រាជធានីភ្នំពេញ ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានគូសបញ្ជាក់ថា កុំទម្លាក់ស្ដង់ដារលើគុណភាពសុខាភិបាល តែត្រូវរឹតបន្តឹងគុណភាព និងស្ដង់ដារសុខាភិបាលឱ្យកាន់តែជាក់លាក់ ពោល គឺការបណ្ដុះបណ្ដាលគ្រូពេទ្យ ត្រូវតែមានស្ដង់ដារខ្ពស់ និងច្បាស់លាស់ ។
ការលើកឡើងរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បន្ទាប់ពីមានអ្នកឱ្យយោបល់មក សម្ដេចថា បច្ចុប្បន្នគ្រូពេទ្យនៅកម្ពុជាកំពុងតែមានការខ្វះខាត គួរតែបន្ថូរបន្ថយល័ក្ខខណ្ឌបណ្ដុះបណ្ដាល កម្រិតពេទ្យ ។
ថ្លែងនាឱកាសអញ្ជើញជាអធិបតី បើកការដ្ឋានសាងសង់ អគារមជ្ឈមណ្ឌលកណ្តាល អគារចំណត រោងជាង និងអគារវេជ្ជសាស្ត្រស៊ីក្លូត្រុងនៃមន្ទីរពេទ្យកាល់ម៉ែត នៅព្រឹកថ្ងៃទី១៦ ខែកញ្ញា ឆ្នាំ២០២៤ សម្ដេចធិបតី ហ៊ុន ម៉ាណែត បានលើកឡើងថា ល័ក្ខខណ្ឌក្នុងការជ្រើសរើសពេទ្យមិនអាចទម្លាក់ស្តង់ដារបាននោះឡើយ ត្រូវតែពង្រឹងស្តង់ដារឱ្យបានខ្ពស់ ។
សម្ដេចធិបតី ហ៊ុន ម៉ាណែត បានគូសបញ្ជាក់ថា ៖«ថ្ងៃមុនមានការលើកយោបល់មកខ្ញុំថា ឥឡូវពេទ្យរបស់យើងកំពុងតែខ្វះ គួរតែបន្ថូរបន្ថយល័ក្ខខណ្ឌបណ្ដុះបណ្ដាលកម្រិតពេទ្យកុំឱ្យក្រសួងសុខាភិបាលតឹងពេក ។ ខ្ញុំថា អត់ទេពេទ្យត្រូវតែតឹង កុំទម្លាក់ស្ដង់ដារសុខាភិបាលត្រូវតែដំឡើងកម្រិតមនុស្សខំប្រឹងឱ្យជួបកម្រិតខ្ពស់ល្អជាង» ។
សម្ដេចធិបតីបាន បន្ដថា ពេទ្យ មិនមែនជាគណនេយ្យនោះទេ គណនេយ្យធ្វើខុសកែបញ្ជីបាន ប៉ុន្ដែពេទ្យចេញមកត្រូវមើលអ្នកជំងឺស្រាល ត្រូវព្យាបាលឱ្យជា ដោយកុំឱ្យជំងឺស្រាលទៅជាធ្ងន់វិញ ។
ជាមួយគ្នានោះដែរ សម្ដេចធិបតីបានបន្ថែមថា ពេទ្យត្រូវព្យាបាលអ្នកជំងឺធ្ងន់ឱ្យមកស្រាល ឬរស់វិញ ។ លើសពីនេះ សម្ដេចក៏បានអំពាវនាវឱ្យការបណ្ដុះបណ្ដលពេទ្យ ត្រូវមានស្ដង់ដារមួយជាក់លាក់ ហើយមានការចូលរួមវា.យតម្លៃពីក្រសួងសុខាភិបាលឱ្យបានត្រឹមត្រូវផងដែរ ។
សម្ដេចនាយករដ្ឋមន្ដ្រី បានគូសបញ្ជាក់ចំពោះមុខគ្រូពេទ្យទៀតថា ៖«សុខចិត្តមានពេទ្យ១០នាក់ ដែលមានជំនាញច្បាស់លាស់ ជាជាងមានពេទ្យ៥០នាក់ ដែលយើងមិនប្រាកដវិជ្ជា ព្រោះគ្រោះថ្នាក់ ហើយសុខចិត្ត កុំទម្លាក់ស្ដង់ដារនៃការបណ្ដុះបណ្ដាលឱ្យស្រួលឱ្យបានបរិមាណ សុខចិត្តរុញមនុស្សបានតិច បានច្រើន ដើម្បីឱ្យគាត់រុញស្ដង់ដារគាត់មកជួបស្ដង់ដារបរិមាណរបស់ពេទ្យ» ៕
ចែករំលែកព័តមាននេះ