រាជធានីភ្នំពេញ ៖ ការរុករកឧទ្ធម្ភាគចក្រមួយគ្រឿងដែលបានបាត់ដាននៅតំបន់ជួរភ្នំក្រវាញ រហូតមកដល់ថ្ងៃទី១៧ ខែកក្កដា ឆ្នាំ២០២៤នេះ ឈានចូលដល់ថ្ងៃទី៦ហើយ មិនទាន់មានតម្រុយណាមួយនៅឡើយទេ ។ នេះបើតាមការឱ្យដឹងពីនាយឧត្តមសេនីយ៍…
រាជធានីភ្នំពេញ ៖ ការរុករកឧទ្ធម្ភាគចក្រមួយគ្រឿងដែលបានបាត់ដាននៅតំបន់ជួរភ្នំក្រវាញ រហូតមកដល់ថ្ងៃទី១៧ ខែកក្កដា ឆ្នាំ២០២៤នេះ ឈានចូលដល់ថ្ងៃទី៦ហើយ មិនទាន់មានតម្រុយណាមួយនៅឡើយទេ ។ នេះបើតាមការឱ្យដឹងពីនាយឧត្តមសេនីយ៍ ឈុំ សុជាត រដ្ឋលេខាធិការ និងជាអ្នកនាំពាក្យក្រសួងការពារជាតិ ។
តាមរយៈទំព័រហ្វេសប៊ុកផ្លូវការនាយឧត្តមសេនីយ៍បានបញ្ជាក់ថា «ថ្ងៃពុធ ទី១៧ ខែកក្កដា ឆ្នាំ២០២៤នេះ កម្លាំងចម្រុះនៃកងយោធពលខេមរភូមិន្ទ កំពុងបន្តបេសកកម្មយ៉ាងសកម្មក្នុងការរុករកឧទ្ធម្ភាគចក្រ ដែលបានបាត់ការទាក់ទងនៅតំបន់ជួរភ្នំក្រ វាញ ទោះបីជាអាកាសធាតុតំបន់នោះ កំពុងបង្កការលំបាកយ៉ាងណាក៏ដោយ ។ នេះជាថ្ងៃទី៦ហើយ សម្រាប់ប្រតិបត្តិការស្វែងរកឧទ្ធម្ភាគចក្រមួយគ្រឿង ដែលបានបាត់ដំណឹងតាំងពីល្ងាចថ្ងៃទី១២ ខែកក្កដា ឆ្នាំ២០២៤» ។
ពុំទាន់មានតម្រុយណាមួយកំណត់គោលដៅច្បាស់លាស់
រហូតដល់ព្រឹកថ្ងៃ១៧ កក្កដា គឺជាថ្ងៃទី៦ហើយ នៃប្រតិបត្តិការរុករកឧទ្ធម្ភាគចក្រមួយគ្រឿង ដែលបានបាត់ការទាក់ទងនៅតំបន់ជួរភ្នំក្រវាញ ព្រំប្រទល់ខេត្តពោធិ៍សាត់ និងខេត្តកោះកុង ដែលជាតំបន់មានដើមឈើធំៗ នីងជ្រោះជ្រៅ ហើយអាកាសធាតុចុះអ័ព្ទយ៉ាងក្រាស និងភ្លៀងធ្លាក់ ។ ទោះបីបែបណា កម្លាំងចម្រុះកំពុងបង្កើនសកម្មភាពយ៉ាងស្វិតស្វាញ និងពង្រីកវិសាលភាពប្រតិបត្តិការរុករកកាន់ធំជាងមុន ។
ប៉ុន្តែទោះជាយ៉ាងនេះក្តី នាយឧត្តមសេនីយ៍ ឈុំ សុជាតិ បានបញ្ជាក់ថា កងកម្លាំងរបស់យើងនៅតែបន្តខិតខំ និងប្តេជ្ញាចិត្តយ៉ាងមោះមុតក្នុងការរុករក ហើយនឹងមានការជូនដំណឹងដល់សាធា រណជន និងអ្នកសារព័ត៌មានជាបន្តបន្ទាប់ នៅពេលទទួលបានលទ្ធផលណាមួយ ។
