រាជធានីភ្នំពេញៈសាកសពបុរសម្នាក់មានលក្ខណៈហើមស្អុយត្រូវបានប្រជាពលរដ្ឋប្រទះឃើញអណ្ដែតទឹកទន្លេសាបកាលពីវេលាម៉ោងប្រមាណ៥និង៣០នាទីល្ងាចថ្ងៃទី១៤ខែកញ្ញា នៅខាងត្បូងស្ពានខ្សែកាបឬស្សីកែវក្នុងសង្កាត់ជ្រោយចង្វារខណ្ឌជ្រោយចង្វារហើយត្រូវបានសមត្ថកិច្ចនគរបាលមូលដ្ឋានរាយការណ៍ទៅនគរបាលជំនាញចុះទៅស្រង់ត្រួតពិនិត្យនៅព្រឹកថ្ងៃទី១៥ខែកញ្ញានេះខណៈពេលដែលសពអណ្ដែតរហូតទៅដល់សង្កាត់ព្រែកតាសេក ខណ្ឌជ្រោយចង្វារ។
សពបុរសរូបនោះឈ្មោះ វ៉ា បារាំង ភេទប្រុស អាយុ៣៦ឆ្នាំ មុខរបរបើកបរម៉ូតូកង់បី ស្នាក់នៅផ្ទះជួល ភូមិទ្រា សង្កាត់ស្ទឹងមានជ័យ១ ខណ្ឌមានជ័យ រាជធានីភ្នំពេញ។
តាមសាក្សីបានឲ្យដឹងថា នៅវេលាល្ងាចថ្ងៃទី១៤ ខែកញ្ញាឆ្នាំ២០២៤ ឮគេប្រទះឃើញសាកសពបុរសម្នាក់អណ្ដែតរសាត់មកទើច្រាំងទន្លេនៅខាងត្បូងស្ពានខ្សែកាបឬស្សីកែវក្នុងភូមិដើមគ សង្កាត់ជ្រោយចង្វារខណ្ឌជ្រយចង្វារ រាជធានីភ្នំពេញ។បន្ទាប់ពីមានការភ្ញាក់ផ្អើលគេពុំឃើញសមត្ថកិច្ចមូលដ្ឋានប៉ុស្តិ៍ជ្រោយចង្វារចុះទៅចាត់ចែងអូសទាញយកមកត្រួតពិនិត្យនោះទេទុករហូតដល់ម៉ោងប្រមាណជា ៧ព្រឹកថ្ងៃទី១៥ខែកញ្ញា សពបានអណ្ដែតរសាត់រហូតទៅដល់ភូមិព្រែកតាគង់ សង្កាត់ព្រែកសេកទើបសមត្ថកិច្ចមូលដ្ឋានរាយការណ៍ទៅមន្ត្រីជំនាញចុះទៅស្រង់ដើម្បីពិនិត្យ។
តាមស្ត្រីឈ្មោះ លាភ សាប៊ុន អាយុ៦៤ឆ្នាំ ជាម្ដាយបង្កើតជនរងគ្រោះបានឲ្យដឹងថា កូនប្រុសរបស់គាត់មានជម្ងឺសសៃប្រសាទរយះពេលជាង៥ឆ្នាំមកហើយ តែងតែទៅបើកថ្នាំពីមន្ទីរពេទ្យរុស្ស៊ីមកលេប។
នៅយប់ថ្ងៃទី១២ ខែកញ្ញា ឆ្នាំ២០២៤ កូនប្រុសបានចេញពីផ្ទះដោយប្រាប់ថា ទៅទិញអីញ៉ាំហើយបាត់រហូតទើបព្រឹកថៃ្ងទី១៥ ខែកញ្ញា ឆ្នាំ២០២៤ បានទទួលដំណឹងប្រទះឃើញសាកសពអណ្ដែតទឹក ទើបមកមើលទើបដឹងថាជាកូនប្រុសគាត់។
តាមការត្រួតពិនិត្យលោកឧកញ៉ាវេជ្ជបណ្ឌិត នង សុវណ្ណរ័ត្ន គ្រូពេទ្យកោសល្យវិច័យអមតុលាការរាជធានីភ្នំពេញ បានសន្និដ្ឋានថា សពបានស្លាប់ដោយសារលង់ទឹក។គេមានការសង្ស័ថាបុរសរូបនោះបានលោតទឹកសម្លាប់ខ្លួនពីលើស្ពានជ្រោយចង្វារខណៈពេលដែលជំងឺរើឡើង។
សពជនរងគ្រោះ ត្រូវសមត្ថកិច្ចប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី ៕
ចែករំលែកព័តមាននេះ