វៀតណាម ៖ ភ្លៀងធ្លាក់ខ្លាំងបណ្ដាលមកពីព្យុះទីហ្វុង Yagi កំពុងបង្កហានិភ័យបាក់ដីយ៉ាងធ្ងន់ធ្ងរ នៅខេត្តភាគខាងជើង ប្រទេសវៀតណាម ខណៈដែលចំនួនអ្នកស្លា.ប់ បានកើនឡើងដល់ ៦៤នាក់ហើយ…
វៀតណាម ៖ ភ្លៀងធ្លាក់ខ្លាំងបណ្ដាលមកពីព្យុះទីហ្វុង Yagi កំពុងបង្កហានិភ័យបាក់ដីយ៉ាងធ្ងន់ធ្ងរ នៅខេត្តភាគខាងជើង ប្រទេសវៀតណាម ខណៈដែលចំនួនអ្នកស្លា.ប់ បានកើនឡើងដល់ ៦៤នាក់ហើយ នេះបើតាមការចេញផ្សាយដោយសារព័ត៌មានវៀតណាម Vnexpress ។
Yagi ជាព្យុះមានឥទ្ធិពលដ៏ខ្លាំងបំផុតមួយ ដែលបានបោកបក់មកលើឆ្នេរភាគខាងជើង នៃប្រទេសវៀតណាម កាលពីរសៀលថ្ងៃសៅរ៍ ។ មជ្ឈមណ្ឌលឧតុនិយមវៀតណាម បានរាយការណ៍ថា ព្យុះទីហ្វុងនេះ ធ្វើឲ្យមានភ្លៀងធ្លាក់ពេញតំបន់ ដោយតំបន់ខ្លះមានភ្លៀងធ្លាក់លើសពី៣០០មីលីម៉ែត្រ នៅចន្លោះម៉ោង៨ព្រឹកថ្ងៃសៅរ៍ ដល់ម៉ោង ៨យប់ថ្ងៃអាទិត្យ ។ តំបន់ខ្លះទៀត ឃើញមានភ្លៀងធ្លាក់ពី៤៣០-៤៤០មីលីម៉ែត្រ ។
គិតត្រឹមថ្ងៃចន្ទនេះ ព្យុះទីហ្វុង Yagi បានឆក់យកជីវិតមនុស្សចំនួន ៦៤នាក់ នៅទូទាំងភាគខាងជើង ប្រទេសវៀតណាម ក្នុងនោះមាន ៤៩នាក់ បានស្លា.ប់ដោយសារទឹកជំនន់ និងការរអិលបាក់ដីភ្លាមៗ បន្ទាប់ពីព្យុះនេះ បានឆ្លងកាត់ ។
ក្នុងចំណោមអ្នករងរបួស ចំនួន២២៩នាក់ មាន១៥៧នាក់ រស់នៅខេត្ត Quang Ninh ដែលព្យុះទីហ្វុង Yagi បានវាយប្រហារក្នុងល្បឿនខ្យល់បក់ឡើងដល់ ១៦៦គីឡូម៉ែត្រ ក្នុងមួយម៉ោង ។
ការព្យាករណ៍បង្ហាញថា តំបន់ភាគពាយ័ព្យ រួមទាំងទីក្រុងទេសចរណ៍ Sa Pa នឹងមានភ្លៀងធ្លាក់ខ្លាំងបំផុត ចាប់ពី១០០-២០០មីលីម៉ែត្រ និងអាចលើសពី ៤០០មីលីម៉ែត្រ ត្រឹមថ្ងៃចន្ទ។ ភាគឦសាន រួមទាំងឈូងសមុទ្រ Ha Long ត្រូវបានគេរំពឹងថានឹងទទួលបានពី ២០-៥០មីលីម៉ែត្រ ដោយតំបន់ខ្លះមានលើសពី ១០០មីលីម៉ែត្រ ។ តំបន់ជួរភ្នំភាគឦសាន នឹងមានភ្លៀងធ្លាក់ពី ៦០-១២០មីលីម៉ែត្រ ជាមួយនឹងកន្លែងខ្លះ ក៏មានភ្លៀងធ្លាក់ជាង ២៥០មីលីម៉ែត្រ ។
ទីភ្នាក់ងារឧតុនិយម បានចេញការព្រមានអំពីហានិភ័យនៃការរអិលបាក់ដីនៅក្នុងខេត្តចំនួន១៧ ក្នុងចំណោម ២៥ខេត្ត នៅភាគខាងជើង។
ព្យុះទីហ្វុង Yagi បានបង្កើនឥទ្ធិពលខ្លាំង កាលពីថ្ងៃព្រហស្បតិ៍ សប្តាហ៍មុន ជាមួយនឹងកម្លាំងខ្យល់បក់ឡើងដល់ ២០១ គីឡូម៉ែត្រ ក្នុងមួយម៉ោង បានបណ្តាលឱ្យមានការបំផ្លិចបំផ្លាញយ៉ាងខ្លាំង ដល់ភាគខាងជើងប្រទេសវៀតណាម។ ផ្ទះជាង ៨,០១០ខ្នងបានរងការខូចខាត ហើយទូកនេសាទចំនួន ២៥គ្រឿងបានលិច នៅក្នុងខេត្ត Quang Ninh។ បែចិញ្ចឹមត្រីជាង ១,១០០ ត្រូវខូចខាត ។
ព្យុះនេះ ក៏បានបង្កការរំខានដល់ទូរគមនាគមន៍ នៅក្នុងខេត្តនានារួមទាំងទីក្រុងហាណូយ ក៏បានជួបប្រទះការដាច់ភ្លើង ដោយសារតែការខូចខាតដល់ខ្សែបញ្ជូនថាមពលអគ្គិសនី ចំនួន១៣៣បង្គោល ។ គិតត្រឹមល្ងាចថ្ងៃអាទិត្យ តំបន់ជាច្រើនក្នុងខេត្ត Quang Ninh និង Hai Phong នៅតែគ្មានអគ្គិសនីប្រើប្រាស់ ។
ក្នុងវិស័យកសិកម្ម ដីស្រែជិត ១១ម៉ឺនហិកតា ត្រូវបានទឹកជន់លិច។ តំបន់ដែលរងគ្រោះខ្លាំងជាងគេ រួមមាន Hai Phong (៧,០០០ហិកតា), Thai Binh (២៩,០០០ហិកតា), Hung Yen (១២,១១០ហិកតា) និង Hai Duong (១៨,៥០០ហិកតា)។ បន្ថែមលើនេះ បន្លែចំនួន ១៧,៩២០ ហិកតា និងដំណាំហូបផ្លែ ៦,៩០០ ហិកតា ត្រូវបានបំផ្លាញទាំងស្រុង ៕
ចែករំលែកព័តមាននេះ