ទីក្រុងប៊ែរឡាំង៖ នៅទីបំផុត រដ្ឋាភិបាលអាល្លឺម៉ង់សម្រេចចិត្តបើកផ្លូវឱ្យអ៊ុយក្រែនប្រើប្រាស់អាវុធជំនួយរបស់អាល្លឺម៉ង់ដើម្បីបាញ់ប្រហារចូលទៅក្នុងទឹកដីរុស្ស៊ីហើយ។ ចំណាត់ការនេះធ្វើឡើងបន្ទាប់ពីទីក្រុងវ៉ាស៊ីនតោនទើបតែអនុញ្ញាតឱ្យអ៊ុយក្រែនប្រើប្រាស់អាវុធជំនួយរបស់អាមេរិកវាយប្រហារជាបណ្ដើរៗដោយផ្ដោតសំខាន់ទៅលើសមរភូមិនៅតំបន់ខាគីវដែលកំពុងទទួលរងការវាយប្រហារខ្លាំងណាស់ពីសំណាក់ទាហានរុស្ស៊ីធ្វើឱ្យអ៊ុយក្រែនដកថយជាបន្តបន្ទាប់។
គេដឹងថានៅក្នុងដំណាក់កាលដំបូងៗនេះ លោកបៃដិនមិនចង់ឱ្យអ៊ុយក្រែនប្រើប្រាស់អាវុធទាំងនោះសម្រុកពេកទេ។ មានន័យថាត្រូវធ្វើឡើងដោយសន្សឹមៗដើម្បីស្ទាបស្ទង់សភាពការណ៍សិន។ អាល្លឺម៉ង់ និងអាមេរិកបើកដៃឱ្យអ៊ុយក្រែនប្រើអាវុធជំនួយរបស់ខ្លួនវាយប្រហារនៅតំបន់ខាគីវ ខណៈដែលទីក្រុងធំលំដាប់ទី២របស់អ៊ុយក្រែននេះស្ថិតនៅចម្ងាយម្ភៃគីឡូម៉ែត្រពីព្រំដែនរុស្ស៊ី-អ៊ុយក្រែន។ ថ្មីៗនេះ រុស្ស៊ីបាញ់មីស៊ីលជាច្រើនគ្រាប់ទៅលើផ្ទះរបស់អ្នកស្រុកបណ្ដាលឱ្យស្លាប់មនុស្ស៦នាក់។
រដ្ឋាភិបាលអាល្លឺម៉ង់បានចេញសេចក្ដីថ្លែងការណ៍ជាចំហថាអ៊ុយក្រែនអាចប្រើអាវុធជំនួយអាល្លឺម៉ង់វាយប្រហារមូលដ្ឋានរបស់រុស្ស៊ីដែលស្ថិតនៅលើទឹកដីរុស្ស៊ីបាន។ គ្រាន់តែថាអាល្លឺម៉ង់មានសំណូមពរមួយ។ នៅដំណាក់កាលដំបូងៗនេះកុំទាន់បាញ់ឆ្ងាយៗចូលទឹកដីរុស្ស៊ីពេក។ បាញ់ហួសព្រំដែនរុស្ស៊ីបន្តិចបន្តួចបានហើយ។ ជាពិសេសបើរុស្ស៊ីបាញ់មីស៊ីល ឬគ្រាប់រ៉ុកកែតចេញពីទឹកដីរុស្ស៊ីនៅម្ដុំណា អ៊ុយក្រែនអាចវាយប្រហារទីតាំងនោះវិញ។
កាលពីម្សិលមិញ លោកបៃដិនអនុញ្ញាតឱ្យអ៊ុយក្រែនប្រើប្រាស់អាវុធអាមេរិកនៅសមរភូមិខាគីវហើយ។ នេះបើតាមការអះអាងដោយផ្ទាល់ពីរដ្ឋមន្ត្រីការបរទេសអាមេរិក លោកប្លីងខិន (Anthony Blinken)។ លោកបង្ហើបឱ្យដឹងថាអ៊ុយក្រែនបានស្នើសុំទៅវ៉ាស៊ីនតោនយូរហើយថា «បើរុស្ស៊ីវាយប្រហារឆ្លងព្រំដែនចេញពីតំបន់ណា អ៊ុយក្រែនចង់ប្រើអាវុធអាមេរិកវាយបកទៅតំបន់នោះវិញ»។ ដោយសារសំណើរបស់អ៊ុយក្រែនសមហេតុផលដែរ ដូច្នេះលោកបៃដិនក៏ឯកភាពដូចលក្ខខណ្ឌដែលអ៊ុយក្រែនបានសន្យា។ នេះបើតាមលោកប្លីងខិនថ្លែងនៅក្នុងកិច្ចប្រជុំណាតូនៅទីក្រុងប៉្រាក (Prague) សាធារណរដ្ឋឆេក។
