ខេត្តកំពង់ចាម ៖ «ក្រសួងអប់រំមិនបានហាមឃាត់លោកគ្រូ អ្នកគ្រូ ឲ្យបើកម៉ោងបង្រៀនគួរសិស្សនោះទេ ហើយក៏មិនត្រូវយកមេរៀនដែលរៀនគួរនោះមកចេញក្នុងម៉ោងប្រឡងនៅសាលារដ្ឋដែរ» នេះជាប្រសាសន៍លើកឡើងរបស់ឯកឧត្តម បណ្ឌិតសភាចារ្យ ហង់ ជួនណារ៉ុន…
ខេត្តកំពង់ចាម ៖ «ក្រសួងអប់រំមិនបានហាមឃាត់លោកគ្រូ អ្នកគ្រូ ឲ្យបើកម៉ោងបង្រៀនគួរសិស្សនោះទេ ហើយក៏មិនត្រូវយកមេរៀនដែលរៀនគួរនោះមកចេញក្នុងម៉ោងប្រឡងនៅសាលារដ្ឋដែរ» នេះជាប្រសាសន៍លើកឡើងរបស់ឯកឧត្តម បណ្ឌិតសភាចារ្យ ហង់ ជួនណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍នៅក្នុងឱកាសជួបសំណេះសំណាលជាមួយលោកគ្រូ អ្នកគ្រូ មន្ត្រីរាជការ នាព្រឹកថ្ងៃទី១២សីហា ឆ្នាំ២០២៤ ដោយធ្វើឡើង នៅសាលប្រជុំនៃមន្ទីរអប់រំយុវជន និងកីឡា ខេត្តកំពង់ចាម ។ ក្នុងឱកាសនោះ គឺមានការចូលរួមពីសំណាក់ឯកឧត្តមអ៊ុន ចាន់ដា អភិបាលខេត្ត លោកអភិបាលស្រុក-ក្រុងទាំង១០ក្នុងខេត្ត។
រដ្ឋមន្ត្រីក្រសួងអប់រំយុវជន និងកីឡា មានប្រសាសន៍ដោយគូសបញ្ជាក់ថា: រាជរដ្ឋាភិបាលកម្ពុជាអាណត្តិទី៧នេះ គឺបានបន្តវេនពីសម្ដេចតេជោ ហ៊ុន សែន អតីតនាយករដ្ឋមន្ត្រី ដែលបានបញ្ចប់នៅភ្លើងសង្គ្រាមអស់រយៈពេលជាង៣ទសវត្សរ៍ បាននាំមកនូវសុខសន្តិភាពពាសពេញប្រទេស ។ ជាមួយនោះដែរ វិស័យអប់រំសិក្សាធិការពីមួយអាណត្តិ ទៅមួយអាណត្តិ ត្រូវបានគេមើលឃើញមានការរីកចម្រើនគួរឲ្យកត់សម្គាល់ ។
ឯកឧត្តម ឧបនាយករដ្ឋមន្ត្រីរដ្ឋមន្ត្រីក្រសួងអប់រំ មានប្រសាសន៍បន្តទៀតថា ក្នុងរយៈពេល២៥ឆ្នាំ កន្លងទៅនេះ ខឿនសេដ្ឋកិច្ចជាតិរបស់កម្ពុជា គឺមានការអភិវឌ្ឍក្នុងកំណើន៨% ហើយវិស័យហេដ្ឋារចនាសម្ព័ន្ធនានា មានការរីកចម្រើនគួរឲ្យកត់សម្គាល់ដោយឡែកនៅក្នុងខេត្តកំពង់ចាម ក្រោមការដឹកនាំរបស់ឯកឧត្តមអ៊ុន ចាន់ដា អភិបាលខេត្ត គឺមានសាលារៀនគំរូក្នុងចំណោមសាលាទាំងប្រាំនៅទូទាំងប្រទេសកម្ពុជា ។
គួររំលឹកថា ផ្លូវជាតិលេខ៧ តភ្ជាប់ពីក្បាលស្ពានគីហ្ស៊ុណា ត្រូវបានស្ថាបនាដោយជំនួយឥតសំណងរបស់ប្រទេសជប៉ុន ។ នៅក្នុងអំឡុងឆ្នាំ១៩៩២ ដែលរហូតមកដល់ពេលនេះមានរយៈពេលជិត៣០ឆ្នាំ ដោយសារតែកំណើនយានយន្ត និងពលរដ្ឋមានការកើនឡើងដែលតម្រូវឲ្យមានការពង្រីកផ្លូវជាតិលេខ៧នេះ ចំនួនពីរគន្លងទៅ ជាបួនគន្លង មានលក្ខណៈធំទូលាយ ដែលជួយជំរុញឲ្យខឿនសេដ្ឋកិច្ចជាតិតាមរយៈការដឹកជញ្ជូនតាមផ្លូវគោក គឺមានការរីកចម្រើន ។
