រាជធានីភ្នំពេញ ៖ វាមិនមែនជារឿងធម្មតានោះទេ ដែលបុរសខ្មែរម្នាក់អាចទទួលបានការគាំទ្រយ៉ាងខ្លាំង ទៅលើទឹកដៃនៃការឆ្លាក់រូបភាពរស់រវើក នៅលើស្បែកគោ រហូតលោកអាចលក់ចម្លាក់ឆ្លាក់លើស្បែកគោបានប្រមាណជា១៥០០ផ្ទាំងក្នុងមួយឆ្នាំ ។ ស្តាប់ទៅ ពិតជាអស្ចារ្យសម្រាប់បុរសនៅទឹកដីអង្គររូបនេះ…
រាជធានីភ្នំពេញ ៖ វាមិនមែនជារឿងធម្មតានោះទេ ដែលបុរសខ្មែរម្នាក់អាចទទួលបានការគាំទ្រយ៉ាងខ្លាំង ទៅលើទឹកដៃនៃការឆ្លាក់រូបភាពរស់រវើក នៅលើស្បែកគោ រហូតលោកអាចលក់ចម្លាក់ឆ្លាក់លើស្បែកគោបានប្រមាណជា១៥០០ផ្ទាំងក្នុងមួយឆ្នាំ ។
ស្តាប់ទៅ ពិតជាអស្ចារ្យសម្រាប់បុរសនៅទឹកដីអង្គររូបនេះ តែលោកបែរជាស្នើសុំឱ្យមានការគាំទ្របន្ថែមទៀត ពិសេសពីសំណាក់ប្រជាជនខ្មែរតែម្តង ព្រោះការលក់ដូររបស់លោកកន្លងមក គឺទទួលបានការគាំទ្រពីជនបរទេសតែប៉ុណ្ណោះ ។
ប្រាកដណាស់ ក្នុង១ឆ្នាំ អាចលក់ដាច់ចម្លាក់ស្បែកគោ បានខ្ទង់ ១៥០០ផ្ទាំងទៅអោយភ្លៀវទេសចរបរទេសជារឿងមួយដែលប្រពៃ ព្រោះទីផ្សារល្អប្រសើរ ។ ប៉ុន្តែហេតុអ្វីក៏ខ្វះការគាំទ្រ ពីសំណាក់អតិថិជនក្នុងស្រុកទៅវិញ ។
មុនលម្អិតលើចំណុចនេះ យើងសូមណែនាំ បុរសម្នាក់រស់នៅទឹកដីអង្គរខេត្តសៀមរាប ដែលជាជាងចម្លាក់មានទឹកដៃអស្ចារ្យម្នាក់ក៏ដូចជា មកស្គាល់ពីចម្លាក់ស្បែកគោ ដែលបុរសម្នាក់នេះបានរៀនសូត្រ តាំងពីក្មេង ដោយនាពេលបច្ចុប្បន្នកំពុងតែសាងភាពទាក់ទាញខ្លាំង ក្នុងបណ្តាញសង្គមយក្ស Tik Tok ដោយចម្លាក់មួយនេះ មានបងប្អូនមួយចំនួនពុំទាន់បានដឹង ព្រោះយើងធ្លាប់ឃើញតែចម្លាក់លើផ្ទាំងប្រាសាទថ្ម ចម្លាក់ឈើជាដើមនោះ ។
តាមរយៈឃ្លីបវីដេអូរូបភាពឈ្មោះ«គឹមឈុយចម្លាក់ស្បែកគោ» ដែលតែងបង្ហោះពីទឹកដៃរបស់លោកនោះពិតជាទទួលបានការគាំទ្រខ្លាំងតាមរយៈចម្លាក់ដែលលោកបានបង្ហាញ ព្រោះរូបដែលលោកបានធ្វើចេញមួយៗផ្ទាំង គឺផុសចេញមកពិតជាស្រស់សោភា ដោយមានរំលេចក្បាច់រចនាជារូបភាពផ្សេងៗ ប្រកបដោយសីលមន្តរស់រវើក ផុសអណ្តែង អន្ទងចិត្តអ្នកទស្សនា សម្តែងការស្រឡាញ់ពេញចិត្ត និងការកើតសរសើរ ពីស្នាដៃចម្លាក់ពីស្បែកសត្វរបស់លោកគ្រប់ៗគ្នា ។
