ខេត្តកំពង់ចាម ៖ នៅក្នុងឱកាសបុណ្យភ្ជុំបិណ្ឌឆ្នាំនេះក៏ដូចជាឆ្នាំកន្លងៗទៅដែរ នៅតាមវត្តអារាមចំនួន ៣៧៨ ក្នុងខេត្តកំពង់ចាម បងប្អូនពុទ្ធបរិស័ទចំណុះជើងវត្តទាំងទីជិតនិងទីឆ្ងាយ បាននាំគ្នាយកចង្ហាន់ទៅប្រគេនព្រះសង្ឃតាំងពីវេនដាក់បិណ្ឌទី១រហូតមក ដែលមានចាស់មានក្មេងយ៉ាង ច្រើនកុះករ…
ខេត្តកំពង់ចាម ៖ នៅក្នុងឱកាសបុណ្យភ្ជុំបិណ្ឌឆ្នាំនេះក៏ដូចជាឆ្នាំកន្លងៗទៅដែរ នៅតាមវត្តអារាមចំនួន ៣៧៨ ក្នុងខេត្តកំពង់ចាម បងប្អូនពុទ្ធបរិស័ទចំណុះជើងវត្តទាំងទីជិតនិងទីឆ្ងាយ បាននាំគ្នាយកចង្ហាន់ទៅប្រគេនព្រះសង្ឃតាំងពីវេនដាក់បិណ្ឌទី១រហូតមក ដែលមានចាស់មានក្មេងយ៉ាង ច្រើនកុះករ ។
ដោយឡែកឆ្នាំនេះ ទោះបីជាវត្តអារាមមួយចំនួនត្រូវជន់លិចដោយទឹកទន្លេមេគងក៏ដោយក៏ម្នាក់ៗបាននាំគ្នាជិះទូកយកចង្ហាន់ទៅវត្ត ហើយព្រះសង្ឃក៏មិនខ្វះចង្ហាន់ឡើយ ។
លោកតា គឹម អាន ជាអាចារ្យវត្តដីដុះ ក្នុងសង្កាត់វាលវង់ ក្រុងកំពង់ចាម មានប្រសាសន៍ថា ក្នុងរដូវបុណ្យកាន់បិណ្ឌនិងភ្ជុំបិណ្ឌឆ្នាំនេះ សម្រាប់វេនទី៩ នៅព្រឹកថ្ងៃទី២៦ ខែកញ្ញា ឆ្នាំ២០២៤ ឃើញមានវត្តមានលោកជំទាវ ញូង ចរិយា អ៊ុន ចាន់ដា រួមទាំងសហការីជាច្រើនរូប យកចង្ហាន់មកប្រគេនព្រះគ្រូ ញ័រ សាវី ព្រះចៅអធិការវត្តដីដុះ រួមទាំងព្រះសង្ឃផ្សេងទៀត ។
និយាយរួម ទាំងមន្ត្រីរាជការ ទាំងប្រជាពលរដ្ឋមកពីតាមភូមិនានាក្នុងក្រុងកំពង់ចាមនិងអ្នកនៅក្រៅស្រុក បាននាំយកចង្ហាន់មកប្រគេនព្រះសង្ឃ ដែលញ៉ាំងឱ្យពិធីកាន់បិណ្ឌនេះមានភាពអធិកអធមយ៉ាងខ្លាំង ។
លោកតាអាចារ្យរូបនេះ មានប្រសាសន៍ទៀតថា បើតាមការសង្កេតដោយផ្ទាល់ គឺតាំងពីវេនដាក់បិណ្ឌទី១មកដល់ពេលនេះ មានថ្ងៃខ្លះពុទ្ធបរិស័ទមកច្រើន ថ្ងៃខ្លះក៏មកតិច ហើយថ្ងៃដែលមកច្រើនគឺនៅថ្ងៃអាទិត្យ ។ បើប្រៀបធៀបឆ្នាំ២០២៤ទៅនឹងឆ្នាំ២០២៣កន្លងទៅ ក្នុងរយៈពេលដូចគ្នាគឺឆ្នាំនេះមានការថយចុះជាងឆ្នាំទៅមិញបន្តិច ។ វត្តដីដុះនេះ អ្នកដែលមកច្រើនគឺអ្នកភូមិរកា ដែលស្ថិតនៅមិនឆ្ងាយប៉ុន្មានពីវត្ត ។