រដ្ឋមន្ត្រីការបរទេសអាមេរិក លោកប្លីងខិនថ្វីដ្បិតលោកបៃដិនយល់ព្រមតាមសំណូមពរឱ្យអ៊ុយក្រែនធ្វើដូច្នេះមែន ប៉ុន្តែលោកចង់ស្ទាបស្ទង់សភាពការណ៍សិន។ លោកមិនទាន់អនុញ្ញាតឱ្យអ៊ុយក្រែនបាញ់មីស៊ីល ឬអាវុធយុទ្ធភ័ណ្ឌធុនធ្ងន់ដទៃទៀតវាយចូលជ្រៅពេកទៅក្នុងទឹកដីរុស្ស៊ីទេ។ នេះបើយោងតាមមន្ត្រីរដ្ឋាភិបាលអាមេរិកមួយចំនួនដែលស្នើសុំមិនបញ្ចេញឈ្មោះ។
រដ្ឋាភិបាលទីក្រុងប៊ែឡាំងចេញសេចក្ដីថ្លែងការណ៍១កត់សម្គាល់ថាប៉ុន្មានអាទិត្យនេះ រុស្ស៊ីរៀបផែនការវាយប្រហារតំបន់ខាគីវ។ ជាពិសេស វាយយកទីតាំងដែលនៅជាប់នឹងព្រំដែន។ ដូច្នេះ អាល្លឺម៉ង់យល់ស្របជាមួយប្រទេសសម្ព័ន្ធមិត្តដទៃទៀតថាអ៊ុយក្រែនត្រូវតែមានសិទ្ធិការពារខ្លួន។ កុំឱ្យគេជាន់ឈ្លីខ្លាំងពេក។ វាយការពារខ្លួននេះគឺស្របទៅតាមច្បាប់អន្តរជាតិ។ ដូច្នេះទោះបីប្រើប្រាស់អាវុធរបស់ប្រទេសណាក៏ឥតមានទាស់ខុសអ្វីដែរ។ សំខាន់ឱ្យតែស្ថិតនៅក្នុងក្របខណ្ឌការពារខ្លួន។
អគ្គលេខាធិការអង្គការណាតូ លោកស្តុលថឹនបឺក (Jens Stoltenberg) ថ្លែងថាលោកគាំទ្រឱ្យប្រទេសម្ចាស់ជំនួយដកចេញនូវការដាក់កំហិតទៅលើអ៊ុយក្រែនខ្លាំងពេកដល់ថ្នាក់មិនហ៊ានឱ្យអ៊ុយក្រែនប្រើអាវុធជំនួយបាញ់ទៅរុស្ស៊ីវិញ។ លោកយល់ថាធ្វើអ្វីក៏ដោយឱ្យតែស្របទៅតាមច្បាប់អន្តរជាតិជាទង្វើត្រឹមត្រូវហើយ។ ដូច្នេះប្រើប្រាស់អាវុធរបស់ប្រទេសណាមិនសំខាន់ទេ។ សំខាន់គឺវាយប្រហារនៅក្នុងក្របខណ្ឌការពារខ្លួន។
អគ្គលេខាធិការអង្គការណាតូកាលពីពេលកន្លងមក រុស្ស៊ីអាចបាញ់មីស៊ីលពីទឹកដីរបស់ខ្លួនចូលអ៊ុយក្រែនដោយសេរី។ អ៊ុយក្រែនគ្មានហ៊ានវាយបកវិញទេ។ ប៉ុន្តែក្រោយពេលអាមេរិក, អាល្លឺម៉ង់ និងណាតូប្រើប្រាស់ពាក្យ «សិទ្ធិការពារខ្លួន» ប៉ុណ្ណេះហើយ គេគិតថារុស្ស៊ីមិនអាចជិះសេះលែងដៃដូចកាលពីមុនទៀតឡើយ។ ពាក្យ «សិទ្ធិការពារខ្លួន» អាចមានន័យថាមិនបណ្ដោយឱ្យគេវាយប្រហារស្រេចតែនឹងចិត្តទេ។ សំខាន់រង់ចាំឱ្យរុស្ស៊ីជាអ្នកកេះកៃមុន, អ៊ុយក្រែនរង់ចាំឆ្លើយតបតាមក្រោយ។ ហើយមិនបាញ់ផ្ដេសផ្ដាសទេ។ ឧបមាថាមីស៊ីលបាញ់ចេញពីទឹកដីរុស្ស៊ីត្រង់ចំណុចណាតម្រង់ទៅរកអ៊ុយក្រែន ពេលនោះអ៊ុយក្រែនអាចវាយបកវិញភ្លាមៗយ៉ាងទាន់ចិត្តទៅលើទីតាំងនោះដោយប្រើប្រាស់សុទ្ធតែគ្រាប់មីស៊ីលទំនើបៗរបស់អាមេរិក អាល្លឺម៉ង និងប្រទេសដទៃទៀត។
