រាជធានីភ្នំពេញ៖ បុរសជនជាតិចិនម្នាក់ដែលជាបុគ្គលិកនៃមន្ទីរពហុព្យាបាលចិនគ្មានស្លាកយីហោមួយកន្លែងនៅឯខេត្តព្រះសីហនុ ហើយត្រូវបានថៅកែបញ្ឈប់ពីការងារ ធ្វើឲ្យជននោះខឹង ក៏បានធ្វើសកម្មភាពលួចរថយន្តរបស់មន្ទីរពហុព្យាបាលខាងលើ១គ្រឿងគេចខ្លួនយកទៅលក់នៅក្រុងបាវិតខេត្តស្វាយរៀង ។ ប៉ុន្តែដោយសាររថយន្តមានឡូហ្គោពេទ្យនិងគ្មានឯកសារផងនោះទើបគ្មានអ្នកទិញ ហើយក៏បើកត្រលប់មកលក់នៅរាជធានីភ្នំពេញវិញ ប៉ុន្តែនៅតែគ្មានអ្នកហ៊ានទិញទៀត ទីបំផុតត្រូវបានម្ចាស់ប្រទះឃើញដោយចៃដន្យ ក៏បានប្ដឹងឲ្យនគរបាលឃាត់ខ្លួនចាត់ការតាមច្បាប់តែម្ដង ។
នគរបាលនិងម្ចាស់រថយន្តបានឃាត់ខ្លួនជនសង្ស័យកាលពីវេលាម៉ោង១០និង៣០នាទីព្រឹកថ្ងៃទី១៦ ខែកញ្ញា ឆ្នាំ២០២៤ នៅតាមផ្លូវជិតយានដ្ឋានជួសជុលរថយន្តចិនមួយកន្លែងស្ថិតនៅក្នុងភូមិព្រៃជីសាក់ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
ជនសង្ស័យខាងលើឈ្មោះ LIN GUOTAI ភេទប្រុស អាយុ៥១ឆ្នាំ ជនជាតិចិន កាន់លិខិតឆ្លងដែនលេខ E89624285 ជននេះជាបុគ្គលិកនៅក្នុងមន្ទីពហុព្យាបាលចិនគ្មានយីហោមួយកន្លែងខាងលើ ស្ថិតនៅឯខេត្តព្រះសីហនុ ។
ចំណែករថយន្តនោះម៉ាកToyota Alphard ពណ៌ស ឆ្នាំផលិត២០០៤ ពាក់ស្លាកលេខ ភ្នំពេញ 2BE-8966 ដែលជាកម្មសិទ្ធិរបស់ស្ត្រីម្នាក់ឈ្មោះ គឹប សុផល អាយុ៤១ឆ្នាំ ជនជាតិខ្មែរមុខរបរអ្នកគ្រប់គ្រង មានទីលំនៅបច្ចុប្បន្ន ភូមិព្រៃសណ្ដែក សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ។
ស្ត្រីដែលជាម្ចាស់រថយន្តរូបនោះបាននិយាយថា គាត់បានជួលរថយន្តខាងលើទៅឲ្យមន្ទីរពហុព្យាបាលចិននោះជិត២ឆ្នាំមកហើយក្នុង១ខែថ្លៃ៧០០ដុល្លារ ដោយខាងគាត់មានតំណាងម្នាក់ឈ្មោះ ឡុង ស៊ីថា ភេទប្រុស អាយុ៣២ឆ្នាំ មានស្រុកកំណើតភូមិពោធិ៍ ឃុំសំបូរ ស្រុកទ្រាំង ខេត្តតាកែវ ហើយអាស័យដ្ឋានបច្ចុប្បន្នភូមិ៣ សង្កាត់១ ក្រុងព្រះសីហនុ ខេត្តព្រះសីហនុ ។ ចំណែកខាងមន្ទីរពហុព្យាបាលចិនខាងលើនោះតំណាងដោយឈ្មោះ HUANG YUANFANG ភេទប្រុស ជនជាតិចិន កាន់លិខិតឆ្លងដែនលេខ EL1440693 ស្នាក់នៅក្រុមទី៧ ភូមិ១ សង្កាត់៤ ក្រុងព្រះសីហនុ ខេត្តព្រះសីហនុ ។
