ខេត្តត្បូងឃ្មុំ ៖ មេឃបានបង្អររភ្លៀងធ្លាក់មកជាបន្តបន្ទាប់ រួមផ្សំ និងទឹកទន្លេមេគង្គបានហូរចូលតាមបឹងបួរជាច្រើន ជាហេតុធ្វើឲ្យព្រែកឆ្លង ស្ថិតនៅក្នុងឃុំដំរីផុង ស្រុកឆ្លង ខេត្តក្រចេះ ត្រូវបានជន់លិចផ្លូវលំ…
ខេត្តត្បូងឃ្មុំ ៖ មេឃបានបង្អររភ្លៀងធ្លាក់មកជាបន្តបន្ទាប់ រួមផ្សំ និងទឹកទន្លេមេគង្គបានហូរចូលតាមបឹងបួរជាច្រើន ជាហេតុធ្វើឲ្យព្រែកឆ្លង ស្ថិតនៅក្នុងឃុំដំរីផុង ស្រុកឆ្លង ខេត្តក្រចេះ ត្រូវបានជន់លិចផ្លូវលំ និងក្រោមផ្ទះប្រជាពលរដ្ឋប្រមាណ៩១គ្រួសារ ។ ក្នុងនោះមានអ្នកខ្លះចិញ្ចឹមសត្វពាហនៈត្រូវបានដឹកជញ្ជូនចល័តទៅកាន់ទីទួលសុវត្ថិភាព ។
អ្នកស្រី សឹម ស្រីពុំ មេឃុំដំរីផុង មានប្រសាសន៍ឲ្យដឹងនាល្ងាចថ្ងៃទី២២ កញ្ញា ឆ្នាំ២០២៤ថា: ព្រែកឆ្លូង ត្រូវបានទឹកភ្លៀងហូរធ្លាក់មកពីតំបន់ផ្សេងៗជាច្រើនជាហេតុធ្វើឲ្យទឹកបានហក់ឡើងយ៉ាងកំហុក ក្នុងរយៈពេលប៉ុន្មានថ្ងៃនេះធ្វើឱ្យផ្ទះរបស់ប្រជាពលរដ្ឋនៅភូមិបល្ល័ង្គជាង៩០គ្រួសារ ត្រូវបានទឹកហូរលិចក្រោមផ្ទះ ។ ក្នុងនោះមានអ្នកចិញ្ចឹមគោ ក្របី ចំនួន១៧គ្រួសារ ត្រូវបានដឹកនាំទៅកាន់ទីទទួលសុវត្ថិភាពនៅបុសស្នារស្ថិតសម្ងាយប្រមាណបីទៅបួនគីឡូម៉ែត្រ ពីលំនៅឋានរបស់ពួកគាត់។
មេឃុំដំរីផុងរូបនេះមានប្រសាសន៍បន្តថា ដោយទទួលបានការណែនាំពីលោកអភិបាលស្រុកក៏ដូចជាឯកឧត្តមអភិបាលខេត្ត បន្ទាប់ពីទទួលបានព័ត៌មានថា ទឹកព្រែកឆ្លង ទឹកហូរជន់លិចផ្ទះរបស់ប្រជាពលរដ្ឋ ។ ដោយមិនបង្អង់យូរ អ្នកស្រីរួមទាំងសហការីបានជិះទូកនិងដើរតាមផ្លូវលំដី ដែលត្រូវទឹកលិចត្រឹមចង្គង់មនុស្សចាស់ គឺដើរពីក្បាលភូមិរហូតដល់ចុងភូមិតែម្ដង ។
ក្នុងគោលបំណងពិនិត្យមើលស្ថានភាពនៃការរស់នៅរបស់បងប្អូនប្រជាពលរដ្ឋក្នុងមូលដ្ឋានដែលទទួលរងដោយគ្រោះទឹកជំនន់ គឺអាជ្ញាធរបានផ្សព្វផ្សាយឱ្យបងប្អូនប្រជាពលរដ្ឋដែលមានផ្ទះរស់នៅប្របតាមបណ្ដោយព្រែកឆ្លូង ត្រូវបង្កើនការប្រុងប្រយ័ត្នខ្ពស់ជាពិសេស គឺកូនក្មេងហ្នឹងមនុស្សចាស់ មិនត្រូវឱ្យចុះលេងទឹកនោះទេ ជៀសវាងកុំឲ្យគ្រោះថ្នាក់កើតឡើងជាយថាហេតុណាមួយ ។
អ្នកស្រីសឹម ស្រីពុំ មេឃុំដំរីផុង បញ្ជាក់ឲ្យដឹងទៀតថា ជាធម្មតានៅភូមិបល្ល័ង្គឲ្យតែរដូវវស្សាចូលមកដល់ គឺលំនៅឋានរបស់បងប្អូនប្រជាពលរដ្ឋតែងតែត្រូវបានជន់លិចរាល់ឆ្នាំ ក្នុងនោះរួមមានទាំងសាលាបឋមសិក្សាបល្ល័ង្គផងដែរ ។ នៅបណ្ដាឆ្នាំមុនៗឱ្យតែពលរដ្ឋជួបបញ្ហាបែបនេះកើតឡើង គឺអាជ្ញាធរមូលដ្ឋានបានរាយការណ៍ជូនទៅថ្នាក់ស្រុកក៏ដូចជាថ្នាក់ខេត្ត ហើយក៏មានក្រុមការងារបាននាំយកអំណោយមុខចែកជូនដល់បងប្អូនប្រជាពលរដ្ឋជាហូរហែ ដែលរងគ្រោះដោយទឹកជំនន់ ។
បើតាមការពិនិត្យជាក់ស្ដែង សម្រាប់រយៈពេលដូចគ្នាប្រៀបធៀបទៅនឹងឆ្នាំ២០២៣កន្លងទៅកម្ពស់ទឹកនៅព្រែកឆ្លូងនេះ ឆ្នាំនេះគឺមានកម្រិតទាបជាងមុនបន្តិច ។ ក្រោយពីលោកស្រីបានចុះពិនិត្យដោយផ្ទាល់គ្នាព្រឹកថ្ងៃទី២២ កញ្ញា ឆ្នាំ២០២៤ គឺបានរាយការណ៍ទៅថ្នាក់លើ ដើម្បីឲ្យដឹងពីស្ថានភាពដោយការរស់នៅរបស់ពលរដ្ឋ ។ ហើយអាជ្ញាធរក៏បានក្រើនរំលឹក ដល់ពលរដ្ឋត្រូវតែប្រកាន់ភ្ជាប់«ហូបស្អាត ផឹកស្អាត រស់នៅស្អាត» ។ ដើម្បីជៀសវាងកុំឱ្យមានជំងឺរាគរូស ។ ហើយក៏សូមឲ្យពលរដ្ឋប្រយ័ត្នពីសត្វអសិរពិសខាំ ឬចឹកត្រូវតែប្រញាប់នាំមកមណ្ឌលសុខភាព ដើម្បីឲ្យគ្រូពេទ្យសង្គ្រោះ។
សូមបញ្ជាក់ថាព្រែកឆ្លូង នៅភូមិបល្ល័ង្គនេះមានព្រំប្រទល់ជាប់ជាមួយនឹងឃុំរំចេក ស្រុកមេមត់ ខេត្តត្បូងឃ្មុំផងដែរ ៕
ចែករំលែកព័តមាននេះ