តើជាដំណឹងពិត ឬយ៉ាងណា? ដែលថា កំពូលតារារ៉េបវ័យក្មេងជួរមុខលំដាប់ប្រទេស២រូប គឺលោកម៉ាន់ វណ្ណដា និងលោកងួន ចាន់ដេវីត ដែលជាស្វាមីតារាចម្រៀងស្រីអ្នកនាងទេព បូព្រឹក្ស…
តើជាដំណឹងពិត ឬយ៉ាងណា? ដែលថា កំពូលតារារ៉េបវ័យក្មេងជួរមុខលំដាប់ប្រទេស២រូប គឺលោកម៉ាន់ វណ្ណដា និងលោកងួន ចាន់ដេវីត ដែលជាស្វាមីតារាចម្រៀងស្រីអ្នកនាងទេព បូព្រឹក្ស នឹងត្រូវបង្ហាញវត្តមានប៉ះគ្នា ក្នុងព្រឹត្តិការណ៍ដ៏ធំមួយនាងចុងខែខាងមុខនេះ ។
ជាការពិតណាស់ ដូចដែលប្រិយមិត្តពុកម៉ែបងប្អូន ក៏ដូចជាអ្នកស្នេហាវិស័យកីឡាបានទទួលជ្រាបរួចហើយថា ក្រសួងអប់រំបានត្រៀមរៀបចំពិធីបើកជាផ្លូវការនៃព្រឹត្តិការណ៍កីឡាជាតិលើកទី៤ និងកីឡាជាតិជនពិការលើកទី២ ដែលនិងប្រព្រឹត្តិធ្វើឡើងនៅពហុកីឡាដ្ឋានជាតិអូឡាំពិក នាថ្ងៃទី៣០ ខែតុលា ឆ្នាំ២០២៤ នាពេលឆាប់ៗខាងមុខនេះ ។
យ៉ាងណាមិញ អ្វីដែលធ្វើឲ្យមហាជន ក៏ដូចជាអ្នកនិយមប្រើប្រាស់បណ្ដាញសង្គម កំពុងផ្ទុះការចាប់អារម្មណ៍ខ្លាំងនោះ ក្រោយទទួលបានដំណឹងថា ក្នុងពិធីបើកជាផ្លូវការនៃព្រឹត្តិការណ៍កីឡាជាតិលើកទី៤ និងកីឡាជាតិជនពិការលើកទី២ នឹងមានវត្តមានកំពូងតារាចម្រៀងរ៉េបជួរមុខក្នុងព្រះរាជាណាចក្រកម្ពុជា២រូប គឺលោកម៉ាន់ វណ្ណដា នឹងលោកងួន ចាន់ដេវីត រួមទាំងសិល្បករ សិល្បៈការិនីល្បីៗជាច្រើនរូបទៀត នឹងបង្ហាញវត្តមានក្នុងការសម្ដែងនឹងច្រៀងចម្រៀង ក៏ដូចជាការបង្ហាញទស្សនីយភាពដ៏អស្ចារ្យផ្សេងៗជាច្រើនក្នុងមហាព្រឹត្តិការដ៏ពិសេសមួយនេះ ។ នេះបើយោងតាមការបង្ហោះរបស់ផេកផ្លូវការ Team Cambodia នាថ្ងៃទី១២ ខែកញ្ញា ឆ្នាំ២០២៤ ម្សិលមិញនេះ។
យោងតាមទំព័រផ្លូវការស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ បានបង្ហោះរូបភាពរបស់តារាជួរមុខក្នុងប្រទេសទាំង២រូប រួចភ្ជាប់មកជាមួយសំណេរយ៉ាងដូច្នេះថា៖ កំពូលតារាចម្រៀងលោក វណ្ណដា និង លោក ជី ឌេវីត នឹងបង្ហាញវត្តមានក្នុងពិធីបើកព្រឹត្តិការណ៍កីឡាជាតិ ឆ្នាំនេះ ក្រៅពីនេះក៍មានក្រុមតារារ៉េបរបស់ផលិតកម្មបារមីផ្សេងទៀត ដូចជា វណ្ណថាន់, ស៊ូហ្សានា,យូហៃ, “បទទេវរាជ” សម្តែងដោយ លោក ជី ឌេវីត និងអ្នកនាង ទេព បូព្រឹក្ស, ក្រុម ឡា ស៊ីម៉ាកាទែល និងតារាជាច្រើនរូបទៀតផងដែរ។
ក្រោយពីទទួលដំណឹងខាងលើភ្លាម មហាជនអ្នកគាំទ្រកំពូលតារារ៉េបទាំង ២ រូបនេះ បានធ្វើការចែករំលែកយ៉ាងផុសផុល ដោយភ្ជាប់ជាមួយសំណេរសម្ដែងក្ដីរំភើប ត្រេកអរនឹងសប្បាយរីករាយយ៉ាងខ្លាំង ខណៈពួកគេក៏បានចោទសួរថាជាការពិតឬយ៉ាងណា ?ហើយបើជាការពិតបណ្ដាអ្នកគាំទ្រក៏ចង់ឲ្យតារាប្រុសទាំង២រូប ត្រៀមផលិតបទចម្រៀងបទ ដើម្បីច្រៀងរួមគ្នាក្នុងព្រឹត្តិការណ៍ដ៏ពិសេសមួយនេះផងដែរ ។
ដោយឡែក បើងាកមកចាប់អារម្មណ៍បណ្ដាញសង្គមផ្លូវការរបស់លោកវណ្ណដា នឹងលោកជីដេវីត គឺមិនទាន់មានការបង្ហោះបញ្ជាក់អំពីជំនួបជួបគ្នាក្នុងពិធីបើកជាផ្លូវការនៃព្រឹត្តិការណ៍កីឡាជាតិលើកទី៤ និងកីឡាជាតិជនពិការលើកទី២ នេះឡើយ គិតត្រឹមព្រឹកថ្ងៃទី១៣ ខែកញ្ញា ឆ្នាំ២០២៤នេះ ។
សូមបញ្ជាក់ផងដែរថា កន្លងមកតារាចម្រៀងរ៉េបលោកម៉ាន់ វណ្ណដា នឹង លោក ងួន ចាន់ដេវីត ធ្លាប់មានរឿងរ៉ាវមិនចុះចម្រុងគ្នាជាច្រើន ដែលបង្ករជារលកកម្ដៅយ៉ាងខ្លាំងនៅលើបណ្ដាញសង្គម រហូតដល់ថ្នាក់អ្នកគាំទ្រតារាចម្រៀងរ៉េបទាំង២រូបនេះ ចេញមុខការងារអាដលរបស់ពួកគេរៀងៗខ្លួន។
តែយ៉ាងណាមិញ ក្រោយភ្លៀងមេឃក៏ស្រឡះ អ្វីដែលអ្នកគាំទ្ររំភើបចិត្តនោះ ក្នុងជំនួបជួបគ្នាដ៏ពិសេស នៅកម្មវិធីរៀបអាពាហ៍ពិពាហ៍ របស់ស្រីនា នឹងលោកហេង វិសាល គ្រានោះលោកជីដេវីត ក៏បានជួបទល់មុខគ្នាជាមួយវណ្ណដា ខណៈពួកគេបានចាប់ដៃគ្នា នឹងបង្ហាញទឹកមុខពពេញដោយស្នាមញញឹម រួមទាំងបាននិយាយរកគ្នាយ៉ាងរីករាយផងដែរ ៕អត្ថបទ៖រៀម រ៉ាន់
ចែករំលែកព័តមាននេះ