អគ្គលេខាធិការអង្គការណាតូថ្លែងថាលោកពូទីនចង់បន្ទច់បង្អាក់យើងមិនឱ្យជួយអ៊ុយក្រែន។ ប៉ុន្តែមិនអាចទៅរួចទេ។ ឥឡូវនេះ ប្រទេសសមាជិកណាតូចាប់ផ្ដើមក្លាហាន និងនិយាយជាចំហជាងមុន។ រដ្ឋមន្ត្រីការបរទេសស៊ុយអែតថ្លែងថារដ្ឋាភិបាលរបស់ខ្លួនមិនដែលដាក់លក្ខខណ្ឌម្ដងណាទេ។ មានន័យថាអ៊ុយក្រែនអាចប្រើអាវុធរបស់ស៊ុយអែតទៅធ្វើអ្វីក៏បានដែរ។ ប៉ុន្តែអ៊ីតាលីបញ្ជាក់ថាខ្លួនមិនអនុញ្ញាតឱ្យអ៊ុយក្រែនប្រើអាវុធអ៊ីតាលីបាញ់ចូលទឹកដីរុស្ស៊ីទេ។
ប្រទេសរុស្ស៊ីមិនអាចនៅស្ងៀមនៅចំពោះមុខនៃការប្រកាសរបស់អាមេរិក អាល្លឺម៉ង់ និងអង្គការណាតូបានឡើយ។ ប្រតិកម្មតបចំពោះរឿងនេះ អនុប្រធានក្រុមប្រឹក្សាសន្តិសុខជាតិរុស្ស៊ី លោកឌីមីទ្រី មេតវេដេវ (Dmitry Medvedev) ថ្លែងថាបើអ៊ុយក្រែន និងបក្សសម្ព័ន្ធណាតូហ៊ានធ្វើដល់ប៉ុណ្ណឹង ពួកគេនឹងទទួលរងនូវការឆ្លើយតបដ៏វិនាសដែលមិនអាចជៀសរួច។ នោះគឺការអូសទាញពួកគេឱ្យធ្លាក់ចូលទៅក្នុងភ្នក់ភ្លើងសង្គ្រាមជាមួយរុស្ស៊ី។ នេះជាសេណារីយោដែលក្រុមបស្ចិមប្រទេសខិតខំជៀសវាងណាស់។ លោកមេតវេដេវព្រមានថាបើធ្វើរបៀបនេះ អង្គការណាតូ និងរុស្ស៊ីប្រហែលជាអាចឈានដល់ការផ្ទុះសង្គ្រាមនុយក្លេអ៊ែរ។ លោកសូមបញ្ជាក់ថានេះមិនមែនជាការនិយាយកម្លាឱ្យតែរួចពីមាត់ទេ។ រុស្ស៊ីហ៊ាននិយាយគឺហ៊ានធ្វើ។
អនុប្រធានក្រុមប្រឹក្សាសន្តិសុខជាតិរុស្ស៊ី លោកឌីមីទ្រី មេតវេដេវ (Dmitri Medvedev)រដ្ឋមន្ត្រីការពារជាតិថ្មីរបស់រុស្ស៊ីអះអាងថាទាហានរុស្ស៊ីកំពុងមានប្រៀបនៅគ្រប់សមរភូមិ។ នៅខាគីវ លោកថ្លែងថារុស្ស៊ីវាយរុញច្រានអ៊ុយក្រែនឱ្យថយក្រោយ៩គីឡូម៉ែត្រ។ រយៈពេល១ខែចុងក្រោយនេះ រុស្ស៊ីវាយយកបានទីក្រុងតូច-ធំ និងភូមិសរុប២៨កន្លែង។ ចាប់ពីដើមឆ្នាំ២០២៤រហូតមកដល់ពេលនេះ លោកថារុស្ស៊ីវាយយកបានទឹកដីអ៊ុយក្រែនបន្ថែម៨៨០គីឡូម៉ែត្រការ៉េ។ ក្រៅពីតំបន់ខាគីវ រុស្ស៊ីក៏កំពុងវាយសម្រុកឥតបន្ធូរដៃនៅតំបន់ដូញ៉ែត (Donetsk) ផងដែរ។ រុស្ស៊ីកំពុងប្រមូលកម្លាំងដើម្បីត្រៀមវាយយកតំបន់ស៊ូមី (Sumi) នៅភាគខាងជើង។ នេះបើយោងតាមប្រភពពីមន្ត្រីរដ្ឋាភិបាលអ៊ុយក្រែន៕
រដ្ឋមន្ត្រីការពារជាតិថ្មីរបស់ប្រទេសរុស្ស៊ី
ចែករំលែកព័តមាននេះ