ដឹងមូលហេតុ និងទំហំខូចខាតហើយ ករណីឆេះហាងកាហ្វេ និងអគារលក់ភេសជ្ជៈ ផ្អើលក្រុងសៀមរាប
- សៀមរាប
ខេត្តសៀមរាប ៖ អគ្គិភ័យមួយបានបង្កជាមហន្តរាយដែលគួរឱ្យរន្ធត់ណាស់ លេបត្របាក់ហាងកាហ្វេ
ខេត្តសៀមរាប ៖ អគ្គិភ័យមួយបានបង្កជាមហន្តរាយដែលគួរឱ្យរន្ធត់ណាស់ លេបត្របាក់ហាងកាហ្វេយីហោ ដេគ័រ ទី សុខហេង គឺឆេះគ្រឿងក្នុងហ្មត់គ្មានសល់ រួចឆ្លងរាលដាលដល់ផ្ទះលក់គ្រឿងផ្ទះបាយ និងភេសជ្ជៈយីហោ ហូមស្ត អស់មួយចំហៀងទៀតនៅជាន់ទី១ តែសំណាងល្អគ្មានមនុស្សណាម្នាក់រងគ្រោះថ្នាក់ដល់អាយុជីវិតឡើយ ។ គួររំលឹកថា អគ្គិភ័យឆេះហាងកាហ្វេ និងអគារលក់ភេសជ្ជៈ ផ្អើលក្រុងសៀមរាប
ហេតុការណ៍នៃគ្រោះអគ្គិភ័យនេះ បានកើតឡើងនៅវេលាម៉ោង១៦និង១៥នាទីរសៀល ថ្ងៃទី០៣ ខែមិថុនា ឆ្នាំ២០២៤ ស្ថិតនៅចំណុចហាងកាហ្វេដេគ័រ ទី សុខហេង ស្ថិតក្នុងក្រុមទី១១ ភូមិតាភុល សង្កាត់ស្វាយដង្គំ កណ្ដាលក្រុងសៀមរាប ។
បើតាមប្រសាសន៍របស់ម្ចាស់ហាងកាហ្វេឈ្មោះ ម៉ុង ដាវុឍ្ឍសិរី ភេទប្រុស អាយុ៧៧ឆ្នាំ ជាអាណិកជនខ្មែររស់នៅប្រទេសស៊ុយអែត បានប្រាប់នៅមុខសមត្ថកិច្ចនាព្រឹកថ្ងៃទី៤ ខែ មិថុនា ឆ្នាំ២០២៤ នេះថា ទីតាំងហាងនេះ មុនដំបូងគាត់បានជួលទៅឱ្យគេបើកលក់កាហ្វេ និងធ្វើផ្ទះជួលចំនួន១២បន្ទប់ ។ មួយរយៈក្រោយមក អ្នកជួលលក់កាហ្វេអត់សូវដាច់ និងផ្ទះជួលអត់មានមនុស្សជួលក៏បិទទ្វារទៅ ។
បន្ទាប់មកអត់មានអ្នកជួល គាត់ក៏បើកលក់ខ្លួនឯងវិញរហូតមកដល់សព្វថ្ងៃ ។ នៅថ្ងៃកើតហេតុ គាត់មិនបាននៅផ្ទះទេ ដោយទុកឱ្យកូនចៅ និងបុគ្គលិកបើកលក់កាហ្វេធម្មតា ស្រាប់តែកូនចៅទូរស័ព្ទទៅប្រាប់ថា ប៉ាភ្លើងឆេះផ្ទះយើងអស់ហើយ ។ ខណៈនោះគាត់មកដល់ បានត្រឹមតែឈរមើលទាំងស្រឡាំងកាំងយំក៏មិនចេញ ។
