ទីក្រុងហាណូយ៖ មនុស្សរាប់លាននាក់នៅតំបន់អាស៊ីអាគ្នេយ៍ប្រឈមនឹងបញ្ហាលំបាកៗជាច្រើនដោយសារផ្ទះរបស់ពួកគេត្រូវដាច់ភ្លើង, លិចទឹក និងខូចខាតខាតដោយសារការវាយប្រហារដ៏ខ្លាំងក្លានៃខ្យល់ព្យុះយ៉ាជី។ ចំនួនអ្នកស្លាប់សរុបកើនឡើងដល់ជាង២០០នាក់ហើយ។ គ្រាន់តែនៅប្រទេសវៀតណាមមួយប៉ុណ្ណោះ អាជ្ញាធរប្រកាសថាមនុស្សស្លាប់កើនឡើងដល់១៩៩នាក់។ នៅប្រទេសថៃ ចំនួនអ្នកស្លាប់ដោយសារគ្រោះទឹកជំនន់នៅភាគខាងជើងកើនឡើងដល់៩នាក់។
ស្រុកមួយនៅប្រទេសថៃរងគ្រោះខ្លាំងក្លាមិនធ្លាប់មាននៅក្នុងរយៈពេល៨០ឆ្នាំចុងក្រោយ។ ខ្យល់ព្យុះយ៉ាជីបក់ទៅដល់តំបន់មាត់សមុទ្រប្រទេសវៀតណាមកាលពីចុងសប្ដាហ៍កន្លងទៅនេះ និងបានបង្កជាភ្លៀងធ្លាក់ខ្លាំងដល់ថ្នាក់ជន់លិចភាគខាងជើងប្រទេសវៀតណាម ព្រមទាំងរាលដាលទៅដល់ប្រទេសឡាវ, ថៃ និងភូមាថែមទៀត។ ហេតុការណ៍បាក់ដី និងការហក់ឡើងខ្ពស់នៃទឹកទន្លេក៏កើតមាននៅក្នុងប្រទេសទាំងនេះផងដែរ។
ប្រព័ន្ធទូរគមនាគមន៍ត្រូវកាត់ផ្ដាច់
គ្រោះទឹកជំនន់បានបំផ្លិចបំផ្លាញដីស្រែ-ចម្ការបស់កសិករជាង២សែន ៥ម៉ឺនហិកតារ។ មិនតែប៉ុណ្ណោះសត្វចិញ្ចឹមជាច្រើនក៏បានស្លាប់ដោយសារលង់ទឹក។ នេះបើតាមការបញ្ជាក់របស់ក្រសួងកសិកម្មវៀតណាម។ ដីបង្កបង្កើនផលនៅតំបន់ខ្សែក្រវាត់ ទីក្រុងហាណូយក៏រងគ្រោះយ៉ាងខ្លាំងក្លាផងដែរ។ នៅហាណូយ គេពិបាកធ្វើដំណើរ ឬមិនទាន់ធ្វើដំណើរដោយឡាន-ម៉ូតូដោយងាយស្រួលនៅឡើយទេ។ កន្លែងខ្លះទឹកលិចត្រឹមស្មងជើង អ្នកដំណើរត្រូវដើរលុយទឹកទៅធ្វើការ ឬប្រកបរបរផ្សេងៗ។
អាជ្ញាធរបន្តជម្លៀសមនុស្សរាប់ពាន់នាក់ចេញពីផ្ទះ។ អ្នកដែលស៊ូទ្រាំរស់នៅក្នុងផ្ទះរបស់ខ្លួនក៏ត្រូវរស់នៅទាំងដាច់ភ្លើង។ នៅសង្កាត់មួយនៃទីក្រុងហាណូយ អ្នកស្រុកជាង១ម៉ឺន ៥ពាន់នាក់ទទួលរងផលប៉ះពាល់ដោយទឹកជំនន់។ សារព័ត៌មានរបស់រដ្ឋចុះផ្សាយថានៅខេត្តឡាវកាយ (Lao Cai) មនុស្ស៧នាក់ស្លាប់ និង១១នាក់បាត់ខ្លួននៅក្នុងហេតុការណ៍បាក់ដី។
