រាជធានីភ្នំពេញ ៖ តារាសម្តែង និងបង្ហាញម៉ូតនាង កុយ អេណា បានបង្ហាញគោលបំណងចង់ស្នើឲ្យស្ថាប័នពាក់ព័ន្ធគួរយកគុនល្បុក្កតោ នៅក្នុងការបង្ហាត់បង្រៀនសិស្សទូទៅ នៅតាមសាលារៀន ខណៈពេលគុនល្បុក្កតោនេះ…
រាជធានីភ្នំពេញ ៖ តារាសម្តែង និងបង្ហាញម៉ូតនាង កុយ អេណា បានបង្ហាញគោលបំណងចង់ស្នើឲ្យស្ថាប័នពាក់ព័ន្ធគួរយកគុនល្បុក្កតោ នៅក្នុងការបង្ហាត់បង្រៀនសិស្សទូទៅ នៅតាមសាលារៀន ខណៈពេលគុនល្បុក្កតោនេះ គឺជាក្បាច់គុនអត្តសញ្ញាណជាតិរបស់កម្ពុជា ។
ការស្នើសុំពីអតីត Miss Grand Cambodia ២០២៣ លំដាប់រងទី១ រូបនេះធ្វើឡើង បន្ទាប់ពីនាងមើលឃើញថា គុនល្បុក្កតោ ជាក្បាច់គុនមួយដ៏អស្ចារ្យ តែមិនសូវជាមានការគាំទ្រ និងការបង្ហាត់បង្រៀនច្រើនជាងក្បាច់គុណផ្សេងៗទៅវិញ ។
កុយ អេណា បានលើកឡើតាមបណ្តាញសង្គមថា ខ្ញុំមានអារម្មណ៍ឆ្ងល់ និងតូចចិត្ដបន្តិចដែរ នៅពេលដែលក្បាច់គុនខ្មែរ គឺជាក្បាច់មួយដែលអស្ចារ្យ តែពុំសូវមានការគាំទ្រ និងការលើកឡើងស្នើសុំនៅក្នុងការបង្ហាត់បង្រៀនសិស្សទូទៅនៅតាមសាលា ។ តែបែរជាភាគច្រើនមានការហាត់រៀនក្បាច់គុនផ្សេងៗទៅវិញ ។
នាងបញ្ជាក់ថា នាងខ្ញុំពិតជាចង់ស្នើសុំ និងសំនូមពរទៅដល់បណ្ដាសាលានានាទាំងស្ថាប័នរដ្ឋ និងឯកជននៅប្រទេសកម្ពុជា គួរតែបញ្ចូលគុនល្បុក្កតោខ្មែរទៅក្នុងម៉ោងសិក្សានៃផ្នែកកីឡា ឬសិល្បៈណាមួយឲ្យបានទូលំទូលាយ ។ ដោយឡែកក្រៅអំពីការស្នើសុំខាងលើនេះ កុយ អេណា ក៏បានធ្វើការប្តេជ្ញាចិត្តនឹងចូលរួមចំណែកនៅក្នុងការប្រឹងប្រែងលើកស្ទួយគុនល្បុក្កតោនេះ ទៅកាន់ឆាកអន្តរជាតិ និងឲ្យមានការសុះសាយជាសកលផងដែរ ។
កុយ អេណា អះអាងថា នាងខ្ញុំបេ្តជ្ញាចិត្តនឹងខំប្រឹងប្រែងលើកស្ទួយគុនល្បុក្កតោ ទៅកាន់ឆាកអន្តរជាតិឱ្យរីកសុះសាយដល់សកលលោក ព្រោះក្បាច់គុនអត្តសញ្ញាណជាតិរបស់កម្ពុជា ។ នាងបន្ថែមថា ២ឆ្នាំហើយ ដែលគុនល្បុក្កតោកម្ពុជា ត្រូវបានត្រូវបានចុះបញ្ជីបេតិកភ័ណ្ឌសម្បត្តិវប្បធម៌អរូបីយនៃមនុស្សជាតិរបស់អង្គការ UNESCO ខណៈដែលចាស់ព្រឹទ្ធាចារ្យ ឬលោកគ្រូតាផ្នែកគុនដ៏អស្ចារ្យនេះ កាន់តែមានវ័យចំណាស់ទៅៗ ។ នាងថា តើយើងជាកូនខ្មែរបានធ្វើអ្វីហើយ ឬនៅ ដើម្បីគាំទ្រលើកស្ទួយ និងក្លាយជាអ្នកបន្តវេនពីបុព្វបុរសដូចតាខ្មែរជំនាន់មុន? ។
យ៉ាងណា ការចូលរួមផ្សព្វផ្សាយពីក្បាច់គុណល្បុក្កតោពីសំណាក់ កុយ អេណា នាពេលនេះមិនមែនជាលើកទីមួយទេ ពោលកន្លងមកតារារូបនេះក៏បានចូលរួមផ្សព្វផ្សាយយ៉ាងទូលំទូលាយអំពីព្រឹត្តការណ៍ការសម្តែងគុនល្បុក្កតោ និងគុនសាវលិញ រួមគ្នារវាងកម្ពុជា និងចិននៅមុខប្រាសាទបាយ័ន ខេត្តសៀមរាម កាលពីពេលថ្មីៗកន្លងទៅនេះ ។
ជាការកត់សម្គាល់ កន្លងមកតារាសម្តែងនាង កុយ អេណា ក៏ធ្លាប់ទទួលបានការសាទរ និងគាំទ្រយ៉ាងច្រើនផងដែរ ពីប្រិយមិត្តលើបណ្ដាញសង្គម ក្នុងពេលដែលនាងបានចូលរួមផ្សព្វផ្សាយតំបន់ទេសចរណ៍មួយចំនួនក្នុងរាជធានីភ្នំពេញ ដែលសកម្មភាពនេះត្រូវបានគេចាត់ទុកជាគំរូមួយសម្រាប់អ្នកសិល្បៈ ។
កុយ អេណា បញ្ជាក់ថា អ្វីដែលនាងធ្វើគ្រាន់តែចង់បំផុសនូវអ្វីដែលល្អៗ និងស្រស់ស្អាត ដើម្បីទាក់ទាញភ្ញៀវទេសចរណ៍ជាតិ និងអន្តរជាតិឲ្យបានដឹង និងបានស្គាល់ និងដឹងពីកម្ពុជាថា ពេលនេះមានរីកចម្រើនដល់កម្រិតណា ៕
ចែករំលែកព័តមាននេះ