ខេត្តសៀមរាប ៖ មន្ទីរកសិកម្មរុក្ខាប្រមាញ់ និងនេសាទខេត្តសៀមរាបបានប្រកាសពីប្រតិកម្មផ្លូវការរបស់ខ្លួនថា នឹងចាត់វិធានការស្រាវជ្រាវរកជនប្រព្រឹត្តបទល្មើស ដើម្បីយកមកផ្តន្ទាទោសតាមច្បាប់ ស្តីពីព្រៃឈើជាធរមាន ខណៈមានជនថ្លើមពាសមេឃ ហ៊ានឈូសឆាយរំលោភទន្ទ្រានយកសួនអាពាហ៍ពិពាហ៍ បម្រុងធ្វើជាកម្មសិទ្ធិ…
ខេត្តសៀមរាប ៖ មន្ទីរកសិកម្មរុក្ខាប្រមាញ់ និងនេសាទខេត្តសៀមរាបបានប្រកាសពីប្រតិកម្មផ្លូវការរបស់ខ្លួនថា នឹងចាត់វិធានការស្រាវជ្រាវរកជនប្រព្រឹត្តបទល្មើស ដើម្បីយកមកផ្តន្ទាទោសតាមច្បាប់ ស្តីពីព្រៃឈើជាធរមាន ខណៈមានជនថ្លើមពាសមេឃ ហ៊ានឈូសឆាយរំលោភទន្ទ្រានយកសួនអាពាហ៍ពិពាហ៍ បម្រុងធ្វើជាកម្មសិទ្ធិ ។
ការប្រកាសចាត់វិធានការប្រឆាំងអ្នករំលោភយកសួនអាពាហ៍ពិពាហ៍នេះ បានធ្វើឡើងបន្ទាប់ពីមានការរំលោភទន្ទ្រាន និងឈូសឆាយសួនអាពាហ៍ពិពាហ៍ នៅស្រុកប្រាសាទបាគង ខេត្តសៀមរាបយ៉ាងរង្គាល ។
ក្រុមមន្ត្រីរដ្ឋបាលព្រៃឈើខេត្តសៀមរាប នៃមន្ទីរកសិកម្មរុក្ខាប្រមាញ់ និងនេសាទខេត្តសៀមរាប កាលពីថ្ងៃទី២៧ ខែឧសភា ឆ្នាំ២០២៤ បានចុះទៅដល់ទីតាំងសួនអាពាហ៍ពិពាហ៍ ដែលត្រូវបានជនមិនស្គាល់អត្តសញ្ញាណលួចឈូសឆាយដើមឈើគ្មានសល់ ។
បើតាមសេចក្ដីប្រកាសព័ត៌មានរបស់មន្ទីរកសិកម្មរុក្ខាប្រមាញ់ និងនេសាទខេត្តសៀមរាប ចេញដោយលោក ទា គឹមសុទ្ធ ប្រធានមន្ទីរកសិកម្មរុក្ខាប្រមាញ់ និងនេសាទខេត្តសៀមរាប បានឱ្យដឹងនៅថ្ងៃទី២៧ ខែឧសភា ឆ្នាំ២០២៤ ថា ក្នុងកំឡុងពីថ្ងៃទី២២ដល់២៤ ខែឧសភា ឆ្នាំ២០២៤ មានជនមិនស្គាល់អត្តសញ្ញាណ បានប្រើប្រាស់គ្រឿងចក្ររបស់កងវិស្វកម្ម រំលោភទន្ទ្រាន និងឈូសឆាយដីសួនអាពាហ៍ពិពាហ៍ ទំហំ៣ហិកតា ដោយរៀបចំផ្លូវ២ខ្សែ ទទឹង១០ម៉ែត្រ មួយខ្សែមានប្រវែង ១៩២.៦៥ម៉ែត្រ និងមួយខ្សែទៀតមានប្រវែង១៨២.៥៣ម៉ែត្រ បោះតម្រុយបែងចែកជាប្លង់ ។
ក្នុងមួយប្លង់មានក្បាលដីទទឹង១០ម៉ែត្រ និងបានរុះរើបំផ្លាញរបងលួសបន្លា លុបស្រះទឹក និងឈូសបំផ្លាញកូនឈើដែលបានដាំក្នុងពិធីបុណ្យរុក្ខទិវាឆ្នាំ២០១៩ កាប់ និងអារដើមឈើទាលចំនួន១ដើមយកទៅសាងសង់រោង យកកូនឈើធ្វើជាសរសរ និងគាស់កូនឈើយកទៅដាំក្នុងដីឡូតិ៍ផ្សេងទៀត ។
មន្ត្រីរដ្ឋបាលព្រៃឈើបានថ្លែងប្រាប់នៅថ្ងៃទី២៩ ខែឧសភា ឆ្នាំ២០២៤ ថា នៅពេលចុះត្រួតពិនិត្យ ក្រុមការងារពុំឃើញមានជនជាអ្នកប្រព្រឹត្តចេញមុខសារភាពចំពោះសមត្ថកិច្ចឡើយ ។ ការរំលោភទន្ទ្រាន និងឈូសឆាយដីសួនអាពាហ៍ពិពាហ៍ និងចម្ការរុក្ខទិវាថ្នាក់ខេត្តឆ្នាំ២០១៩ របស់មន្ទីរកសិកម្មរុក្ខាប្រមាញ់ និងនេសាទខេត្តសៀមរាប នឹងចាត់វិធានការស្រាវជ្រាវរកជនប្រព្រឹត្តបទល្មើស ដើម្បីយកមកផ្តន្ទាទោសតាមច្បាប់ ស្តីពីព្រៃឈើជាធរមានឱ្យខាងតែបាន ។ ពិតជាថ្លើមធំពាសមេឃមែន ដែលក្លាហានហ៊ានឈូសដើមឈើចោលរាបធេងយកដីធ្វើកម្មសិទ្ធិ ។
ទោះបីការថ្លែងប្រតិកម្មរបស់មន្ទីរជំនាញ មិនបានលើកបង្ហាញពីអត្តសញ្ញាណអ្នករំលោភដីសួនអពាហ៍ពិពាហ៍ខាងលើក្ដី ក៏បង្ហាញថា អ្នករំលោភបំពាននោះ មិនមែនជាពលរដ្ឋធម្មតានោះទេ ។ បានជាហ៊ាននិយាយបែបនេះ ព្រោះតែគ្រឿងចក្រដែលគេយកមកឈូសឆាយ គឺជាគ្រឿងចក្រកងវិស្វកម្ម គឺសង្ស័យមានប្រាក់ទិញយក្សប្រើ ។ ថ្វីបើអាចនិយាយបានថា ជាការជួលក៏ដោយចុះ អ្នកដែលស៊ីឈ្នួលបែបនេះក៏មានទោសដែរ ។
សាធារណមតិរង់ចាំមើលថា តើសំណុំរឿងនេះនឹងទៅជាបែបណា ? ឬក៏បានត្រឹមផោមឱ្យស្រមោចផ្អើលទេដឹង ?… ហេ! ហេ!
កោះសន្តិភាពចាំមើលទៀត តើមហាបុរសអន្ធពាលមួយណា ? ឈ្មោះអី ដែលថ្លើមធំពាសមេឃ ហ៊ានយកដីទិវាសួនអាពាហ៍ពិពាហ៍ធ្វើកម្មសិទ្ធិបែបនេះ ?
ចែករំលែកព័តមាននេះ