ឆ្លៀតក្នុងឱកាសនេះដែរ នាយឧតុ្តមសេនីយ៍ ឈុំ សុជាតិ ក៏សូមអំពាវនាវដល់អ្នកប្រើប្រាស់បណ្តាញសង្គមទាំងអស់ សូមឱ្យមានការប្រុងប្រយ័ត្ន ក្នុងការចែកចាយដំណឹងណាមួយ ដែលគ្មានប្រភពច្បាស់លាស់ ពាក់ព័ន្ធនឹងឧទ្ធម្ភាគចក្រនេះ ខណៈដែលថ្មីៗនេះមានក្រុមទុច្ចរិតមួយចំនួន បានយកករណីនេះទៅបំផ្លើស និងប្រឌិតខុសពីការពិតដើម្បីប្រយោជន៍ផ្ទាល់ខ្លួននោះ ។
កក្តាអាកាសធាតុ និងព្រៃក្រាសជាឧបសក្គក្នុងការរុករក
កងកម្លាំងរុករក កំពុងបន្តស្វែងរកឧទ្ធម្ភាគចក្រដែលបានបាត់នៅតំបន់ជួរភ្នំក្រវាញ ក្នុងភូមិសាស្ត្រស្រុកវាលវែង ខេត្តពោធិ៍សាត់ ក្រោយបាត់ការទាក់ទងកាលពីថ្ងៃសុក្រសប្តាហ៍មុន ។ រដ្ឋលេខា ធិការ និងជាអ្នកនាំពាក្យក្រសួងការពារជាតិ លោក ឈុំ សុជាតិ មានប្រសាសន៍ថា ក្រុមការងារជួយសង្គ្រោះ មិនទាន់មានតម្រុយបន្ថែមណាមួយពីឧទ្ធម្ភាគចក្រដែលបានបាត់ការទាក់ទងនេះនៅឡើយទេ ។ លោកបន្ថែមថា ពេលនេះអាកាសធាតុមិនអំណាយផលសម្រាប់ការស្វែងរកឡើយ។
លោកថ្លែងថា តំបន់ហ្នឹងជាតំបន់ភ្នំ តំបន់ភ្នំក្រវាញ ហើយភ្នំក្រវាញនេះ ឥឡូវមានអាកាសធាតុមិនល្អ ឥឡូវភ្លៀង ចឹងហើយភ្នំពិបាកក្នុងការដើរចូលក្នុងព្រៃ ។ និយាយរួម ពិបាកក្នុងភូមិសាស្ត្រធ្វើដំណើររុករកតែម្តង ហើយយើងខ្វះឧបករណ៍តាមដានដែរ ។ យើងអត់មានឧបករណ៍បច្ចេកទេសតាមដានពីផ្កាយរណបអីទេ យើងរកដោយថ្មើរជើង ដោយភ្នែកយើង អ៊ីចឹងត្រូវតែមានការលំបាកបន្តិចហើយ ។ និយាយរួម នៅក្នុងតំបន់ជួរភ្នំក្រវាញ ដោយសារអាកាសធាតុមិនល្អ ដែលបង្កការលំបាកសម្រាប់ការស្វែងរក ។
មកដល់ពេលនេះ តម្រុយនៃការរុករក មិនទាន់ទទួលបានព័ត៌មានថ្មីទេ ដោយសារក្រុមរុករកយើងមានពីរក្រុម គឺក្រុមជើងអាកាស និងក្រុមថ្មើរជើង ។ ក្រុមថ្មើរជើងក៏ចេញល្បាតអត់រួច ដោយសារតែស្ថានភាព គឺអាកាសធាតុកំពុងតែមានភ្លៀង មានខ្យល់ ហើយសម្បូរទៅដោយពពកយ៉ាងក្រាស ។ អ៊ីចឹងទាំងថ្មើរជើង ទាំងផ្លូវអាកាស មិនអាចធ្វើការបាន ។ ហើយមួយទៀត តំបន់ដែលយើងត្រូវរុករកមិនមានសេវាសម្រាប់ការទាក់ទងគ្នាទេ ។
