រាជធានីភ្នំពេញ ៖ ដោយហេតុតែមានការនឹករលឹកដល់កូននិងចៅខ្លាំងពេក ហើយពុំដឹងពេលណាបានជួបកូនចៅ ព្រោះតែពួកគេជាប់រវល់ធ្វើការរកស៊ីនោះ ធ្វើឲ្យលោកតាម្នាក់សម្រេចចិត្តបានជិះរថយន្តឈ្នួលធ្វើដំណើរចាកចេញពីស្រុកកំណើតមកកាន់ផ្សារជម្ពូវ័ន ដើម្បីស្កាត់មកលេងកូនប្រុសច្បងម្នាក់ ទាំងដែលគាត់ពុំបានដឹងថាកូនរូបនោះស្នាក់នៅកន្លែងណាផង ។
ដោយកន្លងមកកូនគ្រាន់តែប្រាប់គាត់ថាស្នាក់នៅរកស៊ីលក់បន្លែនៅម្ដុំផ្សារជម្ពូវ័នតែប៉ុណ្ណោះ ហើយពេលមកដល់គ្រាន់តែចុះលើរថយន្តឈ្នួលភ្លាម ស្រាប់តែវង្វេងហើយពុំដឹងថាត្រូវទៅរកកូននៅកន្លែងណាឡើយ ។ ម្យ៉ាងគ្មានទូរស័ព្ទប្រើទៀត ដោយអស់សង្ឃឹមគាត់បានត្រឹមតែសម្រក់ទឹកភ្នែកប៉ុណ្ណោះ បន្ទាប់មកអ្នករត់កង់បីដឹកយកទៅកាន់សាលាសង្កាត់ចោមចៅទី៣ ដើម្បីឲ្យអាជ្ញាធរជួយស្រាវជ្រាវរកកូនគាត់ផង ។
អ្នកភូមិបានប្រទះឃើញលោកម្នាក់នោះកំពុងឈរយំ ក្នុងស្ថានភាពហេវហត់ កាលពីវេលាម៉ោង៥ល្ងាចថ្ងៃទី៥ ខែកញ្ញា ឆ្នាំ២០២៤ នៅតាមបណ្ដោយផ្លូវជាតិលេខ៤ ស្ថិតនៅក្នុងភូមិថ្នល់បំបែក សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
លោកតាបានរៀបរាប់ប្រាប់ថា លោកតាឈ្មោះផន ចេម អាយុ៧០ឆ្នាំ មុខបរកសិករ មានទីលំនៅភូមិត្នោតច្រុះ ឃុំល្វា ស្រុកព្រះស្ដេច ខេត្តព្រៃវែង លោកមានកូនប្រុសនិងស្រីចំនួន៤នាក់ ។ ប៉ុន្តែសព្វថ្ងៃកូនៗទាំងអស់បាននាំគ្នាមករស់នៅរកស៊ីធ្វើការនៅឯរាជធានីភ្នំពេញអស់ហើយ ដោយកូនប្រុសច្បងឈ្មោះចិត្រ លក់បន្លែនៅម្ដុំផ្សារជម្ពូវ័ន ។ ចំណែកកូន៣នាក់ទៀតធ្វើការរោងចក្រ ហើយលោកតាបានរស់នៅឯស្រុកកំណើតតែ២នាក់ចៅប្រុសអាយុជាង១០ឆ្នាំម្នាក់ទៀតប៉ុណ្ណោះ ។
លោកតាផន ចេម បានប្រាប់ឲ្យដឹងបន្តទៀតថា ក្រៅតែពីខែហេមន្តសន្តរដូវ ពេលដែលកូនៗចៅៗ ទំនេរពីការងាររកសុីទើបលោកតាបានជួបកូនៗចៅៗ បើមិនដូច្នេះទេមិនបានជួបឡើយព្រោះលោកតាអត់ចេះប្រើទូរស័ព្ទទើបរាល់ថ្ងៃអត់ដែលបាននិយាយសួរទុក្ខកូនចៅសោះ ។ លោកតាក៏មិនដែលបានយកលេខទូរស័ព្ទកូនទុកដែរ ប៉ុន្តែកន្លងមកពេលទៅលេងលោកតានៅខែមន្តសន្តរដូវកូនប្រុសច្បងរបស់លោកតាឈ្មោះចិត្រធ្លាប់បានប្រាប់លោកតាថា រូបគេស្នាក់នៅផ្ទះជួលនិងលក់បន្លែនៅម្ដុំផ្សារជម្ពូវ័ន ប៉ុន្តែលោកតាពុំដែលបានស្គាល់ឡើយ ។
លោកតាបានបានប្រាប់បន្ថែមទៀតថា ចំណែកឯកូន៣នាក់ទៀតប្រាប់ថាមកធ្វើការរោងចក្រនិងស្នាក់នៅរាជធានីភ្នំពេញ ប៉ុន្តែលោកតាពុំបានដឹងថា តើរោងចក្រនៅម្ដុំណា និងស្នាក់នៅផ្ទះជួលម្ដុំណានោះដែរ ។ ដោយបែកពីកូនចៅយូរពេកធ្វើឲ្យលោកតាមានការនឹករលឹកពួកគេជាខ្លាំង ទើបនៅព្រឹកថ្ងៃកើតហេតុ ក៏សម្រេចចិត្តជិះរថយន្តឈ្នួលក្នុងតម្លៃ២ម៉ឺនរៀល ។ ដោយប្រាប់អ្នកបើករថយន្តថាចុះនៅផ្សារជម្ពូវ័ន ដើម្បីស្កាត់មកលេងកូនប្រុសច្បងឈ្មោះចិត្រ និងចង់ស្គាល់កន្លែងស្នាក់នៅព្រមទាំងសុខទុក្ខកូន៣នាក់ទៀតផងដែរ ។
លុះពេលមកដល់រកកូនមិនឃើញឡើយ ព្រោះអត់ស្គាល់ផ្ទះជួលដែលកូនស្នាក់នៅ ជាហេតុធ្វើឲ្យគាត់អស់សង្ឃឹម និងហួសចិត្តខ្លួនឯងយ៉ាងខ្លួនបានត្រឹមតែស្រកទឹកភ្នែកដោយមិនដឹងខ្លួន ។
អ្នកភូមិថ្នល់បំបែកបាននិយាយថា ទឹកចិត្តឪពុកពិតជាមានធំធេងលើកូនៗនិងចៅណាស់ ហើយលោកតាខាងលើពិតជាគួរឲ្យអាណិតខ្លាំងណាស់ ទោះជាគាត់មិនបានដឹងថាកូនរស់នៅកន្លែងណាផង ព្រោះតែក្ដីនឹករលឹកខ្លាំងពេក គាត់សុខចិត្តស្កាត់មកលេងដែរ ។ ពេលនោះរកមិនឃើញគាត់បានឈរយំគួរឲ្យអាណិត ហើយពេលឃើញស្ថានភាពបែបនេះ ពួកគាត់ក៏បានទៅសួរនាំគ្នាសួរនាំ លោកតាក៏បានប្រាប់តាមដំណើររឿង ។
ដោយមានការអាណិតអាសូរគាត់ក៏បានទិញចំណីអាហារជូនគាត់ពិសារ បន្ទាប់មកអ្នករត់ម៉ូតូកង់បីបានជួយដឹកគាត់យកទៅកាន់សាលាសង្កាត់ចោមចៅទី៣ ដើម្បីឲ្យអាជ្ញាធរជួយស្រាវជ្រាវរកកូនរបស់លោកតា ទៅទទួលយកលោកតាផង ៕
ចែករំលែកព័តមាននេះ