បើតាមប្រសាសន៍របស់លោកឧត្តមសេនីយ៍ត្រី ឌុត ខុន ស្នងការរងទទួលដឹកនាំការិយាល័យនគរបាលបង្ការ ពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលខេត្តសៀមរាប បានប្រាប់នៅវេលាម៉ោង១០និង៣០នាទីព្រឹក ថ្ងៃទី៤ ខែមិថុនា ឆ្នាំ២០២៤ថា ករណីអគ្គិភ័យនេះឆេះចេញពីក្នុងផ្ទះបាយហាងកាហ្វេខ្លួនឯង និងផ្ទះជួល ។ ក្រោយមកក៏ឮសំឡេងផ្ទុះធុងហ្កាសទម្ងន់១៥គីឡូក្រាម បណ្តាលឱ្យឆាបឆេះខ្លាំង និងរាលដាលដល់ទីតាំងហាងកាហ្វេហូមស្ត លក់គ្រឿងផ្ទះបាយនៅជាន់ទី១អស់មួយចំនួនធំទៀតផងដែរ ។
លោកបន្ថែមថា ហាងកាហ្វេនេះ បានរងការខូចខាតដូចជា៖ ម៉ាស៊ីនភ្លេីង១គ្រឿង កុំព្យូទ័រលេីតុ៣គ្រឿង កុំព្យូទ័រលេបថប់៣គ្រឿង ទូរទស្សន៍៦គ្រឿង ម៉ូតូហុងដាឌ្រីម១គ្រឿងស៊េរីឆ្នាំ២០១៩ សាឡុងឈេីមួយឈុត គោយន្តកន្ត្រៃ១គ្រឿង(សម្រាប់ធ្វេីចម្ការ) គ្រឿងធ្វេីចម្ការ១ឈុតធំ តម្លៃប្រហែលជាង១ម៉ឺនដុល្លារ និងសម្ភារៈមួយចំនួនទៀត ដូចជា តុ ទូ កៅអីក្នុងហាងកាហ្វេទាំងមូល រួមទាំងឯកសារផ្សេងៗមិនទាន់រកឃេីញ គឺឆេះហ្មត់សល់តែដែកប៉ុណ្ណោះ ។
ចំណែកការខូចខាតនៅទីតាំងផ្ទះហូមស្តលក់គ្រឿងផ្ទះបាយ និងភេសជ្ជៈ ដែលមានជញ្ជាំង ជាប់គ្នាជាផ្ទះល្វែងជាន់ទីមួយ និងសម្ភារ:លក់ដូរអស់មួយចំនួនធំ ។ ភ្លើងបានរលត់ និងគ្រប់គ្រងស្ថានការណ៍បានទាំងស្រុងនៅវេលាម៉ោង៦ល្ងាចថ្ងៃដដែល ដោយប្រើប្រាស់រថយន្តពន្លត់អគ្គិភ័យអស់ចំនួន១០គ្រឿង បាញ់ទឹកអស់២១ស៊ីទែន ក្នុងនោះរថយន្តស្នងការដ្ឋាន៥គ្រឿង បាញ់ទឹកអស់១៣ស៊ីទែន រថយន្តអាជ្ញាធរអប្សរា២គ្រឿង បាញ់ទឹកអស់៤ស៊ីទែន រថយន្តកងរាជអាវុធហត្ថ២គ្រឿង ប្រើប្រាស់ទឹកអស់៤ស៊ីទែន ការិយាល័យបេតិកភណ្ឌ១គ្រឿងមិនបានបាញ់ទឹកទេ ។
មូលហេតុដែលបង្កជាអគ្គិភ័យនេះ ត្រូវបានមន្ត្រីផ្លូវការឱ្យដឹងថា ដោយសារទុស្សេចរន្តភ្លើង ផ្តើមចេញពីហាងកាហ្វេ ហើយរាលដាលទៅផ្ទះហូមស្តលក់គ្រឿងផ្ទះបាយ និងភេសជ្ជៈ ។ តាមការវាយតម្លៃពីការខាតបង់ដោយមហន្តរាយអគ្គិភ័យនេះ បើគិតជាទឹកប្រាក់អស់ប្រមាណរាប់ម៉ឺនដុល្លារ ។
សូមបញ្ជាក់ថា ហាងលក់កាហ្វេ ត្រូវភ្លើងឆេះនៅជាន់ផ្ទាល់ដី ហើយបានរាលដាលទៅឆេះជាន់ទី១ នៃហាងលក់គ្រឿងផ្ទះបាយ និងភេសជ្ជៈ ចាត់ទុកជាសំណាងល្អដែលមិនឆេះផ្ទាល់ដី ដែលមានការដាក់តាំងលក់ស្រាម៉ាកថ្លៃៗ ៕
ចែករំលែកព័តមាននេះ