីការិយាល័យជំនាញផង ក្រោយការបញ្ជាផ្ទាល់ពីលោកមេបញ្ជាការខេត្តបានបន្តនិតិវិធី ចុះទៅកាន់ផ្សារស្រុកភ្នំព្រឹក ដើម្បីស្រាវជ្រាវរកអ្នកទទួលទិញផលចោរកម្ម (គ្រឿងអលង្ការ) និងបានឃាត់ខ្លួនបុរសម្នាក់ឈ្មោះ គួច សុឃីន ភេទប្រុស អាយុ៥៣ឆ្នាំ ជាអាជីវករលក់គ្រឿងអល័ង្កា នៅផ្សារស្រុកភ្នំព្រឹក ។
មន្ត្រីកងរាជអារុធហត្ថបាននិយាយថា អាជីវកររូបនេះ ជាអ្នកទទួលទិញផលចោរកម្មពីជនសង្ស័យឈ្មោះ ហូត វីត ។ ជាមួយនឹងការឃាត់ខ្លួននេះ មន្ត្រីជំនាញបានដកហូតវត្ថុតាងពីអ្នកទទូលផលចោរកម្មរូបនេះ បានចិញ្ចៀនចំនួន២៧វង់តែប៉ុណ្ណោះ ។ ដូច្នេះ នៅបាត់ចិញ្ចៀនចំនួន៣៦វង់ទៀត នេះបើផ្ទៀងផ្ទាត់ទៅនឹងចំនួនចិញ្ចៀនដែលជនរងគ្រោះបានប្រាប់ ដែលបានបាត់រហូតដល់ចំនួន៦៣វង់ឯណោះ ។
ទោះយ៉ាងណា ពេលនេះ ទាំងលោកចោរដែលបានលួចផ្ទាល់ ទាំងអ្នកទទួលទិញផលចោរកម្ម្ ត្រូវបានកម្លាំងកងរាជអាវុធហត្ថឃាត់ខ្លួននាំយកទៅសួរនាំ និងចាត់ការតាមនីតិវិធីហើយ៕
ចែករំលែកព័តមាននេះ