ស្ត្រីដដែលបាននិយាយបន្តទៀតថា ដោយឡែកជនសង្ស័យវិញគឺជាបុគ្គលិកមន្ទីរពហុព្យាលខាងលើនោះ ប៉ុន្តែថ្មីៗនេះត្រូវបានថៅកែដកចេញ ហើយជននេះក៏នៅតែស្នាក់នៅក្នុងមន្ទីរពហុព្យាបាលនោះដដែលអត់បានចេញទៅស្នាក់នៅកន្លែងផ្សេងឡើយ ។ លុះដល់វេលាយប់ថ្ងៃទី១៣ ខែកញ្ញា ឆ្នាំ២០២៤ ជនខាងលើបានខ្ចីរថយន្តនោះពីខាងមន្ទីរពហុព្យាបាលដោយប្រាប់ថាជិះទៅហូបបាយ រួចក៏ជិះយកទៅបាត់រហូត មិនបានយកត្រលប់ទៅប្រគល់ឲ្យខាងពេទ្យវិញឡើយ ទើបមានការភ្ញាក់ផ្អើល ។
ម្ចាស់រថយន្តខាងលើបានរៀបរាប់ប្រាប់ឲ្យដឹងបន្ថែមទៀតថា ពេលនោះគាត់និងក្រុមគ្រួសារបានតាមរកដោយខ្លះទៅខាងក្រុងបាវិតនិងខ្លះទៀតទៅខេត្តផ្សេង ហើយរថយន្តនោះមានបំពាក់ប្រព័ន្ធតាមដានសុវត្ថិភាពGPSដែរ ។ ប៉ុន្តែប្រព័ន្ធនេះបានខូចបាត់ទៅហើយ ចំណែកបងប្រុសគាត់ក៏បានទម្លាក់រូបរថយន្តនិងប្រកូកប្រកាសតាមតេឡេក្រាមក្នុងអ្នករគ្រុបអ្នករត់តាក់សុីគ្រប់បណ្ដាខេត្ត ក្រុងឲ្យជួយឃ្លាំមើលផងដែរ ។
ប្រភពខាងលើបានប្រាប់ឲ្យដឹងបន្តថា ជនសង្ស័យបានបើករថយន្តនេះគេចតាមផ្លូវល្បឿនលឿនចូលមករាជធានីភ្នំពេញ និងបានហួសទៅកាន់ក្រុងបាវិត ខេត្តស្វាយរៀង ដើម្បីលក់ឬបញ្ចាំនៅទីនោះ ប៉ន្តែអត់មានអ្នកហ៊ានទិញឡើយ ព្រោះរថយន្តជាប់ឡូហ្គោពេទ្យ និងគ្មានឯកសារអ្វីទាំងអស់ ។ បន្ទាប់មកនៅថ្ងៃទី១៥ ខែកញ្ញា ជនសង្ស័យបានចូលទៅកាន់យានដ្ឋានមួយកន្លែងនៅខេត្តស្វាយរៀង បកឡូហ្គោពេទ្យចេញ ហើយម្ចាស់យានដ្ឋាននោះក៏បានស្គាល់គ្នាជាមួយឪពុកគាត់ផងដែរ(ឪពុកម្ចាស់រថយន្ត) ប៉ុន្តែអត់បានដឹងថារថយន្តនោះគឺជារបស់គាត់នោះឡើយ ។
គាត់បានបញ្ជាក់ប្រាប់ថា បន្ទាប់មកទៀតនៅវេលាយប់ថ្ងៃដដែលជនសង្ស័យបានបើករថយន្តត្រលប់ចូលរាជធានីភ្នំពេញវិញ ហើយនៅព្រឹកថ្ងៃទី១៦ ខែកញ្ញា បានបើកយកទៅលក់នៅឯយានដ្ឋានជួសជុលរថយន្តជជាតិចិននៅក្នុងភូមិព្រៃជីសាក់ សង្កាត់ចោមចៅទី៣ ខណ្ឌពោធិ៍សែនជ័យ ។ ប៉ុន្តែម្ចាស់យានដ្ឋាននោះអត់ហ៊ានទិញនោះទេ ព្រោះរថយន្តអត់មានឯកសារ ក្រោយមកបងប្រុសរបស់គាត់បើករថយន្តធ្វើដំណើរឆ្លងកាត់ចំណុចខាងលើ បានប្រទេះឃើញរថយន្តនោះកំពុងឈប់នៅតាមផ្លូវចំណុចខាងលើដោយចៃដន្យ និងឃើញជនសង្ស័យកំពុងស្ថិតនៅក្នុងរថយន្តនោះថែមទៀតផង ។ ទើបបងប្រុសគាត់ខលប្រាប់គាត់និងក្រុមគ្រួសារនាំគ្នាទៅកាន់ចំណុចនោះ ព្រមទាំងប្ដឹងនគរបាលប៉ុស្តិ៍ចោមចៅទៅ៣ ឲ្យជួយឃាត់ទាំងមនុស្សនិងរថយន្តនាំទៅសាកសួរនិងចាត់ការតាមច្បាប់តែតែម្ដង ៕
ចែករំលែកព័តមាននេះ