រាជធានីភ្នំពេញ ៖ កសិផលខ្មែរមិនត្រឹមតែមានរសជាតិឆ្ងាញ់ ស្រស់ និងសម្បូរដោយវីតាមីន ប្រូតេអ៊ីនខ្ពស់ប៉ុណ្ណោះទេ ក្នុងបរិបទថ្មីកសិផលខ្មែរ ដែលបានដាំដុះដោយប្រជាជនខ្មែរនៅលើ ចម្ការខ្មែរ បានក្លាយជាវត្ថុអនុស្សាវរីយ៍…
រាជធានីភ្នំពេញ ៖ កសិផលខ្មែរមិនត្រឹមតែមានរសជាតិឆ្ងាញ់ ស្រស់ និងសម្បូរដោយវីតាមីន ប្រូតេអ៊ីនខ្ពស់ប៉ុណ្ណោះទេ ក្នុងបរិបទថ្មីកសិផលខ្មែរ ដែលបានដាំដុះដោយប្រជាជនខ្មែរនៅលើ ចម្ការខ្មែរ បានក្លាយជាវត្ថុអនុស្សាវរីយ៍ ដែលពោរពេញដោយអត្ថន័យជូនចំពោះភ្ញៀវអន្តរជាតិ ឱ្យស្គាល់ពីរសជាតិកសិផលខ្មែរ បន្ថែមពីលើវត្ថុអនុស្សាវរីយ៍ដែលមានស្រាប់ ។
ក្រុមអាជីវករ ប្រជាពលរដ្ឋ អះអាងថា ការជ្រើសរើសផ្តល់ជូនជាបាច់បន្លែ ឬកន្ត្រកបន្លែ សុវត្ថិភាព កសិផលកែច្នៃ ជំនួសបាច់ផ្កា ឬវត្ថុសិល្បៈផ្សេងៗ គឺជាការផ្តល់នូវក្តីស្រឡាញ់ដ៏ មានអត្ថន័យ ត្បិតថាមិនត្រឹមតែទទួលបាននូវអាហារដែលមានសុវត្ថិភាពនោះទេ ថែមទាំង ជួយគាំទ្រដល់ផលិតផលសរីរាង្គខ្មែរទៀតផង ។
លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានឱ្យកម្ម វិធីលុយ នៃសារព័ត៌មាន កោះសន្តិភាព ដឹងថា «ក្រសួងកសិកម្ម រុក្ខាប្រមាញ់ និងនេសាទ តែងតែរៀបចំរបៀបនេះ (កសិផលខ្មែរ) សម្រាប់ប្រតិភូជាយូរមកហើយ» ។
នៅក្នុងពិព័រណ៍កសិកម្មខ្មែរ និងរសជាតិកសិផលខ្មែរ លោកជំទាវបណ្ឌិត ពេជ ចន្ទមុនី ហ៊ុន ម៉ាណែត ស្ត្រីទី ១ កម្ពុជា ក៏បានធ្វើការលើកទឹកចិត្តក្នុងការផ្តល់ជូនវត្ថុអនុស្សាវរីយ៍ សម្រាប់ប្រតិភូអន្តរជាតិ ជាផលិតផលកសិផលខ្មែរ ដើម្បីពួកគេអាចភ្លក់នូវរសជាតិដ៏ឆ្ងាញ់ ពិសារ ស្រស់ នូវកសិផលដែលដាំដោយប្រជាកសិករខ្មែរ បន្ថែមពីលើវត្ថុអនុស្សាវរីយ៍ដែល មានស្រាប់ ។ គោលបំណងក្នុងការជំរុញការលើកនូវកសិផលខ្មែរនេះ លោកជំទាវ បណ្ឌិត ពេជ ចន្ទមុន្នី បានបង្ហាញថា ដោយសារយើងចង់ជំរុញកសិផលក្នុងស្រុក លើកទឹកចិត្ដដល់កសិករ ខ្មែរយើងជាអ្នកដាំ ដើម្បីជំរុញបង្កើនស្មារតីជាតិនិយមក្នុងការប្រើប្រាស់ និងគាំទ្រដល់ កសិផលក្នុងស្រុក ។
ក្នុងនាមជាអ្នកស្រឡាញ់នូវកសិផលខ្មែរ និងយល់ដឹងអំពីសេដ្ឋកិច្ច អ្នកនាង សយ រចនា មានភាពជឿជាក់ចំពោះផលិតផលស្ទួយសុខភាពដែលផលិតនៅក្នុងស្រុក ខណៈ ផលិតផលនាំចូលបានថមថយគុណភាពដោយការចំណាយពេលដឹកជញ្ជូនជាដើម ដែល នាំឱ្យបាត់បង់អាហារូបកណ៍ គួបផ្សំនឹងរឿងរ៉ាវជាច្រើនទៀត ។
អ្នកនាង សយ រចនា បានបង្ហាញចំណាប់អារម្មណ៍ថា អ្នកនាងសប្បាយចិត្ដខ្លាំងដែល ក្រសួងកសិកម្ម រុក្ខាប្រមាញ់ និងនេសាទ និងភាគីពាក់ព័ន្ធធ្វើការគាំទ្រកសិផលខ្មែរ ដោយការ ជំរុញយ៉ាងធំធេងប្រើប្រាស់ផលិតផលក្នុងស្រុក ។ នេះជាឱកាសដែលអ្នកផលិតតាំងបង្ហាញ ផលិតផលរបស់ខ្លួនសម្រាប់អតិថិជន ប្រតិភូអន្តរជាតិ និងភ្ញៀវអន្តរជាតិប៉ះ កាន់ និងភ្លក់ ។
យ៉ាងណាមិញ ក្រុមអាជីវករ ក៏បានអះអាងដែរថា តាមរយៈការគាំទ្រនូវបន្លែ និងអាហារ សុវត្ថិភាពសរីរាង្គទាំងនេះ វាក៏បានចូលរួមចំណែកជួយជំរុញកំណើនសេដ្ឋកិច្ចជាតិ និងលើកកម្ពស់សេដ្ឋកិច្ចសហគមន៍ផងដែរ តាមរយៈការប្រមូលទិញពីប្រជាកសិករ នៅតាម បណ្តាសហគមន៍នានា ក៏ដូចជាតាមរយៈកិច្ចសន្យាកសិកម្មទិញលក់ជាមួយក្រុមហ៊ុនជាដើម ។
កន្លងមកក្រសួងកសិកម្ម រុក្ខាប្រមាញ់ និងនេសាទ បានរៀបចំការដាក់តាំងបង្ហាញ ផលិតផលកសិកម្មខ្មែរ ក៏ដូចជាការរៀបចំការលក់កសិផលខ្មែរ នៅចំថ្ងៃទិវានៃក្តីស្រឡាញ់ ដើម្បីផ្តល់ក្តីស្រឡាញ់ផ្នែកសុខភាព និងលើកកម្ពស់ផលិតផលខ្មែរ ៕
ចែករំលែកព័តមាននេះ