រាជធានីភ្នំពេញ ៖ នារសៀលថ្ងៃទី២៨ ខែឧសភា ឆ្នាំ២០២៤នេះ មន្ទីរប្រឆាំងបទល្មើសគ្រឿងញៀន បានបង្ហាញមុខក្រុមឧក្រិដ្ឋជន ចំនួន៤ នាក់ក្នុងមានជនជាតិថៃ ៣នាក់…
រាជធានីភ្នំពេញ ៖ នារសៀលថ្ងៃទី២៨ ខែឧសភា ឆ្នាំ២០២៤នេះ មន្ទីរប្រឆាំងបទល្មើសគ្រឿងញៀន បានបង្ហាញមុខក្រុមឧក្រិដ្ឋជន ចំនួន៤ នាក់ក្នុងមានជនជាតិថៃ ៣នាក់ និងខ្មែរម្មាក់ ពាក់ពន្ធករណីជួញដូរគ្រឿងញៀនជាង ២៥៧គីឡូក្រាម ដែលទើបបង្ក្រាបប៉ុន្មានមុននេះ នៅព្រំប្រទាល់ដែនខេត្តស្ទឹងត្រែង និងប្រទេសឡាវ ។
ពិធីនោះ ធ្វើឡើងដោយលោកឧត្តមសេនីយ៍ឯក ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀន នាយករង និងការិយាល័យជំនាញដឹកនាំបង្ក្រាប ក្រោមការចូលរួមពីតំណាងអយ្យការអមសាលា និងសមត្តកិច្ចនគរបាលខេត្តស្ទឹងត្រែង ។
លោកឧត្តមសេនីយ៍ឯក ឃឹង សារ៉ាត់ បានថ្លែងឲ្យដឹងថា ដោយអនុវត្តតាមការដឹកនាំពីនាយឧត្តមសេនីយ៍ ស ថេត អគ្គស្នងការ នគរបាលជាតិ លោកឧត្តមសេនីឯក ប៊ុន ប៉ាម៉ារីលុច អគ្កស្នងការរង នឹងលោកឧត្តមសេនីយ៍ឯក ព្រំ សន្ធរ អគ្គស្នងការរង ទទួលផែនការងារប្រឆាំងបទល្មើសគ្រឿងញៀន នៅវេលាម៉ោង៦និង៣០នាទីល្ងាចថ្ងៃទី២៥ ខែឧសភា ឆ្នាំ២០២៤ ស្ថិតនៅចំណុចវាលព្រីង ឃុំអូរស្វាយ ស្រុកបុរីអូរស្វាយសែនជ័យ ខេត្តស្ទឹងត្រែង កម្លាំងការិយាល័យជំនាញ នៃមន្ទីរប្រឆាំងបទល្មើសគ្រឿងញៀន ដែលដឹកនាំដោយលោកឧត្តមសេនីយ៍ត្រី ហៀង ធារ៉ា នាយករងមន្ទីរ នឹងនាយករងម្នាក់ទៀត ជាមួយលោកវរៈសេនីយ៍ឯក ដុក មករា នាយការិយាល័យ(ក៩) បានសហការជាមួយ ស្នងការដ្ឋាននគរបាលខេត្តស្ទឹងត្រែង ចុះបង្ក្រាបករណីដឹកជញ្ជូន ដោយខុសច្បាប់នូវសារធាតុញៀន១ករណី ឃាត់ខ្លួនជនសង្ស័យចំនួន ៤នាក់ ជនជាតិថៃ៣ នាក់ និងខ្មែរម្នាក់ ដូចមាន ៖
១.ឈ្មោះ PERASAK GRIPRACHAYA ភេទប្រុស អាយុ៤៤ ឆ្នាំ ជនជាតិថៃ
២.ឈ្មោះ TEERACHAI WONGBOONCHAILERT ភេទប្រុស អាយុ៥១ ឆ្នាំ ជនជាតិថៃ
៣.ឈ្មោះ PAWIT SAECHANG ភេទប្រុស អាយុ៣៥ ឆ្នាំ ជនជាតិថៃ
និង៤.ឈ្មោះ លាប សុខឃីម ភេទប្រុស អាយ២៦ ឆ្នាំ ជនជាតិខ្មែរ ។
ចាប់យកវត្ថុតាង រួមមាន ៖
-សារធាតុញៀនប្រភេទ មេតំហ្វេតាមីន (ice) ចំនួន២២៥ដុំ ស្មើ ២២៥ គីឡូក្រាម និង ២៥៣ក្រាម ។
-សារធាតុញៀនប្រភេទ កេតាមីន ចំនួន ៣២ដុំ ស្មើ ៣១ គីឡូក្រាម នឹង ៩២៣.២ក្រាម ។