ហេតុការណ៍នេះកើតឡើងតាំងពីថ្ងៃអង្គារ ប៉ុន្តែគេទើបតែដឹងកាលពីពេលថ្មីនេះតែប៉ុណ្ណោះដោយសារដាច់ការទំនាក់ទំនងគ្នា។ នៅខេត្តឡាកាយដដែលនេះក៏មានហេតុការណ៍បាក់ដីដាច់ដោយឡែក១ទៀតបាក់សង្កត់ផ្ទះរបស់អ្នកស្រុក៣៧ខ្នងស្លាប់មនុស្ស៤២នាក់។ នេះមិនទាន់គិតទៅដល់មនុស្សបាត់ខ្លួន៥៣នាក់ផ្សេងទៀតដែលរកមិនទាន់ឃើញនៅឡើយទេ។
ការប្រកាសអាសន្ននៅទីក្រុងហ្លួងព្រះបាង
គណៈកម្មការទន្លេមេគង្គបានចេញសេចក្ដីប្រកាសអាសន្នមួយនៅថ្ងៃព្រហស្បតិ៍ថាគ្រោះទឹកជំនន់ដែលហក់ឡើងពីទន្លេមេគង្គអាចនឹងប៉ះពាល់ទីក្រុងបុរាណរបស់ប្រទេសឡាវឈ្មោះហ្លូងព្រះបាង។ នៅប្រទេសថៃចំនួនអ្នកស្លាប់កើនឡើងដល់៩នាក់។ ក្នុងនោះ ៦នាក់ស្លាប់ដោយសារការបាក់ដីនៅខេត្តឆៀងម៉ៃ។ នេះបើតាមសេចក្ដីប្រកាសរបស់គណៈកម្មជាតិគ្រប់គ្រងគ្រោះមហន្តរាយ។ នៅខេត្តឆៀងរ៉ៃ រាល់ការហោះហើរចេញ-ចូលខេត្តនេះត្រូវផ្អាកជាបណ្ដោះអាសន្ន។ ស្រុកមេសៃ (Mae Sai) ដែលជាប់នឹងព្រំដែនប្រទេសភូមាជួបប្រទះនឹងគ្រោះទឹកជំនន់ដ៏ធំមិនធ្លាប់មាននៅក្នុងរយៈពេល៨០ឆ្នាំចុងក្រោយ។
ប្រទេសភូមាក៏មិនអាចគេចផុតពីឥទ្ធិពលនៃខ្យល់ព្យុះយ៉ាជីនេះដែរ។ រដ្ឋធានីណៃពិដោរកំពុងលិចលង់យ៉ាងធ្ងន់ធ្ងរ។ ទីក្រុងថូនហ្គូ (Taungoo) របស់ប្រទេសភូមាក៏អាចនឹងមានបញ្ហាដែរបើទឹកទន្លេចាប់ផ្ដើមហក់ឡើងខ្ពស់។ សេវាដឹកជញ្ជូនតាមរថភ្លើងពីរ៉ង់ហ្គូនទៅម៉ាន់ដាឡេ (Mandalay) ត្រូវផ្អាកដំណើរការដោយសារទីតាំង១ចំនួនតាមផ្លូវធ្វើដំណើរនោះត្រូវទឹកលិច។
តាមពិត ការធ្លាក់ភ្លៀងនៅរដូវវស្សាសម្រាប់ទ្វីបអាស៊ីវាជារឿងធម្មតាទេ។ ក៏ប៉ុន្តែគេសង្កេតឃើញថានៅដំណាក់កាលចុងក្រោយនេះនៅពេលមានភ្លៀងធ្លាក់ម្ដងៗគឺធ្លាក់ខ្លាំងដូចគេហែកមេឃ ហើយមានទឹកជំនន់ល្ហល្ហាចគ្រប់ទីកន្លែង។ ដល់ពេលរដូវប្រាំងវិញ អាកាសធាតុក្ដៅហួតហែងដល់ជាង៤០អង្សា។ នេះហើយជាលទ្ធផលនៃការប្រែប្រួលអាកាសធាតុនៅលើភពផែនដី៕
ចែករំលែកព័តមាននេះ