ក្នុងនោះដែរ តាមរយៈចម្លាក់លើស្បែកសត្វនេះ លោកអាចឆ្លាក់ចេញជារូបភាពជាច្រើនក្នុងនោះរួមមានចម្លាក់កូរសមុទ្រទឹកដោះ រាមកេរ្តិ៍ រូបព្រះបាទជ័យវរ្ម័នទី២ អប្សរាហនុមានជាដើមនោះ គួរបញ្ជាក់ដែលក្រៅពីនេះក៏មានចម្លាក់ជាដើមទៀត ដែលបានឆ្លាក់ចេញមក ប្រសិនបើប្អូនចង់កម្មង់អាចធ្វើការជាវបាន ។
តាមរយៈបទសម្ភាសន៍ជាមួយសារព័ត៌មានកោះសន្តិភាព ដោយលោក ខា គឹមឈុយ ដែលជាជាងចម្លាក់លើស្បែក លោកបានជម្រាបជូនថា លោកពិតជាសប្បាយចិត្ត នៅពេលដែលបងប្អូនចូលចិត្តចម្លាក់របស់លោកផ្ទាល់ដែលមានទីតាំងស្ថិតនៅឃុំបាគង ស្រុកប្រាសាទបាគង ខេត្តសៀមរាម ។
តាមរយៈចម្លាក់ទាំងនេះទៀតសោត លោកបានបង្ហើបអោយដឹងពីប្រវត្តិរបស់លោកខ្លះៗថា លោកបានរៀនអំពីចម្លាក់នេះរយៈពេល១២ឆ្នាំ ដោយចាប់តាំងពីកុមារភាព ហើយនាពេលបច្ចុប្បន្ននេះលោកក៏បានចាប់យកអាជីពជាជាងចម្លាក់នេះ រយៈពេលជិត១ឆ្នាំ ដោយទទួលបានការគាំទ្រច្រើនអាចអោយលោកទទួលបានចំណូលគួរសម្យក្នុងការផ្គត់ផ្គង់ជីវភាពគ្រួសារ ។
ចំពោះតម្លៃទាក់ទងនឹងចម្លាក់ធ្វើពីស្បែកសត្វគោនេះទៀតសោត លោកបានជម្រាបជូនថា គិតតាមទំហំ ដោយទំហំតូច មានតម្លៃចាប់ពី ១ដុល្លារ ២ដុល្លារ ឬ៣ដុល្លារ រហូតដល់ទំហំធំ៥០០ដុល្លារ និង១០០០ដុល្លារ ។ លោក គឹមឈុយ ដែលជាជាងដែលចេះជំនាញខាងចម្លាក់នេះ តាំងពីក្មេង លោកបានបន្តថា លោកពិតមានមោទនភាព ចំពោះស្នាដៃបុព្វបុរសខ្មែរ ដែលបានបន្សល់ទុកនៅស្នាដៃទាំងអស់នេះ ពោលច្នៃរបស់ដែល«គ្មានតម្លៃ ក្លាយជារបស់ដែលមានតម្លៃ» ។
បន្ថែមពីនេះ លោកបន្តថា តាមរយៈចម្លាក់នេះ វាពុំងាយស្រួលនោះឡើយ ព្រោះមានច្រើនដំណាក់កាល ទម្រាំលេចចេញជារូបរាងមួយផ្ទាំង ពោលទាមទារការអត់ធ្មត់ច្រើន ប្រសិនបើឆ្លាក់ទៅខុស គឺដឹងតែបោះចោលហើយ ដោយពុំមានអ្វីជាការប៉ះពៅបាននោះឡើយ ។
គួរបញ្ជាក់ដែរថា ចំពោះស្បែកគោដែលលោកបានទិញយកមក ដើម្បីកែច្នៃធ្វើជាចម្លាក់នេះ លោកថា វាមានតម្លៃ១គីឡូ២០០០រៀល ដោយក្នុងសត្វគោមួយក្បាល ជួនកាលមានស្បែកគោ២០គីឡូ ៣០គីឡូ ៤០គីឡូ និងជួនកាលមានទម្ងន់រហូតដល់៥០គីឡូ ដូច្នេះបងប្អូនអាចធ្វើការកម្មង់ជាវបានទៅតាមទំហំ និងរូបដែលចង់បាន ។
ជាចុងក្រោយ លោក ខា គឹមឈុយ សូមអរគុណបងប្អូនមហាជនសម្រាប់ការគាំទ្រ ចម្លាក់ស្នាដៃកូនខ្មែរនៃទឹកដីសៀមរាបអង្គរ ដែលជាស្នាដៃដ៏ពិសិដ្ឋមួយនេះ ក៏ដូចគាំទ្រស្នាដៃកូនខ្មែរ និងផលិតផលក្នុងស្រុក៕ ដោយ៖លីហួ គីមឆាយ
ចែករំលែកព័តមាននេះ