ប្រទេសវៀតណាម ៖ ព្យុះសង្ឃរាយ៉ាកជី (Yagi) បានធ្វើឱ្យផ្ទះជាង១ពាន់ខ្នងក្នុងតំបន់ទេសចរណ៍ដ៏ទាក់ទាញមួយរបស់វៀតណាម ដែលមានឈ្មោះថា បៃឆាយ (Bai Chay) តាមបណ្តោញឆ្នេរសមុទ្រហាឡុង…
ប្រទេសវៀតណាម ៖ ព្យុះសង្ឃរាយ៉ាកជី (Yagi) បានធ្វើឱ្យផ្ទះជាង១ពាន់ខ្នងក្នុងតំបន់ទេសចរណ៍ដ៏ទាក់ទាញមួយរបស់វៀតណាម ដែលមានឈ្មោះថា បៃឆាយ (Bai Chay) តាមបណ្តោញឆ្នេរសមុទ្រហាឡុង (Ha Long) រងការខូចខាតយ៉ាងធ្ងន់ធ្ងរ ដោយនៅក្នុងនោះភោជនីយដ្ឋាន និងបន្ទប់សណ្ឋាគារជាច្រើនរងការខូចខាតស្ទើរទាំងស្រុង។ នេះបើយោងតាមប្រភពពីសារព័ត៌មានវៀតណាម VnExpress ចេញផ្សាយនៅថ្ងៃទី១០ ខែកញ្ញា ឆ្នាំ២០២៤។
ទីតាំងលក់ម្ហូបអាហារដ៏ពេញនិយមមួយនៅមុខសួន Sun World ជាកន្លែងទាក់ទាញភ្ញៀវទាំងជាតិ និងអន្តរជាតិដ៏ល្បីនៅតំបន់ Bai Chay ត្រូវបានបំផ្លិចបំផ្លាញ បន្ទាប់ពីព្យុះសង្ឃរាយ៉ាកជីបោកបក់មកលើខេត្តក្វាងនិញ (Quang Ninh) កាលពីថ្ងៃសៅរ៍សប្តាហ៍មុន ដោយនាំមកនូវភ្លៀងធ្លាក់ខ្លាំង និងខ្យល់បោកបក់យ៉ាងខ្លាំងក្នុងតំបន់។ ឆ្នេរសមុទ្រហាឡុង ដែលជាតំបន់បេតិកភណ្ឌពិភពលោករបស់អង្គការយូណេស្កូ (UNESCO) និងគោលដៅទេសចរណ៍ដ៏ពេញនិយមបំផុតនៅក្នុងខេត្តក្វាងនិញ ស្ថិតក្នុងចំណោមតំបន់ដែលរងគ្រោះខ្លាំងបំផុតដោយព្យុះសង្ឃរាយ៉ាកជី។
តំបន់បៃឆាយ ត្រូវបានទទួលស្គាល់ថា គឺជាតំបន់ទេសចរណ៍ដ៏រស់រវើកបំផុតរបស់ទីក្រុងហាឡុង គឺជាកន្លែងកម្សាន្តលំដាប់ខ្ពស់ ដោយមានផ្សារកៃដាំ (Cai Dam) ដ៏មមាញឹក ឆ្នេរដ៏ស្រស់ស្អាត និងផ្ទះសំណាក់ សណ្ឋាគារ និងបារកម្សាន្តជាច្រើន។ ទោះយ៉ាងណា សង្កាត់ដែលធ្លាប់តែមានភាពអ៊ូអរ ជាកន្លែងដែលភោជនីយដ្ឋានមានភ្ញៀវចូលយ៉ាងច្រើនកុះករនោះ ត្រូវបានបន្សល់ទុកត្រឹមការខូចខាតពិបាកនឹងគណនា។ ហើយបើតាមការប៉ាន់ស្មានជំហានបឋមថា អាជីវកម្មនីមួយៗ បានរងការខូចខាតគិតជាទឹកប្រាក់រាប់រយលានដុង ដែល១០០លានដុង ស្មើនឹង ៤.០៥៤ដុល្លារអាមេរិក។
ផ្លូវជាច្រើនក្នុងតំបន់បៃឆាយ ដែលធ្លាប់មានអ្នកមកលេងមមាញឹសម្រាប់ឱកាសបុណ្យជាតិ ឬថ្ងៃចុងសប្តាហ៍ ឥឡូវនេះបន្សល់ទុកការខូចខាតយ៉ាងសោកស្តាយបំផុត។ ស្របពេលដែលដើមឈើជាច្រើនបានដួលរលំ។
ដោយឡែក អ្នកតំណាងពីសណ្ឋាគារលំដាប់ផ្កាយប្រាំមួយកន្លែង ដែលមានជិត១០០បន្ទប់ នៅក្នុងតំបន់ទេសចរណ៍បៃឆាយ បានពណ៌នាការខូចខាតថាធ្ងន់ធ្ងរខ្លាំងណាស់ ដោយបន្ទប់ភាគច្រើនខូចខាតស្ទើរទាំងស្រុង។ គិតត្រឹមថ្ងៃទី៩ ខែកញ្ញា សណ្ឋាគារជាច្រើននៅមិនទាន់បញ្ចប់ការវាយតម្លៃទំហំការខូចខាតទាំងស្រុងនៅឡើយទេ។ ហើយនៅរសៀលថ្ងៃដដែលនោះ ភ្លៀងធ្លាក់ខ្លាំង និងការដាច់ចរន្តអគ្គិសនីបានបន្តញាំញីដល់តំបន់បៃឆាយ ដោយបង្អាក់ប្រតិបត្តិការណ៍សម្អាត និងបង្កការលំបាកដល់ប្រជាពលរដ្ឋនៅក្នុងការសង្គ្រោះចេញពីឥទ្ធិពលរបស់ព្យុះយ៉ាកជី៕ (ប្រភព ៖ VnExpress)
ចែករំលែកព័តមាននេះ