រាជធានីភ្នំពេញ ៖ រថយន្តបែនដឹកដី ១គ្រឿង ពាក់ស្លាកលេខរដ្ឋ ដឹកដីពេញទ្រុង បានបើកបរក្នុងល្បឿនលឿន គេចចេញពីរថយន្ត និងម៉ូតូនៅខាងមុខ រួចក៏បានជ្រុលទៅបុកម៉ូតូកង់បី…
រាជធានីភ្នំពេញ ៖ រថយន្តបែនដឹកដី ១គ្រឿង ពាក់ស្លាកលេខរដ្ឋ ដឹកដីពេញទ្រុង បានបើកបរក្នុងល្បឿនលឿន គេចចេញពីរថយន្ត និងម៉ូតូនៅខាងមុខ រួចក៏បានជ្រុលទៅបុកម៉ូតូកង់បី ១គ្រឿង ដែលកំពុងឈប់រង់ចាំស្តុបពីក្រោយ បណ្ដាលឲ្យម៉ូតូកង់បីនោះ ក្រឡាប់បះជើង រងការខូចខាតយ៉ាងដំណំ ប៉ុន្តែជាសំណាងល្អ អ្នកបើកបរម៉ូតូកង់បី គ្រាន់តែរងរបួសស្រាលប៉ុណ្ណោះ ។
ឧប្បត្តិហេតុការណ៍នេះបានកើតឡើងកាលពីវេលាម៉ោង៨ព្រឹកថ្ងៃទី១៩ ខែមិថុនា ឆ្នាំ២០២៤ នៅតាមមហាវិថីឈ្នះឈ្នះ ត្រង់ចំណុចភ្លើងស្តុបកែងផ្លូវចូលវត្តភ្នៀតសិម្ពលី ស្ថិតនៅក្នុងភូមិស្រែរាជ្ជះ សង្កាត់សំរោងក្រោម ណ្ឌពោធិ៍សែនជ័យ រាជធានីភ្នំពេញ ។
ម៉ូតូកង់បីខាងលើពណ៍ស ពាក់ស្លាកលេខ ភ្នំពេញ 1HK-0431 បើកបរដោយបុរសមិនស្គាល់អត្តសញ្ញាណម្នាក់ រងរបួសស្រាល ។ ចំណែករថយន្តបង្ក ប្រភេទបែនយីឌុប ដឹកដី ម៉ាកហ៊ីយ៉ាន់ដាយ ពណ៍ត្រេអ៊ី ពាក់ស្លាកលេខរដ្ឋ 3-0089 អ្នកបើកបរមិនស្គាល់អត្តសញ្ញាណដូចគ្នាដែរ ។
អ្នកឃើញហេតុការណ៍ខាងលើ បានប្រាប់ឲ្យដឹងថា នៅមុនពេលកើតហេតុ គាត់បានឃើញម៉ូតូកង់បី បើកបរធ្វើដំណើរតាមមហាវិថីឈ្នះឈ្នះ ក្នុងទិសដៅពីជើងទៅត្បូង លុះពេលទៅដល់ត្រង់ចំណុចកើតហេតុ ភ្លើងស្តុបបានលោតក្រហម ហើយម៉ូតូកង់បីនេះ ក៏បានឈប់រង់ចាំ ។ ស្របពេលនោះ រថយន្តបែនដឹកដី ១គ្រឿង បើកបរធ្វើដំណើរក្នុងទិសដៅស្របគ្នា និងក្នុងល្បឿនលឿន ហើយពេលទៅជិតដល់ទីនោះ ឃើញភ្លើងស្តុបក្រហម ក៏អត់ព្រមឈប់ ឬបន្ថយល្បឿនឡើយ ហើយបានគេចចេញពីរថយន្ត និងម៉ូតូនៅខាងមុខ ដែលកំពុងឈប់ភ្លើងស្តុប ជាបន្តបន្ទាប់ ។
ប្រភពដដែល បានប្រាប់ឲ្យដឹងបន្តទៀតថា ខណៈនោះ ក៏រេចង្កូតទៅខាងស្ដាំជ្រុលទៅបុកម៉ូតូកង់បីខាងលើ បណ្ដាលឲ្យក្រឡាប់បះជើងរងការខូចខាតយ៉ាងដំណំ ប៉ុន្តែអ្នកបើកបរម៉ូតូកង់បីនេះ រងរបួសស្រាលតែប៉ុណ្ណោះ ។ ចំណែករថយន្តបង្ក ពុំមានរងការខូចខាតនោះទេ បន្ទាប់មករថយន្តនេះ បានឈប់នៅជិតកន្លែងកើតហេតុនោះដែរ ពុំបានរត់គេចឡើយ ។ ក្រោយពេលកើតហេតុ នគរបាលប៉ុស្តិ៍សំរោងក្រោម បានចុះទៅធ្វើការវាស់វែង ហើយឲ្យភាគីទាំង២ អែបកៀន និងសម្របសម្រួលគ្នា ដើម្បីបញ្ចប់រឿង ៕
ចែករំលែកព័តមាននេះ