ព្រះគ្រូ សា វីរ: ព្រះចៅអធិការវត្តខេមវន្តបឹងស្នាយ ស្ថិតក្នុងសង្កាត់សំបួរមាស ក្រុងកំពង់ចាម មានថេរដីកាថា ចាប់តាំងពីរដូវដាក់បិណ្ឌទី១មកដល់ទី៩ មានបងប្អូនប្រជាពុទ្ធបរិស័ទទាំងទីជិតទីឆ្ងាយ នាំយកចង្ហាន់មកប្រគេនព្រះសង្ឃគង់នៅក្នុងវត្តដែលមានចំនួន៣០ទៅ៤០អង្គ គឺសមល្មម មិនខ្វះចង្ហាន់ឆាន់ទេ ។ លោកជំទាវ ញូង ចរិយា អ៊ុន ចាន់ដា ភរិយាឯកឧត្តមអភិបាលខេត្ត ព្រមទាំងមន្ត្រីរាជការក៏បានអញ្ជើញមកដាក់បិណ្ឌទី៩នៅវត្តនេះដែរ ។
លោក រ៉េត សារ៉ាត ប្រធានមន្ទីរធម្មការនិងសាសនាខេត្ត មានប្រសាសន៍ថា នៅក្នុងក្រុង-ស្រុកទាំង១០នៃខេត្តកំពង់ចាម មានទីអារាមព្រះពុទ្ធសាសនាចំនួន៣៧៨ ។ តាមការសង្កេតដោយផ្ទាល់ គឺមានបងប្អូនប្រជាពលរដ្ឋរស់នៅក្នុងខេត្តកំពង់ចាម និងអ្នកខ្លះដែលចាកចេញពីលំនៅឋានទៅរស់នៅកន្លែងផ្សេង ក៏នាំគ្នាអញ្ជើញមកតាមវត្តនីមួយៗ គឺមានច្រើន ហើយព្រះសង្ឃក៏មិនខ្វះចង្ហាន់ដែរ ។
លោកប្រធានមន្ទីរបន្តថា ការប្រារព្ធពិធីបុណ្យកាន់បិណ្ឌ និងភ្ជុំបិណ្ឌ គឺចាប់ពីថ្ងៃ១រោចដល់១៥រោច ខែភទ្របទ ជារៀងរាល់ឆ្នាំ ។ ក្នុងរយៈពេល១៤ថៃ្ងដំបូងគេឱ្យឈ្មោះថា «បុណ្យកាន់បិណ្ឌ ឬបុណ្យដាក់បិណ្ឌ» ។ ចំណែកថ្ងៃ១៥រោច ដែលជាថ្ងៃចុងក្រោយ ពុទ្ធសាសនិកពីគ្រប់វេនទាំងអស់មកជួបជុំគ្នា ធ្វើទានចំពោះសង្ឃជាមួយគ្នាដើម្បីបញ្ចប់បុណ្យកាន់បិណ្ឌ ។ ថ្ងៃទី១៥ ត្រូវនឹងថ្ងៃ១៥រោច ខែភទ្របទ ដែលជាថ្ងៃចុងក្រោយនេះគេឱ្យឈ្មោះថា «ភ្ជុំបិណ្ឌ ឬ ថ្ងៃភ្ជុំបិណ្ឌ» ។
បុណ្យនេះធ្វើឡើងក្នុងបំណងសំខាន់ៗ៣គឺ ៖
១-ដើម្បីទំនុកបម្រុងដល់ព្រះសង្ឃដែលកំពុងគង់ចាំវស្សា ដោយហេតុរយៈពេលនេះ ជាពេលដែលមានភ្លៀងធ្លាក់ជោកជាំខ្លាំង នាំឱ្យមានការលំបាកសម្រាប់ព្រះសង្ឃក្នុងការត្រេចចរបិណ្ឌបាត ។
២-ដើម្បីសន្សំកុសល ឬសេចក្តីល្អ តាមរយៈការធ្វើទាន ។
៣-ដើម្បីឧទ្ទិសកុសលផលបុណ្យជូនទៅបុព្វការីជន និងញាតិសន្តាន ដែលបានលាចាកលោកនេះទៅ ៕
ចែករំលែកព័តមាននេះ