រាជធានីភ្នំពេញ ៖ ដោយមានការយកចិត្តទុកដាក់គិតគូរពីសុខមាលភាពរបស់ប្រជាពលរដ្ឋពីសំណាក់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងដោយមានការចង្អុលបង្ហាញពីលោក ឃួង ស្រេង អភិបាល…
រាជធានីភ្នំពេញ ៖ ដោយមានការយកចិត្តទុកដាក់គិតគូរពីសុខមាលភាពរបស់ប្រជាពលរដ្ឋពីសំណាក់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងដោយមានការចង្អុលបង្ហាញពីលោក ឃួង ស្រេង អភិបាល នៃគណៈអភិបាលរាជធានីភ្នំពេញ មន្ទីរសុខាភិបាលរាជធានីភ្នំពេញ សហការជាមួយក្រុមការងារកងពលតូច (ង៧០) គិតត្រឹមថ្ងៃទី១៩ ខែសីហា ឆ្នាំ២០២៤នេះ យុទ្ធនាការ នៃការបាញ់ថ្នាំមូស សម្រេចបាន៣៧សង្កាត់ លើ១០៥សង្កាត់ ក្នុង៧ខណ្ឌ លើ១៤ខណ្ឌ ហើយ នៅក្នុងមូលដ្ឋានរាជធានីភ្នំពេញ ។
លោកវេជ្ជបណ្ឌិត ងី មានហេង ប្រធានមន្ទីរសុខាភិបាលរាជធានីភ្នំពេញ បានឱ្យដឹងនៅថ្ងៃ២០ ខែសីហានេះថា លទ្ធផល នៃយុទ្ធនាការបាញ់ថ្នាំមូស ក្នុងមូលដ្ឋានរាជធានីភ្នំពេញ គិតត្រឹមថ្ងៃទី១៩ ខែសីហា ឆ្នាំ២០២៤នេះ សម្រេចបាន៣៧សង្កាត់ លើ១០៥សង្កាត់ ក្នុង៧ខណ្ឌ ១៤ខណ្ឌហើយ ដែលបើកយុទ្ធនាការចាប់ពីថ្ងៃសៅរ៍ ទី១៧ ខែសីហា រហូតមកដល់ថ្ងៃទី១៩ ខែសីហា ។
លោកប្រធានបន្តថា ដោយឡែកនៅថ្ងៃទី១៩ សីហានេះ ក្រុមការងាររបស់យើងបានបាញ់ថ្នាំមូស បានចំនួន១២សង្កាត់បន្ថែមទៀត ដែលមាននៅក្នុងមូលដ្ឋានខណ្ឌដូនពេញ ខណ្ឌឫស្សីកែវ ខណ្ឌមានជ័យ ខណ្ឌសែនសុខ ខណ្ឌទួលគោក ខណ្ឌបឹងករងកង និងខណ្ឌពោធិ៍សែនជ័យ ក្នុងនោះរួមមាន ៖ សង្កាត់បឹងទំពុនទី១, សង្កាត់បឹងទំពុនទី២, សង្កាត់កាកាបទី១, សង្កាត់គោកឃ្លាង, សង្កាត់ទឹកល្អក់ទី២, សង្កាត់គីឡូម៉ែត្រលេខ៦, សង្កាត់ទឹកល្អក់ទី៣, សង្កាត់បឹងកេងកងទី៣, សង្កាត់អូឡាំពិច, សង្កាត់ផ្សារកណ្តាលទី២, សង្កាត់ជ័យជំនះ, សង្កាត់ផ្សារថ្មីទី១ ។
គួររំលឹកថា លោក ឃួង ស្រេង អភិបាលរាជធានីភ្នំពេញ កាលពីថ្ងៃទី១៧ សីហា ពោលគឺចំថ្ងៃបើកយុទ្ធនាការបាញ់ថ្នាំមូស ក្នុងរាជធានីភ្នំពេញ លោកបានណែនាំរួចហើយ ដោយអោយកងពលតូចលេខ៧០ និងមន្ទីរសុខាភិបាលរាជធានីភ្នំពេញ បាញ់ថ្នាំសម្លាប់មូសនេះ អោយបានគ្រប់ទីកន្លែង នៅក្នុងមូលដ្ឋានរាជធានីភ្នំពេញ ពិសេសនៅតំបន់ ដែលមានហានិភ័យខ្ពស់ ដើម្បីបង្ការទប់ស្កាត់ជំងឺគ្រុនឈាម ជូនប្រជាពលរដ្ឋ ។
លោកអភិបាលបន្តថា ការងារបាញ់ថ្នាំសម្លាប់មូសនេះ មើលទៅតូចទេ តែវាបានផ្តល់ផលប្រយោជន៍ច្រើនសម្រាប់ប្រជាពលរដ្ឋ ពោលគឺបាញ់ថ្នាំសម្លាប់មូស អាចបង្ការទប់ស្កាត់ជំងឺគ្រុនឈាម បើយើងមិនបានបង្ការទប់ស្កាត់ទេ វានឹងធ្វើអោយក្មេងមានជំងឺគ្រុនឈាម កាលណាកើតមានជំងឺគ្រុនឈាមលើកូនរបស់ខ្លួនហើយ យើងត្រូវខាតបង់ពេលវេលា ក្នុងការមើលថែកូនផង និងត្រូវខាតបង់លុយកាក់ថែមទៀត ៕
ចែករំលែកព័តមាននេះ