សិង្ហបុរី៖ មានហេតុការណ៍ក្រឡាប់ចាក់នៅក្នុងយន្តហោះដឹកអ្នកដំណើររបស់ក្រុមហ៊ុនអាកាសចរណ៍ស្គូត (Scoot) នៅតាមផ្លូវពីប្រទេសសិង្ហបុរីឆ្ពោះទៅទីក្រុងក្វាងចូវ (Guangzhou) ប្រទេសចិន បណ្ដាលឱ្យមនុស្ស៧នាក់រងរបួស។ សាក្សីនិយាយថាយន្តហោះម៉ាកបូអ៊ីង៧៨៧-៩ ឌ្រីមឡាញណឺ (Boeing…
សិង្ហបុរី៖ មានហេតុការណ៍ក្រឡាប់ចាក់នៅក្នុងយន្តហោះដឹកអ្នកដំណើររបស់ក្រុមហ៊ុនអាកាសចរណ៍ស្គូត (Scoot) នៅតាមផ្លូវពីប្រទេសសិង្ហបុរីឆ្ពោះទៅទីក្រុងក្វាងចូវ (Guangzhou) ប្រទេសចិន បណ្ដាលឱ្យមនុស្ស៧នាក់រងរបួស។ សាក្សីនិយាយថាយន្តហោះម៉ាកបូអ៊ីង៧៨៧-៩ ឌ្រីមឡាញណឺ (Boeing 787-9 Dreamliner) ដឹកមនុស្សជាច្រើននាក់ដែលគេមិនបញ្ចេញឱ្យដឹងថាមានចំនួនប៉ុន្មាននាក់ពិតប្រាកដទេ។
កំពុងហោះនៅលើអាកាសសុខៗ យន្តហោះនោះស្រាប់តែបើកធ្លាក់ជង្ហុកខ្យល់ធ្វើឱ្យយន្តហោះផ្អៀងផ្អងឆ្វេងស្ដាំចុះឡើងៗ ហើយធ្វើឱ្យមនុស្សនៅក្នុងនោះក្រឡាប់ចាក់ពេញយន្តហោះ។ អ្នកខ្លះបែកក្បាលបែកក្បូង អ្នកខ្លះរបួស ឬដាច់រលាត់ដៃ-ជើង។ ក្រុមហ៊ុនស្គូតប្រកាសថាមនុស្សម្នាក់ត្រូវគេដឹកទៅព្យាបាលរបួសនៅមន្ទីរពេទ្យ។ នៅពេលទៅដល់អាកាសយានដ្ឋានទីក្រុងក្វាងចូវ មនុស្ស៧នាក់ត្រូវគ្រូពេទ្យផ្ដល់សេវាព្យាបាលផ្សេងៗ។ ក្នុងចំណោមនោះ អ្នកដំណើរ៤នាក់ និងបុគ្គលិកបម្រើការនៅក្នុងយន្តហោះ៣នាក់។ គិតត្រឹមម៉ោង៨:៣០យប់ អ្នកដំណើរម្នាក់បន្តស្នាក់នៅក្នុងមន្ទីរពេទ្យដើម្បីព្យាបាលមុខរបួស។
ក្រុមហ៊ុនអាកាសចរណ៍ខាងលើនេះថ្លែងបន្តទៀតថាអ្វីដែលជាចំណុចអាទិភាពរបស់ខ្លួនគឺការយកចិត្តទុកដាក់ខ្ពស់ចំពោះសុខុមាលភាពរបស់អតិថិជន និងបុគ្គលិករបស់ខ្លួន។ ក្រុមហ៊ុនត្រៀមផ្ដល់ការឧបត្ថម្ភគាំទ្រគ្រប់យ៉ាងទៅតាមតម្រូវការជាក់ស្ដែង។ តាមរយៈរូបថតជាច្រើនសន្លឹកដែលបង្ហោះដោយសារព័ត៌មានក្នុងស្រុក គេឃើញថាបុគ្គលិកសង្គ្រោះបន្ទាន់បានដឹកអ្នករបួសទៅព្យាបាលនៅមន្ទីរពេទ្យ។ កាសែតស្ទ្រេតថាម (Strait Times) ចុះផ្សាយថាយន្តហោះនោះចាកចេញដំណើរពីសិង្ហបុរីនៅម៉ោង៥:៤៥ព្រឹក និងទៅដល់ក្វាងចូវនៅម៉ោង៩:១០ព្រឹកថ្ងៃដដែល។
យោងតាមទិន្នន័យពីផ្កាយរណប យន្តហោះនោះហោះនៅក្នុងរយៈកម្ពស់២ម៉ឺនហ្វីត ឬប្រហាក់ប្រហែលនឹង៦គីឡូម៉ែត្រ និងល្បឿនជាង៩០០គីឡូម៉ែត្រក្នុងមួយម៉ោង។ នៅពេលកំពុងហោះហើរនៅលើអាកាសសុខៗ យន្តហោះនេះស្រាប់តែបើកធ្លាក់ជង្ហុកខ្យល់ ហើយធ្លាក់ចុះមកក្រោមជាច្រើនគីឡូម៉ែត្រ។ ក្រោយមកទើបយន្តហោះបើកឡើងទៅលើ និងរក្សារយៈកម្ពស់ដូចដើមវិញ។
ហេតុការណ៍នេះកើតឡើងមិនយូរប៉ុន្មានបន្ទាប់ពីយន្តហោះរបស់ក្រុមហ៊ុនអាកាសចរណ៍សិង្ហបុរីអ៊ែឡាញ (Singapore Airlines) ក៏ធ្លាប់ជួបនឹងហេតុការណ៍នេះផងដែរកាលពីខែឧសភា ឆ្នាំ២០២៤។ កាលនោះ យន្តហោះបើកធ្លាក់ជង្ហុកខ្យល់ និងធ្លាក់ចុះមកក្រោម ក្រឡាប់ចាក់ពេញអាកាសអស់ជាច្រើនគីឡូម៉ែត្រនៅម្ដុំព្រែកជីកក្រា (Kra Canal) ប្រទេសថៃ បណ្ដាលឱ្យអ្នកដំណើរម្នាក់ស្លាប់ និងជាច្រើននាក់ទៀតរងរបួស។
ជនរងគ្រោះដែលស្លាប់នោះជាបុរសជនជាតិអង់គ្លេសវ័យ៧៣ឆ្នាំ។ គាត់ស្លាប់ដោយសារគាំងបេះដូង។ អ្នកដំណើរ៧នាក់រងរបួសធ្ងន់។ សាក្សីនិយាយថាយន្តហោះនោះធ្លាក់ចុះមកក្រោមយ៉ាងលឿនស្លេវប្រៀបដូចគេចាប់គ្រវែងពីលើអាកាសតែម្ដង។ ពោលគឺត្រឹមតែរយៈពេលប៉ុន្មាននាទីប៉ុណ្ណោះ យន្តហោះធ្លាក់ពីលើមេឃជិត២គីឡូម៉ែត្រ។ អ្នកជិះនៅក្នុងយន្តហោះភ័យអស់ព្រលឹងព្រលះពីក្នុងខ្លួនអស់រលីងហើយ។ នៅក្នុងស្ថានភាពនោះ អាកាសយានិកត្រូវតែបង្ខំចិត្តបញ្ជាយន្តហោះចុះចតនៅព្រលានយន្តហោះប្រទេសថៃជាបន្ទាន់៕
ចែករំលែកព័តមាននេះ