កាលពីថ្ងៃអាទិត្យ រដ្ឋមន្ត្រីក្រសួងការពារជាតិ ឯកឧត្តម ទៀ សីហា បានថ្លែងថា ឧទ្ធម្ភាគចក្រដែលបាត់ខ្លួននោះ ហោះហើរក្នុងបេសកកម្មហ្វឹកហ្វឺននៅតាមតំបន់ ដើម្បីមើលបច្ចេកទេស និងឧប ករណ៍ទំនើបកម្មលើវិស័យហោះហើរ ។ ឯកឧត្តមថ្លែងថា ខ្ញុំក៏មិនទាន់សន្និដ្ឋានយ៉ាងណាទេ ប៉ុន្តែក្នុងបេសកកម្មរបស់យើង គឺមានអ្នកបើកបរអ្នកជំនាញPilot(អ្នកបើកឧទ្ធម្ភាគចក្រ) យើងម្នាក់ និងជំនួយការម្នាក់ ។ មានតែពីររូបតែប៉ុណ្ណោះ ដែលបានហ្វឹកហ្វឺនហោះហើរទៅគោលដៅដែលបានកំណត់ក្នុងបេសកកម្ម ។ ជាអកុសល យើងឃើញថា ក្នុងថ្ងៃហ្នឹងអាកាសធាតុមិនអំណោយផល ហើយបានផ្តាច់ការទាក់ទងគ្នាមកទល់ពេលនេះ ។
បើតាមលិខិត ស្តីពីផែនការហោះហើររបស់កងទ័ពជើងអាកាស សារព័ត៌មានទទួលបានឱ្យដឹងថា មន្ត្រីយោធាពីរនាក់ គឺលោក ស៊ុន ផ្លា ប្រធានក្រុម និងលោក ខេង ឆៃយុទ្ធ អាកាសយានិក ត្រូវបានអនុញ្ញាតឱ្យហ្វឹកហ្វឺនផ្លូវឆ្ងាយ ដោយហោះចេញនៅម៉ោង១១ព្រឹក ថ្ងៃទី១២ ខែកក្កដា និងត្រូវឡប់មកវិញនៅម៉ោង២រសៀលថ្ងៃដដែល ។
តាមសេចក្តីជូនដំណឹងរបស់ក្រសួងការពារជាតិ ឧទ្ធម្ភាគចក្រមួយគ្រឿងបានបាត់ការទាក់ទងពីទីបញ្ជាការទ័ពអាកាស ក្នុងភូមិសាស្ត្រជួរភ្នំក្រវាញ ខេត្តពោធិ៍សាត់ និងខេត្តកោះកុង កាលពីថ្ងៃទី១២ ខែកក្កដា ឆ្នាំ២០២៤ ។ ក្រសួងការពារជាតិបញ្ជាក់ថា ហេតុការណ៍នេះ បានកើតឡើងក្នុងអំឡុងពេលហោះហើរហ្វឹកហ្វឺន ដែលការហោះហើរនេះ ស្ថិតនៅក្នុងផែនការហោះហើរហ្វឹកហ្វឺនជាប្រចាំរបស់កងទ័ពជើងអាកាសនៅតំបន់នោះ ។
ឧទ្ធម្ភាគចក្រដែលបាត់ការទាក់ ទងនេះ ប្រភេទZ-9
ឧទ្ធម្ភាគចក្រដែលបានបាត់ការទាក់ទងនេះ ជាប្រភេទឧទ្ធម្ភាគចក្រZ-9 ដែលផលិតនៅប្រទេសចិន ។ កម្ពុជាបានទិញឧទ្ធម្ភាគចក្រប្រភេទ Z-9 ចំនួន១២គ្រឿង កាលពីឆ្នាំ២០១៣ ។
កាលពីឆ្នាំ២០១៤ ឧទ្ធម្ភាគចក្រប្រភេទ Z-9 នេះ ១គ្រឿងបានធ្លាក់ក្នុងរណ្ដៅដី ស្ថិតក្នុងសង្កាត់ព្រៃស ខណ្ឌដង្កោ រាជធានីភ្នំពេញ ដែលកាលនោះ បណ្តាលឱ្យមនុស្ស៤ នាក់ស្លាប់ និងម្នាក់រងរបួសធ្ងន់ ។
ទាក់ទិនឧបទ្ទវហេតុថ្មីនេះ គឺចន្លោះពេលគ្នា១០ឆ្នាំ ដែល១គ្រឿងធ្លាក់ក្នុងរណ្ដៅដីនៅឆ្នាំ២០១៤ និង១គ្រឿងនេះ ក៏មានបញ្ហានៅឆ្នាំ២០២៤នេះ ៕
ចែករំលែកព័តមាននេះ