ឧស្សាហកម្មទេសចរណ៍នឹងរួមចំណែកជាង១០ទ្រីលានដុល្លារដល់ GDP សកលនៅឆ្នាំនេះ
ចក្រភពអង់គ្លេស ៖ យោងតាមរបាយការណ៍ប្រចាំឆ្នាំរបស់ក្រុមប្រឹក្សាទេសចរណ៍ និងទេសចរណ៍ពិភពលោក ឬ World Travel & Tourism Council…
ចក្រភពអង់គ្លេស ៖ យោងតាមរបាយការណ៍ប្រចាំឆ្នាំរបស់ក្រុមប្រឹក្សាទេសចរណ៍ និងទេសចរណ៍ពិភពលោក ឬ World Travel & Tourism Council (WTTC) ដែលជាអង្គការសមាជិកភាពមិនរកប្រាក់ចំណេញ កាលពីថ្មីៗនេះបង្ហាញឱ្យដឹងថា ១ដុល្លារអាមេរិកក្នុងចំណោម១០ដុល្លារអាមេរិក ដែលត្រូវបានចំណាយជាសកលនៅឆ្នាំនេះ គ្រប់ដណ្តប់លើឧស្សាហកម្មទេសចរណ៍ ដែលរួមមានការកក់បន្ទប់សណ្ឋាគារ ការធ្វើដំណើរតាមនាវាកម្សាន្ត និងយន្តហោះផងដែរ។
ការរួមចំណែករបស់ឧស្សាហកម្មទេសចរណ៍ ចំពោះផលិតផលក្នុងស្រុកសរុបរបស់ពិភពលោក ដែលត្រូវបានស្គាល់ថា GDP ត្រូវបានរំពឹងថានឹងឈានដល់កម្រិតខ្ពស់បំផុតថ្មីមួយនៅឆ្នាំនេះ ខណៈដែលមនុស្សកាន់តែច្រើនឡើងបែងចែកការចំណាយលើការធ្វើដំណើរជាផ្នែកសំខាន់នៃកញ្ចប់ថវិកាចំណាយសរុបរបស់ពួកគេ។
របាយការណ៍ WTTC ប៉ាន់ប្រមាណថា ការរួមចំណែករបស់ឧស្សាហកម្មទេសចរណ៍ចំពោះ GDP សកលនៅឆ្នាំនេះ នឹងកើនឡើង ១២.១% បើធៀបនឹងឆ្នាំមុន ដែលមានតម្លៃរហូតដល់ ១១.១ទ្រីលានដុល្លារអាមេរិក ស្មើនឹង ១០% នៃ GDP សរុបរបស់ពិភពលោក។ តួលេខនេះតំណាងឱ្យការកើនឡើង ៧.៥% ពីកំណត់ត្រាចាស់ ដែលត្រូវបានកំណត់កាលពីឆ្នាំ ២០១៩។
លោកស្រី Julia Simpson នាយកប្រតិបត្តិ WTTC បានថ្លែងថា ទោះបីជាមានការព្រួយបារម្ភមួយចំនួនកាលពីឆ្នាំមុន អំពីពិភពលោកនឹងធ្លាក់ទៅក្នុងវិបត្តិសេដ្ឋកិច្ចសកល និងអតិផរណាខ្ពស់យ៉ាងណាក៏ដោយ ប៉ុន្តែនៅឆ្នាំនេះ យើងកំពុងសម្លឹងមើលការធ្វើដំណើរ និងទេសចរណ៍ គឺជាមហាអំណាចសេដ្ឋកិច្ចសកល។
របាយការណ៍បង្ហាញថា ការចំណាយលើការធ្វើដំណើរនៅក្នុងសហរដ្ឋអាមេរិក ប្រទេសចិន និងអាល្លឺម៉ង់ ត្រូវបានរំពឹងថានឹងរួមចំណែកច្រើនបំផុតដល់ GDP សកលនៅឆ្នាំនេះ។ ឧស្សាហកម្មទេសចរណ៍ ត្រូវបានរំពឹងថានឹងផ្តល់ការងារជិត ៣៤៨លានកន្លែង នៅក្នុងឆ្នាំ ២០២៤ ឬ ១៣.៦លានកន្លែងច្រើនជាងកាលពីឆ្នាំ ២០១៩ ដែលជាចំនួនកំណត់ត្រា មុនផ្ទុះជំងឺរាតត្បាតកូវីដ-១៩។
ឧស្សាហកម្មទេសចរណ៍ នៅតែកំពុងជួលដើម្បីបំពេញការងារនៅក្នុងវិស័យទេសចរណ៍ ដែលកំពុងរីកចម្រើនយ៉ាងឆាប់រហ័ស។ តួយ៉ាងបច្ចុប្បន្ននេះ នៅសហរដ្ឋអាមេរិកផ្តល់ការងារប្រមាណ១លានកន្លែង នៅទូទាំងឧស្សាហកម្មកម្សាន្ត និងបដិសណ្ឋារកិច្ច។ នេះបើយោងតាមទិន្នន័យសមាគមទេសចរណ៍សហរដ្ឋអាមេរិក។ ហើយបើយោងតាមរបាយការណ៍ WTTC បានឱ្យដឹងថា ការងារសរុបដែលត្រូវបានផ្តល់ឱ្យនៅសហរដ្ឋអាមេរិកគឺប្រហែល២៧លានកន្លែង កាលពីឆ្នាំ ២០២៣៕ (ប្រភព ៖ Reuters)
ចែករំលែកព័តមាននេះ