រាជធានីភ្នំពេញ ៖ បុរសម្នាក់បានរងរបួសយ៉ាងធ្ងន់ធ្ងររហូតបាត់បង់ជីវិតពេលបញ្ជូនទៅសង្គ្រោះនៅមន្ទីរពេទ្យ បន្ទាប់ពីបើករថយន្តកុងតឺន័រលឿន ជ្រុលទៅបុករថយន្តកុងតឺន័រមួយគ្រឿងទៀតដែលខូចឈប់ចតនៅលើផ្លូវពេញទំហឹង កាលពីវេលាម៉ោង២និង៥០នាទីរំលងអាធ្រាតឈានចូលថ្ងៃទី១៧ខែសីហា ឆ្នាំ២០២៤ នៅតាមបណ្តោយផ្លូវជាតិលេខ៥ ទល់មុខវត្តជោត្តមង្គល(ហៅវត្តព្រែកព្នៅ) ស្ថិតនៅភូមិផ្សារលិច…
រាជធានីភ្នំពេញ ៖ បុរសម្នាក់បានរងរបួសយ៉ាងធ្ងន់ធ្ងររហូតបាត់បង់ជីវិតពេលបញ្ជូនទៅសង្គ្រោះនៅមន្ទីរពេទ្យ បន្ទាប់ពីបើករថយន្តកុងតឺន័រលឿន ជ្រុលទៅបុករថយន្តកុងតឺន័រមួយគ្រឿងទៀតដែលខូចឈប់ចតនៅលើផ្លូវពេញទំហឹង កាលពីវេលាម៉ោង២និង៥០នាទីរំលងអាធ្រាតឈានចូលថ្ងៃទី១៧ខែសីហា ឆ្នាំ២០២៤ នៅតាមបណ្តោយផ្លូវជាតិលេខ៥ ទល់មុខវត្តជោត្តមង្គល(ហៅវត្តព្រែកព្នៅ) ស្ថិតនៅភូមិផ្សារលិច សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ ។
រថយន្តកុងតឺន័រដែលខូចឈប់ចត ម៉ាកហ៊ីយ៉ាន់ដាយ ពណ៌ទឹកប្រាក់ ពាក់ស្លាកលេខ ត្បូងឃ្មុំ 3A-1817 ឈប់ចតក្នុងទិសដៅពីជើងទៅត្បូង ។ ចំណែករថយន្តកុងតឺន័រមួយគ្រឿង មិនស្គាល់ម៉ាកខូចខ្ទេច ពាក់ស្លាកលេខ ចង្កូតស្តាំ PP-0202 បើកបរដោយបុរសម្នាក់ក្នុងទិសដៅពីជើងទៅត្បូង ។
បុរសដែលស្លាប់ឈ្មោះ ហេង ពុទ្ធី អាយុ៤១ឆ្នាំ មុខរបរបើករថយន្ត មានស្រុកកំណើត នៅភូមិគីឡូលេខបួន ឃុំមោង ស្រុកមោងឫស្សី ខេត្តបាត់ដំបង ។
តាមប្រភពព័ត៌មានពីកន្លែងកើតហេតុបាននិយាយប្រាប់ថា នៅមុនពេលកើតហេតុ គេឃើញ រថយន្តកុងតឺន័រមួយគ្រឿង ម៉ាកហ៊ីយ៉ាន់ដាយ ពណ៌ទឹកប្រាក់ ពាក់ស្លាកលេខ ត្បូងឃ្មុំ 3A-1817 ឈប់ចតនៅលើផ្លូវតាំងពីកណ្ដាលយប់ ដោយសារបងប្អូនប្រជាពលរដ្ឋបានប្រាប់ថារថយន្តខាងលើខូច ហើយម្ចាស់រថយន្តកំពុងជួសជុល លុះបន្ទាប់មកក៏ស្រាប់តែឃើញរថយន្តរងគ្រោះប្រភេទកុងតឺន័រដូចគ្នា ធ្វើដំណើរតាមបណ្ដោយផ្លូវជាតិលេខ៥ក្នុងទិសដៅពីជើងទៅត្បូងក្នុងល្បឿនយ៉ាងលឿនលុះបើកមកដល់ចំណុចកើតហេតុដោយមិនបានមើលមុខក៏ជ្រុលទៅបុករថយន្តខូចឈប់ចតនៅលើផ្លូវពេញទំហឹង បណ្តាលឲ្យជនរងគ្រោះគៀបជាប់នៅក្នុងកាប៊ីនរថយន្តរងរបួសយ៉ាងធ្ងន់ធ្ងរ ចំណែករថយន្តរងគ្រោះវិញរងការខូចខាតយ៉ាងធ្ងន់ធ្ងរផ្នែកខាងមុខស្ទើរទាំងស្រុង។
តាមប្រភពព័ត៌មានពីកន្លែងកើតហេតុបានបន្តទៀតថា ខណៈពេលគ្រោះថ្នាក់ភ្លាមៗជនរងគ្រោះ ត្រូវបានបងប្អូនប្រជាពលរដ្ឋនាំគ្នាជួយគាស់ដើម្បីយកជនរងគ្រោះក្នុងនោះពេលភ្លាមៗផងដែរ ដោយមានរថយន្តសង្គ្រោះរបស់មន្ទីរពេទ្យបង្អែកខណ្ឌព្រែកព្នៅ បានមកដល់ចំណុចកើតហេតុភ្លាមៗ ដោយឃើញស្ថានភាពជនរងគ្រោះគៀបជាប់នៅក្នុងកាប៊ីនរថយន្ត ខាងក្រុមរថយន្តសង្គ្រោះបានយកអ៊ុកស៊ីសែនដើម្បីជួយសង្គ្រោះបឋមភ្លាមៗផងដែរ តែទំរាំយកជនរងគ្រោះចេញពីរថយន្ដអស់រយៈពេលជិត១ម៉ោងហើយបានយកទៅសង្គ្រោះបន្ទាន់នៅមន្ទីរពេទ្យតេជោសន្តិភាពភ្លាមៗ តែជនរងគ្រោះរងរបួសធ្ងន់ធ្ងរ ក្រុមគ្រូពេទ្យបានបញ្ជូនបន្តទៅមន្ទីរពេទ្យរាជធានីភ្នំពេញ តែជាអកុសលជនរងគ្រោះបានស្លាប់នៅលើរថយន្តសង្គ្រោះផងដែរ ។
ក្រោយពេលកើតហេតុ សពជនរងគ្រោះខាងលើត្រូវបាននគរបាលជំនាញការិយាល័យចរាចរណ៍ផ្លូវគោករាជធានីភ្នំពេញ ធ្វើលិខិតប្រគល់សពអោយក្រុមគ្រួសារដើម្បីទៅធ្វើបុណ្យតាមប្រពៃណីនៅស្រុកកំណើត ៕
ចែករំលែកព័តមាននេះ