សរុបចំនួន ២៥៧ ដុំ ស្នើ ២៥៧គីឡូក្រាម នឹង ១៧៦.២ក្រាម ។
.សម្ភារចាប់យករួមមាន ៖
.ឡានចំនួន៤ គ្រឿង
.គ្រាប់បែកដៃ២ គ្រាប់
.អេកូម ចំនួន៣ គ្រឿង
.ទូរស័ព្ទដៃចំនួន៦ គ្រឿង ។
លោកឧត្តមសេនីយ៍ឯក ឃឹង សារ៉ាត់ បន្តថា ក្នុងរយៈពេល២សប្តាហ៍នេះ មន្ទីរប្រឆាំងគ្រឿងញៀនបង្ក្រាបបានករណីធំៗ២ករណី អរគុណដល់មន្ត្រីក្រោមឱវាទ ដែលបានធ្វើការយ៉ាងសស្រាក់សស្រាំ ហើយឈានដល់ការបង្ក្រាបនេះ គឺយើងបានតាមដានមុខសញ្ញា រយៈពេលជាង១ខែហើយ។ និយាយរួមទៅ កម្លាំងមន្ទីរប្រឆាំងបទល្មើសគ្រឿងញៀនយើង បានដេកក្នុងព្រៃជាង១ខែ ទម្រាំចាប់ខ្លួនឧក្រិដ្ឋជននេះបាន ដោយមានការសហការល្អ ជាមួយកម្លាំងស្នងការដ្ឋាននគរបាលខេត្តស្ទឹងត្រែង ក្រោមការសម្របសម្រួលពីស្ថាប័នអយ្យការអមសាលាដំបូងខេត្តផងដែរ ។
លោកឧត្តមសេនីយ៍ឯក ឃឹង សារ៉ាត់ បន្តទៀតថា ការបង្ក្រាបមួយករណីនេះ គឺមានការលំបាកខ្លាំង ដោយសារកម្លាំងយើង ត្រូវបានត្រៀមខ្លួននៅក្នុងព្រៃ ដើម្បីចាំក្រសោមក្រុមឧក្រិដ្ឋជន ដែលដឹកគ្រឿងញៀនចេញពីព្រំដែនកម្ពុជា-ឡាវ តាមមធ្យោបាយរថយន្តចំនួន-៤គ្រឿង ចាប់ខ្លួនបាន-៤នាក់ ជនជាតិថៃ ០៣នាក់ និងខ្មែរម្នាក់ ។
លោកឧត្តមសេនីយ៍ឯក ឃឹង សារ៉ាត់ អោយដឹងបន្ថែមថា បើតាមការមើលពីចម្ងាយ ពេលក្នុងរង្វង់ប្រតិបត្តការនេះ ឧក្រិដ្ឋជនអាច២ ទៅ៣នាក់ ប្រហែលជារត់គេចខ្លួន ព្រោះអីក្នុងពេលកម្លាំងចាប់បានម្នាក់ មានឡាន២គ្រឿង អញ្ចឹងយើងសន្មត់ថា ២នាក់ ឬទៅ៣នាក់ទៀត ដែលរត់គេចខ្លួន ។
លោកបញ្ជាក់ថា ក្រុមឧក្រិដ្ឋជននេះ មានផែនការច្បាស់លាស់ណាស់ តាំងពីឡានបើក មើលផ្លូវ តាំងពីឡានបិតគូទ និងមានគ្រាប់បែក ដាក់តាមខ្លួនទៀត នេះបើសិនជាកម្លាំងសមត្តកិច្ចធ្វើការមិនទាន់ពេលវេលាទេនោះ អាចក្រុមឧក្រិដ្ឋជនបោកគ្រាប់បែក បណ្តាលឲ្យគ្រោះថ្នាក់ដល់មន្ត្រីហើយ ឬកម្ទេចវត្ថុតាងថែមទៀត ។
លោកបន្ថែមទៀតថា ហើយនេះជាវត្ថុតាង និងសម្ភារៈ ដែលសមត្តកិច្ចយើងបង្ក្រាបបានដូចជា គ្រឿងញៀនចំនួនជាង ២៥៧គីឡូក្រាម គ្រាប់បែក២គ្រាប់ លុយជិត១ម៉ឺនដុល្លារអាមេរិក លុយថៃជាង ១០ម៉ឺនបាត និងមានលុយខ្មែរមួយចំនួនទៀត ។
ក្រោយធ្វើពិធីបង្ហាញមុខជនសង្ស័យ និងវត្ថុតាងត្រូវបានប្រគល់ឲ្យទៅសមត្តកិច្ចនគរបាលខេត្តស្ទឹងត្រែង យកទៅចាត់ការតាមនីតិវិធី ៕
ចែករំលែកព័តមាននេះ