រាជធានីភ្នំពេញ ៖ កម្លាំងគណៈបញ្ជាឯកភាពខណ្ឌ ៧មករា បានឆ្មក់ចុះបង្ក្រាបទីតាំងល្បែងស៊ីសងមួយកន្លែង ប្រភេទជល់មាន់អនឡាញ និងបៀក្រាត ជាដើម ដកហូតវត្ថុតាង រួមមាន ៖ កំព្យូទ័រ ទូរទស្សន៍ និងឃាត់ខ្លួនមនុស្សប្រុសស្រី០៨នាក់ ។
ប្រតិបត្តិការនេះ បានធ្វើឡើងនៅវេលាម៉ោង៤ល្ងាចថ្ងៃទី០៤ ខែកក្កដា ឆ្នាំ២០២៤ ដោយទទួលបានបទបញ្ជាពីលោក ថេង សុថុល អភិបាលខណ្ឌ៧មករា ចាត់ឲ្យលោក ណុប ផា អភិបាលរង ដឹកនាំកម្លាំងគណៈបញ្ជាការឯកភាពខណ្ឌ ឆ្មក់ចុះបង្ក្រាបជាក់ស្ដែងតែម្ដង ទីតាំងល្បែងស៊ីសងនៅចំណុចផ្ទះលេខ៣១Eoz ផ្លូវលេខ១៣៤ សង្កាត់មនោរម្យ ខណ្ឌ៧មករា រាជធានីភ្នំពេញ ។
តាមប្រភពព័ត៌មានពីមន្ត្រីជំនាញបានឲ្យដឹងថា មុនឈានដល់ការចុះបង្ក្រាបទីតាំងបើកល្បែងស៊ីសងគ្រប់ប្រភេទនេះ កម្លាំងជំនាញបានធ្វើការស្រាវជ្រាវយ៉ាងច្បាស់ថា ទីតាំងនេះប្រាកដជាបើកល្បែងស៊ីសងគ្រប់ប្រភេទ មានដូចជា ៖ ជល់មាន់អនឡាញ បៀរក្រាត និងផ្សេងៗទៀតពាក់ព័ន្ធនឹងល្បែងស៊ីសង។ ដូច្នេះកម្លាំងបានធ្វើការឆ្មក់ចុះបង្ក្រាបបាន និងឃាត់ខ្លួនមនុស្សប្រុសស្រីចំនួន០៨នាក់ និងវត្ថុតាងពាក់ព័ន្ធនឹងល្បែងស៊ីសង មានដូចជា កំព្យូទ័រ ០៦គ្រឿង ទូទស្សន៍ ០២គ្រឿង ។
ក្រោយបញ្ចប់ប្រតិបត្តិការ កម្លាំងបាននាំយកមនុស្សប្រុសស្រី ចំនួន០៨នាក់ នឹងវត្ថុតាង យកទៅអធិការដ្ឋាននគរបាលខណ្ឌ ៧មករាដើម្បីសួរនាំកសាងសំណុំរឿងបញ្ជូនទៅតុលាការ ចាត់ការតាមនីតិវិធី ។
គួររំលឹកផងដែរថា កាលពីរសៀលថ្ងៃទី០១ ខែកក្កដា ឆ្នាំ២០២៤ នៅសាលារាជធានីភ្នំពេញ លោក ឃួង ស្រេង អភិបាលរាជធានីភ្នំពេញ និងជាប្រធានគណៈបញ្ជាការឯកភាពរាជធានីភ្នំពេញ បានមានប្រសាសន៍ ក្នុងកិច្ចប្រជុំគណៈបញ្ជាការឯកភាពរាជធានីភ្នំពេញ បានសង្កត់ធ្ងន់ថា ចំពោះល្បែងស៊ីសងគ្រប់ប្រភេទ ត្រូវតែលប់បំបាត់ មិនត្រូវឲ្យមាននៅក្នុងមូលដ្ឋានរបស់ខ្លួនដាច់ខាត! តាមរយៈការពង្រឹងពីមួយថ្ងៃ ទៅមួយថ្ងៃ ឲ្យបានខ្លាំង ដើម្បីឈានទៅលុបបំបាត់ឲ្យអស់ ៕
![](https://kohsantepheapdaily.com.kh/wp-content/uploads/2024/07/1da2bc40672293d5faa5566f83fb19ef.jpg)
![](https://kohsantepheapdaily.com.kh/wp-content/uploads/2024/07/7f5063381d5b201d4aa5b8aa5fb4d2a4.jpg)
![](https://kohsantepheapdaily.com.kh/wp-content/uploads/2024/07/ec5d07c2abe7167dbfedebc5c7cd02ec.jpg)
![](https://kohsantepheapdaily.com.kh/wp-content/uploads/2024/07/513b317ab8ec23147755efe4f599b863.jpg)
![](https://kohsantepheapdaily.com.kh/wp-content/uploads/2024/07/b66252220169df8a0f52727f1947d58f.jpg)
![](https://kohsantepheapdaily.com.kh/wp-content/uploads/2024/07/7b86f9432b368320b6eca1634eddcbaf.jpg)
![](https://kohsantepheapdaily.com.kh/wp-content/uploads/2024/07/c2cab4f1793e2385cc278bede64966ab.jpg)
ចែករំលែកព័តមាននេះ