វិស័យសំណង់នៅឆ្នាំ២០២៤នេះ ត្រូវបានរំពឹងថា នឹងងើបឡើងក្នុងល្បឿនទាបជាមួយនឹងអត្រាកំណើនត្រឹមតែ១,១ភាគរយប៉ុណ្ណោះ ដោយសារវិស័យសំណង់ និងអចលនទ្រព្យតម្លៃថ្លៃនៅទ្រឹង ហើយតម្លៃថោក និងមធ្យមកម្រើកតិចតួច ។ របាយការណ៍ស្តីអំពីលទ្ធផលនៃការអនុវត្តថវិកាឆមាសទី១ និងការវា.យតម្លៃលើការអនុវត្តច្បាប់ស្តីពីហិរញ្ញវត្ថុ…
វិស័យសំណង់នៅឆ្នាំ២០២៤នេះ ត្រូវបានរំពឹងថា នឹងងើបឡើងក្នុងល្បឿនទាបជាមួយនឹងអត្រាកំណើនត្រឹមតែ១,១ភាគរយប៉ុណ្ណោះ ដោយសារវិស័យសំណង់ និងអចលនទ្រព្យតម្លៃថ្លៃនៅទ្រឹង ហើយតម្លៃថោក និងមធ្យមកម្រើកតិចតួច ។
របាយការណ៍ស្តីអំពីលទ្ធផលនៃការអនុវត្តថវិកាឆមាសទី១ និងការវា.យតម្លៃលើការអនុវត្តច្បាប់ស្តីពីហិរញ្ញវត្ថុ សម្រាប់ការគ្រប់គ្រងឆ្នាំ២០២៤ ដែលបានចេញផ្សាយ កាលពីពេលថ្មីៗនេះបានអះអាងថា សំណង់លំនៅស្ថានថ្លៃទាប និងមធ្យមដែលជាជន្ទល់កំណើនសំខាន់សម្រាប់វិស័យនេះជារួម គឺមាននិន្នាការថមថយមួយផ្នែកធំ ដោយសារការបន្តថមថយតម្រូវការទិញ និងលក់ ព្រមទាំងបញ្ហារំហូរសាច់ប្រាក់របស់ក្រុមហ៊ុនអភិវឌ្ឈន៍លំនៅស្ថាន ទោះបីជាការនាំចូលគ្រឿងសម្ភារៈសំណង់កើនឡើងក៏ដោយ ។
ដោយឡែក សម្រាប់សំណង់ថ្លៃខ្ពស់វិញ ប្រភពដដែលបានបន្តថា កំពុងបន្តស្ថិតនៅក្នុងស្ថានភាពនៅទ្រឹង ដោយសារតែសំណង់ប្រភេទនេះពឹងផ្អែកខ្លាំងលើរំហូរវិនិយោគពីបរទេស ។
ពាក់ព័ន្ធនឹងការនាំចូលគ្រឿងសំណង់វិញប្រភពដដែល បានឲ្យដឹងថា នៅឆមាសទី១ នៃឆ្នាំ២០២៤ ការនាំចូលគ្រឿងសម្ភារៈសំណង់សរុបមានអត្រាវិជ្ជមានក្នុងរង្វង់៥ភាគរយធៀបនឹង-០,២ភាគរយ ក្នុងរយៈពេលដូចគ្នា កាលពីឆ្នាំមុន ។ ទន្ទឹមនឹងនេះបរិមាណផលិតកម្មស៊ីម៉ង់ ក្នុងស្រុកកើនបន្តិចប្រមាណជា៥,៥ភាគរយនៅក្នុងរយៈពេលដដែលធៀបនឹងការធ្លាក់ចុះ-១៤,៣ភាគរយ ពោល គឺកើនឡើងពី៣,៩៥លានតោនទៅ៤,១៧លានតោន ។
នៅក្នុងស្ថានភាពនេះ អ្នកនាង អាន សុធីតា នាយិកាក្រុមហ៊ុន PropNex Cambodia បានអោយដឹងថា អ្នកមានបំណងចង់វិនិយោគលើវិស័យអចលនទ្រព្យក្នុងពេលបច្ចុប្បន្ននេះ ពួកគាត់ត្រូវមើលលើកត្តាជាច្រើនមុននឹងសម្រេចចិត្តវិនិយោគលើវិស័យអចលនទ្រព្យ ។ អ្នកនាង អាន សុធីតា បានអោយកម្មវិធីលុយនៃសារព័ត៌មានកោះសន្តិភាពដឹងនៅថ្ងៃទី១៤ ខែសីហា ឆ្នាំ២០២៤ថា «កត្តាទី១ ដែលគាត់ត្រូវពិចារណា គឺកត្តា ការផ្គត់ផ្គង់ហើយ និងតម្រូវការនៅលើទីផ្សារទាំងមូលតែម្តង ។ គាត់ត្រូវដឹងពីស្ថានភាពបច្ចុប្បន្នភាពរបស់ទីផ្សារបច្ចុប្បន្ន តើវាបែបណាដែរ នៅក្នុងទីផ្សារអចលនទ្រព្យ? តើអ្វីដែលគាត់គួរវិនិយោគអ្វី?» ។
អ្នកជំនាញវិស័យអចលនទ្រព្យរូបនេះបន្តថា «ចំណុចទី២ អ្នកវិនិយោគវិស័យអចលនទ្រព្យ គឺត្រូវដឹងពីហេដ្ឋារចនាសម្ព័នស្ថានភាពសេដ្ឋកិច្ច ស្ថានភាពនយោបាយ ដែលមានឥទ្ធិពលលើវិស័យអចលនទ្រព្យ អោយច្បាស់លាស់ជាមុននឹងធ្វើការវិនិយោគ» ។
អ្នកនាង អាន សុធីតា បន្ថែមថា អ្វីដែលអ្នកវិនិយោគត្រូវមើលមួយទៀត គឺថ្លៃដើមក្នុងការវិនិយោគលើវិស័យអចលនទ្រព្យ ។ ជាទូទៅការវិនិយោគនីមួយៗសុទ្ធតែចង់បានប្រាក់ចំណេញ តែវិស័យអចលនទ្រព្យ ក៏នៅមានថ្លៃដើមជាច្រើន ដែលអ្នកវិនិយោគត្រូវដឹងពីការចំណាយដែលជាកត្តាជះឥទ្ធិពលលើការវិនិយោគ ។
អ្នកនាង អាន សុធីតា បន្តថា «ការដឹងពីព័ត៌មាន និងការភ្ជាប់ទំនាក់ទំនងមានន័យថា គាត់ត្រូវតែធ្វើការជិតស្និទជាមួយអ្នកជំនាញអចលនទ្រព្យ ដើម្បីទទួលបានព័ត៌មានទាន់ពេលពីវិស័យអចលនទ្រព្យ និងបន្ថែមចំណេះជំនាញខ្លួនឯងលើវិស័យនោះ ព្រោះនៅពេលដែលគាត់យល់ដឹង ពីវិស័យហ្នឹងកាន់តែច្បាស់ធ្វើអោយគាត់ជៀសវាងពីហានិភ័យ»៕
ចែករំលែកព័តមាននេះ