ដោយឡែកវិទ្យាល័យកំពង់ចាម ដែលជាសាលាគំរូ ដូច្នេះ និងត្រូវយកទៅអនុវត្តនៅតាមបណ្ដាខេត្តផ្សេងទៀត នៅក្នុងប្រទេសកម្ពុជា ជាមួយនោះនៅស្រុកកងមាស គឺមានវិទ្យាល័យពាមជីកង ត្រូវបានប្រែក្លាយជាសាលាជំនាន់ថ្មី គឺមានលក្ខណៈស្អាតទាំងសាលា និងបរិស្ថាន ។
ក្នុងនាមរូបលោកជាប្រធានក្រុមការងារចុះជួយមូលដ្ឋានស្រុកកងមាស ក៏បានជួយពង្រឹងដល់វិទ្យាល័យខ្ចៅវិទ្យាល័យកងតាណឹង ជាមួយនោះបានហៅគ្រូបង្រៀនសុទ្ធតែល្បីឈ្មោះនៅរាជធានីភ្នំពេញ មកឲ្យជួយបង្រៀនសិស្សថ្នាក់ទី១២ ដែលនឹងត្រៀមប្រឡងក្នុងរយៈពេលមួយខែ ដើម្បីឲ្យពួកគាត់មានចំណេះដឹងកាន់តែល្អប្រសើរជាងមុន ។ ជាលទ្ធផលប្រឡងបាក់ឌុបចេញមក គឺមានការប្រែប្រួលច្រើន គឺធ្វើឲ្យអត្រាសិស្សប្រឡងជាប់ពីក្នុងរង្វង់៤៥% កើនរហូតដល់៩៥% ចំណែកសិស្សដែលជាប់និទ្ទេសA មានតែចំនួន៣ នាក់។
ឧបនាយករដ្ឋមន្ត្រីរដ្ឋមន្ត្រីក្រសួងអប់រំបានបន្ថែមថា ហើយសិស្សដែលប្រឡងជាប់មានចំនួន១០០០នាក់ ត្រូវបានផ្ដល់អាហាររូបករណ៍ឲ្យទៅរៀននៅតាមសាកលវិទ្យាល័យមហាវិទ្យាល័យនានាក្នុងរាជធានីភ្នំពេញ តាមការសង្កេតដោយផ្ទាល់ពួកគាត់មានការប្រែប្រួលច្រើនពីរបៀបរស់នៅអ្នកស្រុកស្រែចម្ការមកអ្នករស់នៅទីក្រុង ។
ជាមួយនោះ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក៏បានដាក់ចេញគោលការណ៍ គឺឲ្យពង្រឹងលើសាលាគំរូឲ្យមានការកើនឡើងបន្ថែមទៀត នៅក្នុងប្រទេសកម្ពុជា ហើយសម្ដេចក៏បានសន្យាដំឡើងប្រាក់បំណាច់ដល់គ្រូបង្រៀន គឺមានការកើនឡើងលើសពីស្ថាប័នផ្សេងៗ បើគិតទៅការដំឡើងប្រាក់បៀវត្សធ្វើឡើង បន្តបន្ទាប់មានចំនួនបីដងរួចមកហើយ ។ សម្រាប់គោលដៅរបស់ក្រសួងអប់រំ គឺនឹងបង្កើនសាលាគំរូឲ្យមានកាន់តែច្រើនឡើងបន្ថែមទៀត ។ ជាការពិតណាស់សម្រាប់កូនសិស្ស ដែលរៀននៅកម្រិតបឋមសិក្សាលោកគ្រូ អ្នកគ្រូ ត្រូវតែព្យាយាមជួយបង្រៀនដល់ពួកគាត់ឲ្យចេះសរសេរ និងចេះអាននោះនឹងធ្វើឲ្យឪពុកម្ដាយរបស់ពួកគាត់សប្បាយចិត្ត ។
តាមការពិនិត្យដោយផ្ទាល់ក្នុងមួយថ្ងៃបង្រៀនសិស្សបួនម៉ោងនោះ គឺមិនទាន់គ្រប់គ្រាន់នៅឡើយទេ ។ ដូច្នេះហើយទើបក្រសួងតម្រូវឲ្យមានការបង្រៀនបន្ថែមម៉ោងដល់សិស្សលើសពីនេះ គឺដើម្បីឲ្យសិស្សកាន់តែមានចំណេះដឹងកាន់តែសម្បូរបែប ៕
ចែករំលែកព័តមាននេះ